घरेलु कोर्टबाट आर्मीको पुनरागमन

कुशल तिमल्सिना

काठमाडौँ — घरेलु भलिबलको महारथी टोली हो त्रिभुवन आर्मी क्लब । लगातार ५ प्रतियोगिताको फाइनलमा पुगेर पनि उपाधिबाट वञ्चित रहेको यो टोलीले सोमबार उपाधि खडेरी टारेको छ । गण्डकी प्रदेश टोलीविरुद्ध सानदार पुनरागमनसहित ३–१ को सेटमा जित हासिल गरी आर्मी लगातार चौथोपल्ट प्रधानसेनापति राष्ट्रिय भलिबल च्याम्पियन बनेको हो । 

प्रधानसेनापति कप राष्ट्रिय भलिबल च्याम्पियन त्रिभुवन आर्मीका खेलाडी उपाधिसाथ । आर्मीले सोमबार गण्डकी प्रदेशलाई ३–१ सेटले हराएको थियो । तस्बिर : हेमन्त श्रेष्ठ/कान्तिपुर

अधिकांश राष्ट्रिय टोलीका खेलाडीले भरिए पनि आर्मीले पछिल्ला केही महिना अपेक्षाकृत प्रदर्शन गर्न नसकेकोमा आलोचना त भएकै थियो । खेलाडीहरू पनि उत्तिकै दबाबमा थिए । गण्डकीविरुद्ध आफ्नै कोर्टमा उल्लेख्य घरेलु समर्थकमाझ पहिलो सेटमा अप्रत्यासित पछाडि परेको आर्मीले बाँकी तीन सेटमा उत्कृष्ट प्रदर्शन गर्‍यो ।

डेढ वर्षअघि आर्मीको मुख्य प्रशिक्षक रहेका कपिलकिशोर श्रेष्ठ छैटौं प्रयासमा पहिलो उपाधि जितेपछि खुसी देखिए । ‘पहिलो सेटमा हामी आफ्नै कारणले हारेका थियौं, प्रधानसेनापतिसामु यति धेरै दर्शकबीच खेलाडीहरू आत्तिए जस्तो लाग्यो, बाँकी सेटमा हामीले विपक्षीलाई हाम्रो कमजोरीमा खेल्ने मौका दिएनौं,’ प्रशिक्षक श्रेष्ठले भने ।

‘लगातारको हारपछि हामी राम्रो अवसरको खोजीमा थियौं । मुख्यगरी प्रशिक्षणका क्रममा हामीले सर्भिस रिसिभमा मुख्य सुधार प्रयास गरेका थियौं, प्रतियोगिताभर हाम्रा खेलाडीले रिसिभमा धेरै सुधार गरे,’ उत्कृष्ट प्रशिक्षक चुनिएका श्रेष्ठले थपे, ‘विशेष गरी सेमिफाइनल र फाइनलमा हाम्रा खेलाडीले फाइटिङ स्पिरिट देखाए ।’ पुलिसविरुद्ध सेमिफाइनलमा पनि आर्मीले पहिलो सेट गुमाएर बाँकी तीन सेटमा सफलता पाएको थियो ।

२०७५ पुस तेस्रो साता इटहरीमा भएको सभामुख कप राष्ट्रिय भलिबलमा नेपाल पुलिस क्लबसँग पराजित भएयता लगातार ५ प्रतियोगितामा आर्मीको बाटो पुलिसले रोक्दै आएको थियो । त्यसपछि चितवनमा भएका दुई प्रतियोगिता, बाँकेमा भएको आठौं राष्ट्रिय खेलकुद र ताप्लेजुङमा वैशाख अन्तिम साता सम्पन्न पाथीभरा कप भलिबलको फाइनलमा आर्मी पराजित भएको थियो ।

निर्णायक खेलमा उत्कृष्ट प्रदर्शन गरेको भन्दै प्रशिक्षकले आफ्ना मुख्य स्पाइकर मानबहादुर श्रेष्ठको प्रशंसा गरे । ‘सेमिफाइनल र फाइनलमा उसको (मानबहादुर) प्रदर्शन निर्णायक थियो । मेरो विचारमा उसलाई छिट्टै राष्ट्रिय टोलीमा बोलाइनेछ,’ उनले भने । आठौं राष्ट्रिय खेलकुदमा आर्मीको टिममा खबरै नगरी जापानमा भलिबल खेल्न गएका कारण नेपाल भलिबल संघले सार्वजनिक गरेको राष्ट्रिय खेलाडीको प्रारम्भिक सूचीमा उनको नाम थिएन । संघले आठौंको प्रदर्शनका आधारमा खेलाडी छनोट गरिएकाले प्रतियोगिता नखेल्ने खेलाडी समावेश नभएको बताएको थियो ।

सोमबार अपराह्न लगनखेलस्थित सैनिक शारीरिक सुगठन तथा तालिम केन्द्रको कभर्डहलमा पहिलो सेटमा आर्मी त्यति कमजोर देखिएला भन्ने सायदैले सोचेका थिए । १६–२५ ले हारेको त्यस सेटमा आर्मीले कुनै पनि समयमा अग्रता बनाउन सकेन । गण्डकीले सेट एकतर्फी बनायो । दोस्रो सेट भने ठीक उल्टो भयो । गण्डकीको ३–२ को सुरुआती अग्रता उल्टाउँदै आर्मीर् लगातार ११ अंक जोडेर १५–६ को सहज अवस्थामा पुग्यो । त्यसपछि आर्मीले २५ अंक पुर्‍याउँदा गण्डकीले २ अंकमात्र थप्न सक्यो ।

तेस्रो सेटमा सुरुदेखि नै अग्रता बनाएको आर्मीले कुनै पनि समय गण्डकीलाई खेलमा फर्कन दिएन । लगातार अंक जोडेर त्यस सेटमा २५–१० को जित हासिल गरेपछि दबाबमुक्त देखिएको आर्मीलाई चौथो सेटको सुरुआती समयमा गण्डकीले पुनः दबाब बढायो । ४–० ले पछि परेपछि आर्मीका प्रशिक्षक श्रेष्ठले टाइमआउट लिए ।त्यसपछि पनि आर्मीले आवश्यक अंक जोड्न सकिरहेको थिएन ।

गण्डकीले ९–५ को अग्रता बनायो । त्यसपछि लय समातेको आर्मीले १७ अंक जोड्दा गण्डकीलाई १२ अंकमै रोक्यो । निर्णायक सेटमा ५ अंकले पछि परेपछि गण्डकीको निराशा बढ्दा आर्मीले २५–१५ ले सेट जित्दै उपाधिसहित ३ लाख रुपैयाँ पुरस्कार पायो । प्रधानसेनापति भलिबलमा चार संस्करण सम्पन्न भयो । अहिलेसम्म अन्य टोलीले उपाधि जितेका छैनन् ।

‘स्पाइकमा हामी विभागीय टोलीभन्दा कम छैनौं तर रक्षात्मक खेलमा सुधार गर्न नसक्दा हारियो । सर्भिस, रिसिभ, ब्लक सबैमा चुक्यौं, आजको हारको कारण पनि त्यही हो,’ गण्डकीका प्रशिक्षक राजकुमार गुरुङले खेलपछि भने, ‘१२ महिना प्रशिक्षण गर्ने उनीहरू (विभागीय टिम) लाई चुनौती दिनु नै हाम्रा लागि ठूलो कुरा हो, हामीले त खेलाडी संकलन गरेर ल्याएका थियौं । लगातार दोस्रोपल्ट प्रतियोगिताको फाइनल खेल्दा हामीलाई गर्व लागेको छ, म खेलाडीको प्रदर्शनमा पूर्ण सन्तुष्ट छु ।’

सेमिफाइनलमा गण्डकीले उपाधि दाबेदार एपीएफलाई ३–१ को सेटमा हराएको थियो । उनले अर्को संस्करणमा सहभागी हुनुअघि २–३ महिनाको प्रदर्शनको प्रयास गरिने योजना सुनाए । उपविजेता गण्डकीले १ लाख ५० हजार रूपैयाँ पुरस्कार पायो । एपीएफलाई हराएर तेस्रो भएको नेपाल पुलिसले ७५ हजार रुपैयाँमा चित्त बुझायो ।

आर्मीका भैरव बम उत्कृष्ट खेलाडी बने । उनले बजाज पल्सर मोटरसाइकल पुरस्कार पाए । विधागततर्फ आर्मीका तीन खेलाडी उत्कृष्ट बने । लिफ्टरमा दुर्गाप्रसाद महतो, डिफेन्डरमा ईश्वर थापा र ब्लकरमा हरि अधिकारी उत्कृष्ट चुनिए । पुलिसका कुलबहादुर थापा उत्कृष्ट सर्भर, गण्डकीका याम क्षेत्री उत्कृष्ट स्पाइकर तथा आर्मीका प्रशिक्षक श्रेष्ठ उत्कृष्ट बने । उनीहरूले जनही १० हजार रुपैयाँ पुरस्कार पाए ।

प्रकाशित : जेष्ठ २८, २०७६ ०७:४६
प्रतिक्रिया
पठाउनुहोस्

महेश्वरको मिहिनेत

कान्तिपुर संवाददाता

काठमाडौँ — वर्ष २०७५ नेपाली शारीरिक सुगठन खेलका लागि स्वर्णिम बन्यो । थाइल्यान्डमा सम्पन्न विश्व शारीरिक सुगठन तथा फिजिक्स च्याम्पियनसिपमा महेश्वर महर्जनले स्वर्ण पदक जिते । उनले जितेको स्वर्ण नेपाली शारीरिक सुगठनले विश्वस्तरको जितेको पहिलो स्वर्ण पदक थियो । उनी ७५ केजी तौल समूह विजेता भएका हुन् । 

बडीबिल्डर महेश्वर महर्जन । फाइल तस्बिर 

च्याङमाइमा पाएको त्यो सफलतापछि उनी एकाएक चर्चामा आए । धेरैलाई कौतुलहता लाग्यो । स्वर्णधारी महेश्वर को हो त ? चर्चामा उनी मात्र रहेनन्, यो खेल नै एउटा आकर्षणको केन्द्र भयो । वर्ष २०७५ मा नेपाली खेलकुदबारे चर्चा गर्दा महेश्वरलाई छुटाउन मिल्दैन ।

त्यसैले त १६ औं एनएसजेएफ पल्सर स्पोर्ट्स अवार्डको पिपल्स च्वाइस विधाको मनोनयनमा परेका छन् यी खेलाडी । यो विधामा फुटबल र क्रिकेटको बढी वर्चस्व हुने गर्छ । शारीरिक सुगठनका खेलाडी यो विधाको मनोनयनमा पर्नु दुर्लभ जस्तै हो । त्यसैले महेश्वर आफैं खुसी छन् । उनी मान्छन्, मनोनयनमा पर्नु नै जितेबराबर हो ।

शरीर चिटिक्क बनाउने रहर कसको मात्र हुन्न ? धेरै यही लोभले कुनै न कुनै दिन जिमखाना छिरेकै हुन्छन् । त्यही बेला थाहा हुने हो, ‘बडीबिल्डिङ’ को यो रहर सजिलो भने छैन । अझ शारीरिक सुगठनकै खेलाडी हुने हो भने त मिहिनेत दह्रो चाहिन्छ । त्यसका लागि ठूलै त्याग र तपस्या पनि । महेश्वर त्यही ठान्छन् ।

धेरै वर्षअगाडि उनको शरीर मसिनो थियो । त्यसैले अरू जस्तै घर नजिकको जिमखाना छिरे । त्यो स्कुल जाँदाको समय हो । अहिले उनको आफ्नै जिमखाना छ । त्यही जिमखानाबाट अहिले कसरतपछि बाहिर निस्कनुपर्छ । उनको शरीर देखेर लोभ लाग्छ । लोभ मात्र के र ? त्यही शरीरले नेपाललाई ऐतिहासिक सफलता पनि दिलाएको छ, त्यो वर्ल्ड च्याम्पिनयसिपमै ।

नेपाली खेलकुदमा नजिकका धेरैले गत वर्ष सामाजिक सञ्चालमा कोही एक खेलाडीको धेरै चर्चा गरे भने त्यसमा पक्कै पर्नेछन् यिनै महेश्वर । ३५ वर्षे उनी यत्तिकै रोकिने पक्षमा पनि छैनन् । उत्तिकै दत्तचित्त भएर यस प्रतिष्ठित अवार्ड जित्न लागिपरेका छन् । भन्छन्, ‘यो नेपाली खेलकुदको सबैभन्दा ठूलो अवार्ड हो ।’

पल्सर स्पोर्टस अवार्डको यो विधामा पाँच प्रत्याशी छन् । त्यसको निर्णय हुनेछ मतका आधारमा । सामाजिक सञ्जाल फेसबुक र एसएमएसमार्फत आएको मतसँगै राष्ट्रिय खेल संघका मुख्य प्रशिक्षक र आयोजक मञ्चका सदस्यले दिएको मतले निर्णायक हुनेछ विजेता बन्न ।

‘यो विधामा धेरै प्रतिस्पर्धा छ,’ उनी मान्छन् । यस्तै चर्को प्रतिस्पर्धा थाइल्यान्डमा भएको थियो । सन् १९९७ बाट व्यावसायिक रूपमा यो खेलमा ओर्लिएका महेश्वरले ६ वर्षपछि धर्मश्रीमा पहिलोपल्ट भाग लिए । त्यसअघि भुटानमा भएको ५० औं एसियाली बडीविल्डिङ च्याम्पियसिपमा पनि स्वर्ण जितेका महेश्वरले धर्मश्री कै १३ औं संस्करण पनि जितेका थिए । उनले त्यति बेलै ७५ केजी तौल समूहमा स्वर्ण जितेका थिए ।

भित्री काठमाडौंका रैथाने महेश्वर युवापुस्ताका प्रतिनिधिपात्र हुन् । केही वर्षअघि उनी पनि विदेशतिर लागेका थिए । तर नेपाल नै फर्के । यो भने उनको प्रशंसायोग्य काम भयो र केही साथीसँग मिलेर जिम सेन्टर खोले । अहिले उनी मिस्टर युनिभर्सलमा भाग लिन धुमधामले तयारी गरिरहेका छन् । अब यो तयारीमा जोडिएको छ, पिपल्स च्वाइस अवार्ड जित्ने धुन पनि । आफ्नो शरीर बनाउन दिनरात एक गरिरहेका महेश्वर चाहन्छन्, ‘यो अवार्ड जितौं र युनिभर्सल तयारी पनि ।’

प्रकाशित : जेष्ठ २८, २०७६ ०७:४४
पूरा पढ्नुहोस्
प्रतिक्रिया
पठाउनुहोस्