३६ वर्षे जवान

(एएफपी)

बेलो होरिजोन्टे, ब्राजिल — ब्राजिली टिमका कप्तान ड्यानी अल्भेस ३६ वर्षको उमेरमा पनि युवा छन् । उनले आफ्नो ट्रफीको संख्यालाई थप गर्दै संन्यास लिने सोचेका थिए भने त्यसलाई बिर्सन सक्नेछन् । ब्राजिलले कोपा अमेरिकाको फाइनलमा आइतबार पेरुविरुद्ध रियो दी जेनेरियोस्थित माराकाना रंगशालामा प्रतिस्पर्धा गर्दा अल्भेस मुख्य भूमिका निर्वाह गर्ने तयारीमा छन् । यी फुलब्याकमा पछाडि हट्ने कुनै संकेत देखिएको छैन ।

‘म कति वर्षको भएँ भन्ने मलाई थाह छ र त्यो भनेको फुटबलमा के हो भन्ने अर्थ पनि थाह छ । तर, मानिसहरूले नतिजा चाहन्छन् भन्ने मैले सिकेको छु,’ गत महिना पेरिस सेन्ट जर्मेन छाडेको घोषणा गरेयता क्लबविहीन रहेका अल्भेसले भने, ‘म त्यसप्रति केन्द्रित छु । म मेरो उमेरमा केन्द्रित भइरहेको छैन र मेराबारे मानिसहरू के भन्छन् भनेर पनि । म यहाँ कसैलाई चूप लाउन आएको होइन । सामान्य रुपमा भन्नुपर्दा म यहाँ मेरो काम गर्नलाई आएको हो ।’ उनको ‘ट्रफी क्याबिनेट’ मा यसअघि नै कोपा अमेरिका र अरु केही उपाधि जोडिएका छन् । उनी बाँचेको वर्षभन्दा बढी ट्रफी उनीसँग रहेको छ । उनले च्याम्पियन्स लिग तीनपल्ट जितेका छन् । युरोपेली महादेशीय क्लब स्तरमा पुरानो यूईएफए कप दुईपल्ट, क्लब विश्वकप तीनपल्ट, युरोपियन सुपर कप चारपल्ट हात पारेका छन् । उनले बार्सिलोनासँग ला लिगा ६ पल्ट, पेरिस सेन्ट जर्मेनसँग फ्रेन्च लिग वान दुईपल्ट र युभेन्ट्ससँग सिरी ‘ए’ एकपल्ट जितेका छन् । स्पेन, फ्रान्स र इटालीमा जितेका घरेलु कपका आठ उपाधिलाई उल्लेख गरिरहनु नपर्ला ।

अल्भेसले ब्राजिलसँग सन् २००७ को कोपा अमेरिका र दुईपल्ट कन्फेडेरेसन कपको उपाधि जिते । उनको टिमले कोपा अमेरिकाको सेमिफाइनलमा मंगलदबार अर्जेन्टिनालाई २–० ले हराएको थियो । त्यसमा उनले २० मिनेटभित्र अर्जेन्टिनी तीन खेलाडीलाई छक्याएर रोबर्टो फिर्मिनोलाई बल दिएका थिए र फिर्मिनोको क्रसमा ग्याब्रियल जेससले गोल गर्दै बेलो होरिजोन्टेमा ब्राजिललाई अग्रता दिलाएका थिए । त्यसप्रति उनी सन्तुष्ट भएको हुनसक्छन् ।

अल्भेसको कौशल निकै सुन्दर हुने गर्छ । उनले चिप गर्दै मार्कुस एक्युनालाई उछिने, लिएन्ड्रो पाराडेसलाई गलत दिशामा स्लाइड हान्न लगाए र निकोलस टाग्लियफिकोलाई ओझेलमा पार्दै फिर्मिनोलाई पास दिएका थिए । ‘बक्स’ मा ब्राजिल थियो । काउन्टर एट््याकमा म्यानचेस्टर सिटीका जेससको पासमा फिर्मिनोले ‘ट्याप’ गरेर ब्राजिलले जित सुरक्षित गर्‍यो र फाइनलमा स्थान पक्का गर्‍यो ।

त्यो गोलमा अल्भेसको एक्लो दिमागको प्र्रतिबद्धता अर्को उदाहरण हो । बलसँग नहुँदा र रेफ्रीले नदेखेको अवस्थामा उनले मैदानमा सर्जियो अगुइरोसँग नोकझोक गरिहेका थिए । त्यस बेला अगुइरो खेलमा संलग्न भएका थिएनन् तर अल्भेसले कुनै अवसर दिइरहेका थिएनन् । त्यो नियमविपरीत थियो । फाउल थियो । त्यसमा पेनाल्टीसम्म पनि हुनसक्थ्यो । तर त्यसबाट अल्भेस टाढै रहे र सबै हिसाबले जित हात पारे । त्यसमा उनी लामो समयदेखि नै जानकार थिए भन्ने बुझ्न सकिन्छ ।

प्रकाशित : असार २१, २०७६ ०९:०२
प्रतिक्रिया
पठाउनुहोस्

रित दुई शतक बनाउने पहिलो

कान्तिपुर संवाददाता

काठमाडौँ — रित गौतम उमेर समूहमा नेपालबाट दुई शतक बनाउने पहिलो खेलाडी बनेका छन् । उनको शतकमा नेपाल शुक्रबार सिंगापुरलाई २ सय १७ रनले पराजित गरी एसीसी यू–१९ इस्टर्न रिजन क्रिकेटको समूह ‘ए’ को विजेता बनेको छ । 

ओपनर रितको अविजित १ सय १५ रनमा टस जितेर ब्याटिङ गरेको नेपालले मलेसियाको क्वालालम्पुरस्थित किन्रारा ओभल मैदानमा ४ विकेट गुमाई ३ सय २६ रन बनायो । जवाफमा आएको सिंगापुरलाई नेपालले ३९.१ ओभरमा १ सय ९ रनमा अलआउट गर्‍यो ।

नेपालले अघिल्लो दिन चीनलाई १० विकेटले पराजित गरेको थियो । नेपालसँग पराजित भए पनि सिंगापुर यसअघि नै समूह ‘ए’ को उपविजेता रूपमा सेमिफाइनलमा पुगिसकेको छ । नेपालले सोमबार हुने सेमिफाइनलमा समूह ‘बी’ को उपविजेतासँग खेल्नेछ । समूह ‘बी’ मा हङकङ र मलेसियाको समान ४ अंक छ । यी दुई टोली नै शनिबार अन्तिम खेल खेल्दै छन् ।

रितले दुई वर्षअघि थाइल्यान्डमा भएको एसीसी यू–१६ इस्टर्न रिजनमा म्यानमारसँग अविजित १ सय ६ रन बनाएका थिए । यसअघि कुनै नेपाली खेलाडीले उमेर समूहको अन्तर्राष्ट्रिय प्रतियोगितामा दुई शतक बनाएका छैनन् । २०१५ मै मलेसियामा युगान्डासँग यू–१९ विश्वकप छनोटमा राजु रिजालले १ सय १ रन बनाए यता नेपाली खेलाडीले पहिलो पटक यू–१९ मा शतक बनाएका हुन् । रितले पवन सर्राफसँग पहिलो विकेटमा ८९ बलमा ९२ र खडकबहादुर बोहरासँग दोस्रो विकेटमा १ सय ४८ बलमा १ सय ३१ रन जोडे । रितले १ सय ३७ बलको इनिङ्समा १० चौका र १ छक्का प्रहार गरे । पवनले ४१ बलमा ४५ रन बनाउँदा १० चौका प्रहार गरे । खडक ९० रनमा आउट भए । ९० नै बल खेलेका उनले १२ चौका प्रहार गरे । विशालविक्रम केसी १ र कप्तान रोहितकुमार पौडेल ७ रनमा आउट भए ।

कुशल मल्ल २३ बलमा ५१ रन बनाई अविजित रहे । उनले ४ चौका र ५ छक्का प्रहार गर्दै रितसँग ४२ बलमै अविजित ८२ रन जोडे । सिंगापुरका विनित मेहेता र प्रणव कृष्णनले २–२ विकेट लिए । कृष्णनले सोक्रममा ८ ओभरमा ८१ रन खर्चेका थिए । सिंगापुरबाट ओपनर सतिश कन्नुसामीले २४, हरि कुक्रेजाले ३० र चन्द्रमाउली श्रीदेवले २३ रन बनाउनुबाहेक अन्यले दोहोरो स्कोर बनाउन सकेनन् । नेपालबाट कुशलले ४ विकेट लिए । उनले ९ ओभरमा १ मेडन राख्दै १४ रन खर्चे । तिलकराज भण्डारीले २ तथा रशिद खान र सागर ढकालले १–१ विकेट लिए ।

प्रकाशित : असार २१, २०७६ ०९:००
पूरा पढ्नुहोस्
ADVERTISEMENT
प्रतिक्रिया
पठाउनुहोस्