साम्बाको चर्चा

कान्तिपुर संवाददाता

काठमाडौँ — नेपाली महिला फुटबलले पाएको अब्बल दर्जाकी खेलाडी हुन् सावित्रा भण्डारी । ब्राजिली फुटबलको प्रशंसक भएकाले उनले आफूलाई ‘साम्बा’ भन्न रुचाउँछिन् । साम्बा चर्चित खेलाडीमात्रै होइनन्, सफल र क्षमतावान खेलाडी हुन् भन्ने प्रमाण उनले पछिल्ला प्रदर्शनहरूबाट प्रस्ट्याइसकेकी छन् ।

घरेलु फुटबलमा एपीएफबाट खेल्दा होस अथवा नेपालको राष्ट्रिय टिमबाटै, खेलाडीको एक हुलबाट उनी ठ्याक्कै फरक देखिन्छिन्, अरूभन्दा तीव्र, चुस्त र स्तरीय । यसैमा टिकेर उनी वर्ष २०७५ मा लगातार चर्चामा पनि रहिन् । चर्चा त कतिसम्म भने उनको जत्तिको लोकप्रियता त अहिलेको पुरुष खेलाडीले पनि विरलै मात्र पाएका छन् होला ।

यस्तोमा उनी पल्सर स्पोर्ट्स अवार्डको पिपुल्स च्वाइस अवार्डको मनोनयनमा परेकी छन् । मतका आधारमा छिनोफानो हुने यो विधामा उनीसँगै पाँच प्रत्याशी छन् । सामाजिक सञ्जाल फेसबुक र एसएमएसको मार्फत आएको मतसँगै राष्ट्रिय खेल संघका मुख्य प्रशिक्षक र आयोजक मञ्चका सदस्यले दिएको मतले विजेताको निर्णय हुनेछ ।

यो अवार्डका लागि निकै बलिया प्रत्याशी हुन् उनी । लगभग पाँच वर्ष अगाडिसम्म उनी गुमनाम जस्तै थिइन् । लमजुङको पाच्चोक स्कुलको मैदानमै सीमित उनको प्रतिभा त्यति बेला फल्ने र फुल्ने अवसर पायो, जति बेला उनी नेपाल एपीएफ क्लबसँग आबद्ध भइन् । लमजुङ छँदाका दिन सम्झना अहिले त्यो सबै कथाजस्तो हुन सक्छ, अरू महिला खेलाडी नै नभएको, पुरुष खेलाडीसँग खेल्न बाध्य, आदि आदि ।

वर्ष २०७५ मा सावित्राकै गतिलो योगदानका कारण नेपाल भारतमा भएको हिरो गोल्डकपको फाइनलसम्म पुग्यो । त्यसै क्रममा नेपालले पहिलोपल्ट भारतलाई हरायो । विराटनगरमा भएको वुमेन्स साफ च्याम्पियनसिपमा नेपाल फेरि एकपल्ट फाइनलमा भारतसँग पराजित रह्यो, तर उनी सर्वाधिक गोल गर्ने खेलाडी सूचीको शीर्ष स्थानमै छिन् ।

एपीएफले नै वर्ष २०७५ मा लिग जित्दा उनी सर्वाधिक गोलकर्ता मात्र भइनन्, उत्कृष्ट खेलाडी पनि रहिन् । नेपालले पहिलोपल्ट ओलम्पिक छनोटको दोस्रो चरण तय गर्दा पनि सावित्राको भूमिका कम थिएन ।

प्रकाशित : असार ३, २०७६ ०८:०४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

क्रिकेटमा जम्दै सप्तरी

६ महिनाभरि प्रतियोगितै–प्रतियोगिता
अवधेशकुमार झा

राजविराज — कुनै बेला नेपाली राष्ट्रिय क्रिकेट टोलीका महत्त्वपूर्ण खेलाडीहरू सप्तरीका हुन्थे । पछिल्लो केही वर्ष त्यो क्रम न्यून भयो । फेरि एकपटक सप्तरी जिल्लामा क्रिकेट प्रतियोगिताहरूका कारण नयाँ खेलाडी उत्पादनको आस बढेको छ ।

पछिल्लो ६ महिनामा क्रिकेट संघसँगको समन्वयमा मात्र विभिन्न स्तरीय प्रतियोगिताहरू भएका छन् । स्थानीय क्लब र संघसंस्थाको आयोजनामा अन्य धेरै प्रतियोगिताहरू भएका छन् ।

महबुब आलमजस्ता कीर्तिमानी खेलाडीसहित दीपेन्द्र चौधरी, सन्दीप श्रेष्ठ लगायतका एक समय राष्ट्रिय टोलीका महत्त्वपूर्ण हिस्सा सप्तरीकै हुन् । सप्तरीबाटै शैलेन्द्र खडका, पवन दास, राजन खडगी, रोहन विक, प्रशान्त सिंह, अमित यादव लगायतका थुप्रै खेलाडी राष्ट्रियस्तरमा आफ्नो कौशल देखाइसकेका छन् ।

क्रिकेटको उर्वर भूमि मानिएको सप्तरीमा पछिल्लो १० वर्ष निक्कै कमजोर रह्यो । लगानीको अभावमा स्तरीय प्रतियोगिता हुन नसक्नुका कारण सप्तरीबाट खेलाडी उत्पादनको क्रम रोकिन नै पुग्यो । यसका साथै स्तरीय खेलमैदानको अभाव पनि क्रिकेट खेलाडीहरूका लागि प्रतिकूल स्थिति बन्नुको कारण बन्यो ।

पछिल्लो समय स्थानीय सरकारले क्रिकेटको विकासमा लगानी गर्न सुरु गरेपछि जिल्लामा फेरि एक पटक क्रिकेटप्रतिको जागरण सुरु भएको छ । राजविराज नगरपालिका तथा अन्य विभिन्न स्थानीय तहको सहयोगमा सोमबारदेखि सप्तरीको राजविराजस्थित पविमाविको मैदानमा दोसो मेयर कप सप्तरी प्रिमियर लिग क्रिकेट सुरु भएको छ । महबुब, मन्जित श्रेष्ठ लगायतका कयौं राष्ट्रिय र अन्तर्राष्ट्रिय एवं जिल्ला स्तरीय क्रिकेट खेलाडीहरू अक्सनबाट छनोट भई विभिन्न स्थानीय टोलीबाट मैदानमा उत्रिएका छन् । प्रतियोगिताको राजविराज नगरपालिकाका मेयर शम्भुप्रसाद यादवले उद्घाटन गरे ।

पविमाविकै खेल मैदानमा शनिबार मात्र अन्तरविद्यालय स्तरीय क्रिकेट प्रतियोगिता सम्पन्न भएको थियो । उक्त प्रतियोगिताको उपाधि राजविराजस्थित दुर्गा सेकेन्ड्री स्कुलले हात पारेको थियो । पुसमा तिलाठी कोइलाडी गाउँपालिकाका हरेक वडामा वडास्तरीय क्रिकेट प्रतियोगिताहरू भएको थियो भने माघमा तिलाडी कोइलाडी गाउँपालिकाको सहयोगमा गजेन्द्रनारायण सिंह स्मृति जिल्लास्तरीय क्रिकेट प्रतियोगिता भएको थियो ।

यसका अतिरिक्त प्रदेश नम्बर २ स्तरीय छनोट प्रतियोगिता पनि राजविराजमा केही दिनअघि सम्पन्न भएको थियो । जसमा प्रदेशका आठवटै जिल्लाले सहभागिता जनाएको थियो । यस्तै राजविराजमै पनि वडा नम्बर ५ को आयोजनामा वडा स्तरीय र डाकनेश्वरी नगरपालिकामा नगरस्तरीय क्रिकेट प्रतियोगिताहरू सम्पन्न भएका छन् । यसका अतिरिक्त विभिन्न संघसंस्था र क्लबहरूको आयोजनामा पनि जिल्लाका विभिन्न स्थानमा क्रिकेट प्रतियोगिताहरू पछिल्लो ६ महिनामा भएका छन् ।

क्रिकेटमा सप्तरीको गौरवपूर्ण इतिहास र आसलाग्दो वर्तमानसँगै उज्ज्वल भविष्य भए पनि मैदानको अभावमा जिल्लामा खेल फस्टाउन नसकेको जिल्ला क्रिकेट संघ सप्तरीका सचिव चन्दनकुमार यादवको भनाइ छ । संघका सप्तरी अध्यक्ष आयुष श्रेष्ठले केही समययता निराशाझैं भएको सप्तरीमा पछिल्लो समय स्थानीय सरकारहरूले लगानी गर्न थालेपछि क्रिकेट खेलका गतिविधि बढ्नुका साथै नयाँ खेलाडी उत्पादनमा समेत सहयोग पुगेको बताए ।

उनले पनि खेल मैदानको अभावमा समस्या भइरहेको दुखेसो पोखे । राजविराजमा रहेको राजरंगशाला खेल्नका लागि उपयुक्त अवस्थामा नरहेको तथा अन्य खेल मैदानहरूको अवस्था पनि उस्तै रहेकाले स्तरीय प्रतियोगिता र खेलाडीहरूलाई नियमित अभ्यासका लागि समस्या हुने गरेको अध्यक्ष श्रेष्ठले बताए ।

तिलाठी कोइलाडी गाउँपालिकाका अध्यक्ष सतिशकुमार सिंहले क्रिकेट सँगै अन्य खेलको विकासका लागि गाउँपालिकाबाट आवश्यक बजेट विनियोजन गरिरहेको बताए । ‘मानव जीवनमा खेलकुदको पनि महत्त्वपूर्ण स्थान छ,’ अध्यक्ष सिंहले भने, ‘कुलतमा लागेका युवाहरूलाई पनि खेलका माध्यमबाट सामान्य जीवनमा फर्काउन सक्ने भएकाले खेलकुद क्षेत्रको विकासलाई हामीले उच्च प्राथमिकतामा राखेका छौं ।’

अन्तर्राष्ट्रियस्तरको रंगशाला बन्ने
राजविराज नगरपालिकाले राजविराजस्थित पविमाविको खेल मैदानलाई अन्तर्राष्ट्रियस्तरको क्रिकेट खेलमैदानका रूपमा निर्माण गर्ने गरी सम्भाव्यता अध्ययन सुरु गरेको छ ।

‘खेलमैदानको चौतर्फी अतिक्रमित जग्गालाई फुकाएर अन्तर्राष्ट्रियस्तरको क्रिकेट मैदान निर्माणका बारेमा हामीले सम्भाव्यता अध्ययन गरिरहेका छौं,’ राजविराज नगरपालिकाका मेयर शम्भुप्रसाद यादवले भने, ‘जग्गाको व्यवस्थापन मिलाइसकेपछि डीपीआर निर्माण गरेर प्रदेश र केन्द्र सरकार तथा विभिन्न संघ संस्थाको सहयोगमा अन्तर्राष्ट्रिय खेलमैदान निर्माणको कार्यलाई अगाडि बढाउन प्रतिबद्ध छौं ।’

प्रकाशित : असार ३, २०७६ ०८:०२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT