भारतलाई १८ रनले पराजित गर्दै न्यूजिल्याण्ड विश्वकपको फाइनलमा

कान्तिपुर संवाददाता

काठमाडौँ — भारतलाई १८ रनले पराजित गरी न्यूजिल्यान्ड एकदिवशीय विश्वकपको फाइनलमा प्रवेश गरेको । उपाधिका लागि न्यूजिल्यान्डले इंग्ल्यान्ड र अस्ट्रेलियाबीच हुने दोस्रो सेमिफाइनलको विजेतासँग आइतबार खेल्नेछ ।


दुईपटकको च्याम्पियन भारतले लिग चरणमा एक खेलमात्र हारेको थियो । अंक तालिकाको शीर्ष स्थानमा रहेर सेमिफाइनलमा पुगेको भारतको सशक्त ब्याटिङ पंक्ति यसरी ध्वस्त हुन्छ भन्ने कमैले सोचेका थिए ।


यो हारसँगै विश्वकपकै मुख्य दावेदारमध्येको एक भारतको यात्रा सेमिफाइनलमै समाप्त भएको छ । अघिल्लो संस्करणमा पनि भारत फाइनल पुग्न असफल भएको थियो । न्यूजिल्यान्ड भने फाइनलमा चीर प्रतिद्वन्द्वी अस्ट्रेलियासँग पराजित भएको थियो ।


म्यान्चेस्टरको ओल्ड ट्राफोड मैदानमा २ सय ४० रनको लक्ष्य पछ्याएको भारतको शीर्ष क्रम ध्वस्त हुँदा इनिङ्सको ३ बल बाँकी छँदै २ सय २१ रनमा अलआउट भयो । पछिल्लो खेलमा सतक प्रहार गरेका भारतीय ओपनरहरु लोकेस राहुल र रोहित शर्मा समान १ रनमै आउट भएका थिए । कप्तान विराट कोहलीले पनि १ रनमात्र बनाउन सके । दिनेश कार्तिक ६ रन बनाएर आउट हुँदा १० ओभरमा भारत २४–४ को स्थितिमा पुगिसकेको थियो ।


ऋषभ पन्त र हार्दीक पन्ड्याले ४७ रनको साझेदारी गरी इनिङ्स उकास्ने प्रयास गरे पनि २२.५ ओभरमा पन्त र ३०.३ ओभरमा पन्ड्या समान ३२ रनको व्यक्तिगत स्कोरमा आउट भएपछि भारत ९२–६ को दयनीय अवस्थामा पुगेको थियो ।


सातौं विकेटका लागि पूर्व कप्तान महेन्द्र सिंह धोनी र रविन्द्र जडेजाले १ सय १६ रनको साझेदारी गरी भारतलाई जितको आशा देखाएका थिए । भारतलाई जितका लागि ३२ रन आवश्यक हुँदा ७७ रन बनाएर खेलिरहेका जडेजा ट्रेन्ट बोल्टको बलमा लङ अफ क्षेत्रमा कप्तान केन विलियमसनको हातबाट क्याचआउट भए ।


जडेजाले ४ चौका र ४ छक्का प्रहार गरे । अर्को ओभरमा धोनी पनि रनआउटको शिकार बनेपछि भारतको आशा समाप्त भयो । लोकी फर्गुसनको बलमा २ रन लिने प्रयासमा रहेका धोनीलाई मार्टिन गुप्टिलले रनआउट गरेका थिए ।


अन्तिम क्रमका ३ ब्याट्सम्यान सस्तैमा आउट भए । न्यूजिल्यान्डका म्याट हेनरीले शीर्ष क्रमका ३ ब्याट्सम्यानलाई आउट गरेपछि भारत मध्यम लक्ष्य पछ्याउन असमर्थ रहेको हो । ट्रेन्ट बोल्ड र मिचेल सान्टनरले पनि २/२ विकेट लिए ।


वर्षाका कारण २ दिन लगाएर खेलिएको खेलमा टस जितेर ब्याटिङ गरेको न्युजिल्याण्डले मंगलबार ४६.१ ओभरमा २ सय ११ रन बनाएको थियो । म्यान्चेस्टरमा वर्षा नरोकिएपछि बुधबार बाँकी खेल खेलाइएको हो । न्युजिल्याण्डले ५० ओभरमा ८ विकेट गुमाएर २ सय ३९ रनको योगफल खडा गरेको थियो ।


न्यूजिल्यान्डका मध्यक्रमका ब्याट्सम्यान कप्तान केन विलियमसन ६७ र रस टेलरले ७४ रन बनाएका थिए । भारतका भूवनेश्वर कुमारले ३ विकेट लिए ।


सच्याइएको : भारत १८ रनले पराजित हुनुपर्नेमा भुलवश अन्यथा हुन गएको सच्याएको छ । यसबाट पाठकमा पर्न गएको भ्रम प्रति हामी क्षमापार्थी छौं ।


प्रकाशित : असार २५, २०७६ १९:४२

ADVERTISEMENT
प्रतिक्रिया
पठाउनुहोस्

समायोजनमा पर्न ‘बढाइचढाइँ’ मेडिकल रिपोर्ट, सामान्य रोग लागेकालाई पनि मेडिकल बोर्डको सिफारिस

फातिमा बानु

काठमाडौँ — वीर अस्पतालका कर्मचारीले समायोजन हुँदा केन्द्रमै बस्नका लागि बढाइचढाइँ मेडिकल रिपोर्ट बनाएर पेश गर्न थालेका छन् । शारिरीक रुपमा अशक्त नरहे पनि केही कर्मचारीले आर्थिक चलखेल र व्यक्तीगत चिनजानका आधारमा अशक्त भएको देखिने झैं गरेर मेडिकल रिपोर्ट बनाएर स्वास्थ्य मन्त्रालयमा पेश गरेका छन् ।


स्वस्थ्य मन्त्रालयले समायोजनको सूचना प्रकाशित गरेसँगै आफू निकट चिकित्सकको रिपोर्टका आधारमा मेडिकल बोर्डको सिफारिस लिने कर्मचारीको संख्या ह्वत्तै बढेको देखिन्छ ।

कर्मचारी र चिकित्सकको मिलोमतोमा तयार पारिका रिपोर्टहरु मेडिकल बोर्डले पनि फटाफट सदर गरिरहेको छ । यति मात्रै होइन आफू निकट कर्मचारीलाई केन्द्रमा समायोजन गर्न स्वास्थ्य मन्त्रालयका कर्मचारीहरुको पनि मिलोमतो रहेको वीर अस्पताल स्रोतको दाबी छ ।

झुठो रिपोर्टमाथि छानबिन गर्नुपर्‍यो भन्दै वीर अस्पतालका कर्मचारीले स्वास्थ्य मन्त्रालयमा उजुरी समेत हालेका छन् । झुठा मेडिकल रिपोर्टहरु पेश भइरहेको गुनासो माथि ध्यानाकर्षण भएको बताउँदै स्वास्थ मन्त्रालयका प्रवक्ता महेन्द्र श्रेष्ठले भने, ‘समायोजनको सूचना निस्केसँगै बोर्डबाट आउने सिफारिसको संख्या बढेको छ । रिपोर्टहरु माथि छानबिन हुन्छ ।’

लामो समय केन्द्रिय स्वास्थ संस्थामा काम गरेका कर्मचारी समायोजन हुँदा स्थानीय र प्रदेश तहमा पुग्ने भएपछि उनीहरूले आफ्नो रोगका बारे बढाईचढाइ गरेर रिपोर्ट बनाएर पेश गरेर केन्द्रमा बस्ने दाउ गरेको स्रोत बताउँछ ।

नेपाल सरकारले गठन गरेको मेडिकल बोर्डले प्रमाणित गरेमा कर्मचारी समायोजन ऐन–२०७५ अनुसार कडा रोगका बिरामी तथा गम्भिर र अशक्त कर्मचारीले रोजेको ठाउँमा समायोजन हुन सक्छन् । यही व्यवस्थाको दुरुपयोग गर्दै वीर अस्पतालका केही कर्मचारीले झुठो मेडिकल रिपोर्ट बनाएका छन् भने केहीले बनाउने प्रकृयामा रहेको स्रोतको दाबी छ । ती कर्मचारीले आफूलाई हुँदै नभएको रोगको मेडिकल रिपोर्ट बनाएर मेडिकल बोर्डमा पेश गरेका छन् ।

निजामती नियमावली–२०५० अनुसार मुटु, मृर्गौला र क्यान्सरलाई कडा रोग भने पनि मेडिकल बोर्डले यी रोग बाहेक अन्य समस्या भएकालाई पनि सिफारिस दिइरहेको छ । एलर्जी, थाइराइड, उच्च रक्तचाप, बाथ जस्ता कडा नमानिएका स्वास्थ्य समस्या देखाएर केन्द्रमै बस्न कर्मचारीहरु मेडिकल बोर्ड र स्वास्थ्य मन्त्रालय धाइरहेका छन् ।

वीर अस्पतालमा तलब बाहेक ५० प्रतिशत पाइने भत्ताको लोभमा दरबन्दी नै नभएको ठाउँमा पनि बोर्डको सिफारिस बनाएर उनीहरु बस्न खोजेका हुन् ।

वीर अस्पतालको मेडिकल ओपीडीका कर्मचारी अहेब युवराज सुवेदीले राजनीतिक आस्था मिल्ने आफू निकिटका चिकित्सकसँग बढाइचढाइ मेडिकल रिपोर्ट बनाएका छन् । ट्रमा सेन्टरका हाडजोर्नी विभागका प्रमुख डा. श्रीकृष्ण गिरीले बनाइदिएको रिपोर्ट अनुसार कर्मचारी सुवेदी लामो समय उभिन र हिँड्न सक्दैनन् । सुवेदी उनै कर्मचारी हुन् जो दैनिक भक्तपुरबाट मोटरसाइकल चढेर वीर अस्पतालसम्म काम गर्न आउँछन् । आफ्नो छुट्टै मेडिकल लगायत वीरमा सक्रिय रुपमा काम गर्दै आइरहेका छन् । ‘उभिन नसक्ने व्यक्ति कसरी दैनिक मोटरसाइलकमा यात्रा गर्न र काम गर्न सक्छन ? आन्दोलनमा दौडिने झैझगडामा अगुवा हुने पनि यीनै हुन् ?’ स्रोतले भन्यो ।

यसबारे कान्तिपुर दैनिकले संवाद गर्न खोज्दा सुवेदीले फुर्सद नभएको बताए ।

झुठो मेडिकल रिपोर्ट बनाउने वीरका अर्का कर्मचारी हुन्– डिल्लीराम खनाल । उनी वीर अस्पतालको युरो ओपीडीमा कार्यरत छन् ।

उनको कामै उभिएर गर्नुपर्ने प्रकृतिको छ । ट्रमा सेन्टरका हाडजोर्नी चिकित्सक डा. सन्तोष पौडेलले बनाएको रिपोर्ट अनुसार उनलाई लामो समय हिँड्न, उभिन या उकालो–ओरालो गर्न मिल्दैन । समायोजन अन्तर्गत दुर्गममा जानु नपरोस् भनेर उनले आफ्नो पार्टी निकट चिकित्सकसँग मिलेर झुठो रिपोर्ट बनाई बोर्डमा पेश गरेका छन् । खनाल भन्छन्, ‘मेडिकल बोर्ड नै गरेको सिफारिस गरेको रिर्पोटमाथि प्रश्न गर्नुहुन्छ भने मेरो भन्नु केही छैन ।’

‘आफू निकट चिकित्सकले सजिलै रोग लागेको सिफारिस बनाइदिन्छन् । त्यसैलाई मेडिकल बोर्डमा पेश गरेर सिफारिस लिइरहेका छन्,’ स्रोतले भन्यो ।

यस्तै अस्पतालका अन्य कर्मचारीहरु सबिता जोशी, डिल्लीराम आचार्य, जीवन श्रेष्ठ, शंकरकुमार झा लगायतले बनाएको मेडिकल बोर्डको सिफारिस हेर्दा उनीहरुलाई गम्भिर प्रकृतिको रोग भएको देखिँदैन ।

हालसम्म मेडिकल बोर्डबाट सिफारिस भएकै आधारमा ६४ कर्मचारीका समायोजन भइसकेको छ भने स्वास्थ्य मन्त्रालयले ४, ५, ६ तहका स्वास्थ्यका कर्मचारीको समायोजन सूचि सार्वजनिक गर्ने तयारी गरिरहेको छ । ९ औं र दशौं तहका स्वास्थ्यकर्मीको समायोजनको टुंगो अन्तिम चरमा पुगिसकेको छ ।

प्रकाशित : असार २५, २०७६ १८:५१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×