बजेट सक्न बर्खामा मुख्यमन्त्री कप

सहिद मैदान जलमग्न भएपछि धरान सारियो
विनोद भण्डारी

(विराटनगर) — बजेट सक्न मुलुकभर असारे विकासका काम धमाधम भइरहँदा आलोचना बढिरहेको छ । प्रदेश १ मा पनि बजेट सिध्याउनकै लागि असारे विकास मात्र नभएर खेलकुदमा मुख्यमन्त्री कप प्रदेश लिग फुटबल प्रतियोगिता भइरहेको छ । 

प्रतियोगिताको लागि प्रदेश सरकारले १ करोड र अखिल नेपाल फुटवल संघ (एन्फा) ले ३३ लाख रुपैयाँ आयोजक समितिलाई दिएको छ । आयोजक समितिले यो बजेट असार मसान्तसम्म सिध्याउनै पर्नेछ ।

बजेट सिध्याउनै आयोजकले असार १६ देखि प्रदेशका १४ जिल्लाका १४ क्लबबीच पहिलो चरणको लिग आयोजना गर्‍यो । गाईघाटमा असार १६, धरानमा असार १७ र इलाममा असार १८ देखि पहिलो चरणको लिग सकेर दोस्रो चरणको लिगका लागि ६ टिम छनोट गरेको छ ।

दोस्रो चरणका लागि छनोट भएका धरान फुटबल क्लब सुनसरी, बौद्धिक विकास समाज समिति धनकुटा, बेलबारी फुटबल क्लब मोरङ, सैनिक युथ क्लव झापा, बाक्सिला फुटबल क्लव खोटाङ र रेडहर्स फुटबल क्लब इलामबीचको सुपर सिक्स बिहीबारदेखि विराटनगरस्थित सहिद रंगशालामा गर्ने आयोजकको तयारी थियो ।

तर मंगलबार रातिको भारी वर्षाले सहिद रंगशालामा बुधबार एक फिटभन्दा बढी पानी जमेपछि शुक्रबारदेखि धरानमा खेलाइने निर्णय आयोजकले गरेको छ । सहिद मैदानमा खेल सञ्चालन गर्न आयोजकले करिब डेढ लाख रुपैयाँ मैदान मर्मतमा खर्च गरेको थियो ।
प्रदेश सरकारले कार्यविधि ढिलो तयार गर्दा प्रतियोगिता मध्य असारमा गर्नुपरेको आयोजक समितिका अध्यक्ष एवं एन्फाका प्रवक्ता किरण राईको भनाइ छ ।

‘प्रतियोगिता नगर्दा बजेट नै फ्रिज हुने भयो,’ प्रवक्ता राईले कान्तिपुरसँग भने, ‘त्यसैले बजेट फ्रिज हुन नदिन प्रतिकूल मौसममा पनि प्रतियोगिता गर्नैपर्‍यो ।’ मौसमले प्रतियोगितालाई खासै प्रभाव नपारेको राईको दाबी छ ।

‘बर्खा हो पानी पर्छ नै,’ उनले भने, ‘पहिलो चरणको लिगबाट छनोट ६ टिमबीचको लिग विराटनगरमा गर्ने तयारी थियो । तर मैदानमा पानी जमेकाले धरानमा गर्ने निर्णय गरिएको हो ।’ उनले यो प्रतियोगितालाई असारे विकाससँग दाँज्न नमिल्ने बताउँदै प्रतिकूल मौसममा पनि प्रतियोगिता गर्नु खेलकुदमा गौरव विषय भएको बताए ।

उनका अनुसार आगामी वर्षदेखि प्रतियोगिता अनुकूल मौसममा आयोजना गरिने छ । प्रतिकूल मौसमकै कारण यस वर्ष आयोजना गर्ने भनिएको मुख्यमन्त्री अन्तर्राष्ट्रिय नकआउट फुटबल प्रतियोगिता भदौ–असोजमा सारिएको छ । राईले भने, ‘पैसा सक्न प्रतियोगिता गरिएको भए मुख्यमन्त्री अन्तर्राष्ट्रिय नकआउट फुटबल पनि अहिले नै हुन्थ्यो त ।’

प्रतियोगिताका लागि प्रदेश सरकारको १ करोड र एन्फाको ३३ लाख बजेटबाट १४ टिमलाई खानबस्न र यातायातका लागि ३३ लाख, टिम तयारी खर्च ७ लाख, १४ टिमलाई १५ थानका दरले बल उपलब्ध गराउँदा ५ लाख, चार स्थानको खेलस्थल मर्मतका लागि १२ लाख, प्रचारप्रसार, स्वयंसेवक परिचालन, आकस्मिक स्वास्थ्य र मसलन्द खर्चमा ५ लाख, पुरस्कारतर्फ २० लाख, रेफ्री र अन्य प्राविधिक परिचालनमा १० लाख, पदाधिकारी यातायात र परिचालनमा ५ लाख र अतिथि सत्कारमा ३ लाख रुपैयाँ विनियोजन गरिएको अध्यक्ष राईले बताए ।

पहिलो चरणको लिग म्याचमा गाईघाटमा मोरङ, खोटाङ, उदयपुर, ओखलढुङगा र सोलुखुम्बु, धरानमा सुनसरी, धनकुटा,तेह्रथुम, भोजपुर र संखुवासभा तथा इलाममा झापा, इलाम, पाँचथर र ताप्लेजुङले प्रतिस्पर्धा गरेका थिए ।

पहिलो चरणबाट छनोट ६ टिमबीचको सुपर सिक्सको पहिलो र दोस्रो स्थानमा रहने टिमबीच असार ३१ मा फाइनल गरिने खेलतालिका छ । प्रतियोगितामा सबै विधामा गरी २० लाख रुपैयाँ पुरस्कार वितरण गरिने छ । उत्कृष्ट खेलाडीले एक लाख, उत्कृष्ट डिफेन्स, फरवार्ड, गोलकिपर, सर्वाधिक गोलकर्ता र उत्कृष्ट प्रशिक्षकले जनही २५ हजार रुपैयाँ पुरस्कार पाउने छन् । लिग विजेताले ५ लाख र ४ किलो चाँदीको रनिङ कप जित्ने छन् ।

प्रकाशित : असार २६, २०७६ १०:०८
ADVERTISEMENT
प्रतिक्रिया
पठाउनुहोस्
ADVERTISEMENT

सेरेना उपाधितर्फ केन्द्रित

विम्बल्डन ओपन
(एएफपी)

लन्डन — सेरेना विलियम्स बिनापीडा राम्रो अवस्थामा रहेकाले विम्बल्डन ओपनको उपाधि जित्न शतप्रतिशत केन्द्रित रहेको उनका प्रशिक्षक प्याट्रिक मोउरातोग्लोउले बुधबार बताएका छन् । बच्चा जन्माएपछि ३७ वर्षीया सेरेना कडा मिहिनेत गर्दै पुनरागमन गरिरहेकी छन् ।

थुप्रै चोटको समस्याबाट गुज्रिएकी उनी प्रशिक्षकका अनुसार मार्गरेट कोर्टको कीर्तिमान २४ ग्रान्डस्लाम उपाधि बराबरी गर्ने लक्ष्यमा रहेकी छन् । अमेरिकी खेलाडीको ‘ट्रेडमार्क’ शैलीको खेल चाखलाग्दो रूपमा अर्को तहमा फर्किएको छ । उनले फेरि पनि आफ्नो लय समातेको प्रशिक्षकले बताए ।

११ औं वरीयताकी सेरेनाले सेमिफाइनलमा बिहीबार ५४ औं विश्व वरीयताकी चेक गणतन्त्रकी बारबोरा स्ट्रेकोभाको सामना गर्नेछिन् । ‘यो क्षणमा उनी राम्रो अवस्थामा छिन् । उनी खुसी छन्,’ प्याट्रिकले भने, ‘उनका पति यहाँ छन् । उनका छोरी यहाँ छिन् । उनी अहिले तीन साताका लागि पीडारहित अवस्थामा छिन् ।’

‘हरेक दिन पीडामा केन्द्रित हुँदा प्रतियोगितामा तयारी गर्नका लागि धेरै कठिन हुन्छ,’ प्रशिक्षक प्याट्रिकले भने, ‘पीडासहित प्रतिस्पर्धा गरेको अवस्थामा खेलमा केन्द्रित हुन गाह्रो हुन्छ किनभने पीडित भएको अवस्थामा हुन्छ । अब अवस्थामा फरक छ । जब उनले खेलिरहेकी हुन्छिन्, त्यस बेला उनी खेल र जितप्रति शतप्रतिशत केन्द्रित भइरहेकी हुन्छिन् । उनले आफ्नो स्तर आवश्यक भएको बेला उकासेकी छन् । त्यो उनको ट्रेडमार्क हो । उनी फर्किएकी छिन् । त्यसैले सबथोक सकारात्मक छ ।’

४९ वर्षीय यी ग्रिक–फ्रेन्च प्रशिक्षकले सेरेनासँग सन् २०१२ यता निरन्तर सहकार्य गरिरहेका छन् । यो सहकार्यले अमेरिकी खेलाडीको ग्रान्डस्लामको सिंगल्समा २३ उपाधिमध्ये १० वटा हात पारेको छ । अस्ट्रेलियाली महान्खेलाडी कोर्टले सन् १९६० देखि १९७३ सम्मको अवधिमा २४ ग्रान्डस्लाम जितेकी थिइन् ।

प्याट्रिकले सेरेना सुरुबाटै बिम्बल्डन जित्दै कोर्टको सफलतालाई उछिन्नेमा केन्द्रित भएकी बताएका छन् । ‘त्यसैका लागि उनी बच्चा जन्माएर स्वास्थ्यमा थुप्रै समस्या बाबजुद पनि टेनिस खेल्न फर्किएकी हुन् । उनी जसरी ऊर्जा लगाएकी छन्, यस्तो मैले कहिल्यै देखेको थिएन । त्यो स्तरमा फर्किन उनले गरेको कठिन मिहिनेतबारे तपाईलाई कुनै आइडिया छैन । उनी त्यसैका लागि फर्किएकी हुन् । यो उनका लागि सम्भवत् धेरै हुनेछ, जब सफलतापाउने छिन् ।’

सातपल्टकी बिम्बल्डन च्याम्पियन सेरेनाले घुँडाको समस्याको कारण फ्रेन्च ओपन गुमाएकी थिइन् । त्यसका लागि उनले पेरिसका चिकित्सकसँग निश्चित गरेकी थिइन् । प्रशिक्षकले उनलाई खेलको अभ्यास कम भएर पनि बिम्बल्डनका लागि तयार गरेको हुनसक्छ ।

‘उनी राम्रो तयारीमै रहेकी भए पनि उनले पहिलो खेलमा राम्रो टेनिस खेलेकी छैनन् । उनी धेरै समय लय समात्नै संघर्षरत थिइन्,’ प्रतिद्वन्द्वीहरू बाहिरिइरहेकोबारे उनले भने, ‘हरेक खेलपछि मलाई त्यो थाह छ । उनी राम्रोमाथि राम्रो भइरहेकी छन् ।’

बिहीबारै अर्को सेमिफाइनलमा सातौं वरीयताकी सिमोना हालेपले आठौं स्थानकी एलिना स्भितोलिनाविरुद्ध प्रतिस्पर्धा गर्दै छिन् ।

प्रकाशित : असार २६, २०७६ १०:०५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT