अर्जेन्टिनाले ताजा सुरुआत लिने

एएफपी

पोर्टो एलेग्रे — अर्जेन्टिनाले कोपा अमेरिकामा कतारलाई २–० ले पराजित गर्दै आइतबार नकआउट चरणको यात्रा तय गरेको छ । अर्जेन्टिनी कप्तान लियोनल मेसीले अब आफ्नो टिमले प्रतियोगितामा ताजा सुरुआत लिने बताएका छन् ।

लौटारो मार्टिनेजले सुरु र सर्जियो अगुइरोले अन्त्यतिर गरेको गोल मदतले अर्जेन्टिना विजयी हुँदै अन्तिम आठमा छनोट हुन भयो । यसअघि नै नकआउट चरणमा प्रवेश गरिसकेको कोलम्बियाले पाराग्वेलाई १–० ले पराजित गर्‍यो ।

यो नतिजाले अर्को समूहमा तेस्रो स्थानमा रहेको पेरुले पनि क्वाटरफाइनल खेल्ने छ । कोलम्बिया पछाडि समूह ‘बी’ को दोस्रो स्थानमा रहेको अर्जेन्टिनाले अब भेनेजुएलाको सामना गर्नेछ । प्रतियोगितामा डेब्यू गरिरहेको एसियाली पाहुना टिम कतारको भने चुनौती सकिएको छ ।

यसै समूहको तेस्रोमा रहेको पाराग्वेको २ अंक छ । उसको भाग्य अर्को समूह ‘सी’ मा जापान र इक्वेडरबीच हुने खेलले निर्धारण गर्नेछ । तीनै समूहमा तेस्रो स्थानमा रहने तीन टिममध्ये दुईले अन्तिम आठको यात्रा तय गर्नेछ ।

जापान र इक्वेडरको खेलअगाडि नै पेरुले अगाडि खेल्ने निश्चित भएको हो । अर्जेन्टिनी प्रशिक्षक लियोनल स्कालोनीले जित्नैपर्ने खेलमा म्यानचेस्टर सिटीका फरवार्ड अगुइरो र मार्टिनेजमाथि विश्वास गरे ।

मार्टिनेजले एन्जेल डी मारियाको स्थानमा खेल्न पाएका हुन् । ‘अहिले तत्काल सबैभन्दा महत्त्वपूर्ण उपलब्धि हामी क्वाटरफाइनल पुग्यौं,’ मेसीले भने, ‘अब हामीले कस्तो खेल्ने हो, त्यसअनुसार रणनीति बनाएर अगाडि बढ्नु पर्छ । हाम्रो वास्तविक यात्रा अब सुरु हुनेछ ।’

कन्काकाफ
चार्ललोटे– मेक्सिकोले मार्टिनिकलाई ३–२ ले हराएर आइतबार कन्काकाफ गोल्डकपको क्वाटरफाइनल यात्रा तय गरेको छ । समूह ‘ए’ मा मेक्सिको यो जितपछि क्यानडालाई उछिनेर विजेता पनि बन्यो । यस्तै अर्को खेलमा क्यानडाले खराब प्रदर्शन गरिरहेको क्युवालाई सजिलै ७–० ले हरायो । त्यसमा लुकास कभालिनीले ह्याट्रिक गरे । मेक्सिकोले सबै तीन खेल जितेर ९ अंक बटुल्यो भने क्यानडा दुई जितबाट ६ अंकसहित दोस्रो स्थानमा रह्यो ।

अफ्रिकी नेसन्स कप
कायरो– अफ्रिकी कप अफ नेसन्सको समूह ‘सी’ मा सेनेगलले आइतबार तान्जानियालाई २–० ले हरायो । समूहको अर्को खेलमा अल्जेरियाले केन्यामाथि २–० को जित दर्ता गर्‍यो । समूह ‘डी’ मा भने मोरक्कोले नामिबियालाई १–० ले पन्छायो ।

महिला विश्वकप
पेरिस– आयोजक फ्रान्स र इंग्ल्यान्डले महिला विश्वकपमा आइतबार राति क्वाटरफाइनल यात्रा तय गरेका छन् । फ्रान्सले अतिरिक्त समयको खेलपछि ब्राजिललाई २–१ ले हरायो । अमाडिन हेनरीले फ्रान्सका लागि १ सय ६ औं मिनेटमा निर्णायक गोल गरिन् । इंग्ल्यान्डले भने क्यामरुनलाई सजिलै ३–० ले हराए । त्यसमा स्टेफ हउटन, एलेना हाइट र एलेक्स ग्रिनउडले गोल गरेका थिए ।

प्रकाशित : असार १०, २०७६ ०८:०४
प्रतिक्रिया
पठाउनुहोस्
ADVERTISEMENT

'ठूला पूर्वाधारमा सरकार केन्द्रित’

कान्तिपुर संवाददाता

काठमाडौँ — सातदोबाटोस्थित अन्तर्राष्ट्रिय खेलकुद परिसरभित्र निर्मित अडिटोरियम हलको सोमबार उद्घाटन गरिएको छ । आर्थिक वर्ष २०७३/०७४ मा हल निर्माण सुरु गरिएको थियो । करिब २ करोड १५ लाख लागतमा निर्माण गरिएको हल २ सय जना अटाउने क्षमताको छ ।

युवा तथा खेलकुदमन्त्री जगतबहादुर सुनारले सोमबार हलको उद्घाटन गरे । सोही हलमा आठौं राष्ट्रिय खेलकुदको समीक्षा तथा १३ औं दक्षिण एसियाली खेलकुद (साग) को तयारीबारे छलफल कार्यक्रम भएको थियो । मन्त्री विश्वकर्माले समग्रमा आठौं राष्ट्रिय खेलकुद सफलतापूर्वक सम्पन्न भएको बताए । उनले खेलकुदमा ठूला पूर्वाधार बनाउन सरकार केन्द्रित रहेको र साग समयमै आयोजना गरिने प्रतिवद्धता जनाए ।

राष्ट्रिय खेलकुद परिषद् (राखेप) का सदस्य–सचिव केशवकुमार विष्टले आठौं राष्ट्रिय खेलकुद भव्यसँगै सम्पन्न भएसँगै १३औं सागलाई अर्जुनदृष्टि बनाएर अगाडि बढ्नुपर्ने आवश्यकता औल्याए ।

राखेपका उपाध्यक्ष पिताम्बर तिम्सिनाले आठौं राष्ट्रिय खेलकुदले खेलाडीमा उर्जा ल्याएको सुनाए । खेलकुद सचिव कृष्णप्रसाद देवकोटाले सबैको सहयोगले गर्दा आठौं राष्ट्रिय खेलकुद सम्भव भएको बताउँदै राष्ट्रको प्रतिष्ठासँगै जोडिएको साग निर्धारित समयमै आयोजना हुनुपर्नेमा जोड दिए ।

विभिन्न राष्ट्रिय खेल संघका पदाधिकारीले आठौं र सागका विषयमा आ–आफ्नो धारणासहित सुझाव दिए । १३ औं साग सचिवालयका प्रमुख कमल खनालले हालसम्म भएका सागको तयारीका विषयमा जानकारी गराए भने आठौं राष्ट्रिय खेलकुद सचिवालय प्रमुख इन्द्र कार्कीले आठौं राष्ट्रिय खेलकुदको प्रतिवेदन प्रस्तुत गरेका थिए । सदस्यसचिव विष्टको चारवर्षे कार्यकालमा आधारित यात्रा पुस्तक विमोचन गरियो । विष्टको कार्यकाल मंगलबार सकिँदै छ ।

प्रकाशित : असार १०, २०७६ ०८:०२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT