दुर्गाले जिते रारा ट्रेल

राजबहादुर शाही

रारा, मुगु — कर्णालीको प्रमुख पर्यटकीय गन्तव्य रारामा आयोजित प्रथम ट्रेल रनको उपाधि जुम्लाका २८ वर्षीय धावक दुर्गाबहादुर बुढाले जितेका छन् ।

मुगुको रारामा बुधबार आयोजित पहिलो रारा ट्रेल रनका प्रतिस्पर्धी दौड्दै । पुरस्कृत भएपछि विजेता खेलाडी । तस्बिर : राजबहादुर/कान्तिपुर

नेपाली सेनाले आयोजना गरेको प्रतियोगितामा दुर्गाले निर्धारित दुरी ५५ मिनेट ३८ सेकेन्डमा पार गरे । उनले १ लाख रुपैयाँ पुरस्कार हात पारे । दुर्गाले आठौं राष्ट्रिय खेलकुदमा स्वर्णसहित तीन पदक जितेका थिए ।

जुम्लाकै २७ वर्षीय धीरबहादुर बुढा दोस्रो भए । उनले ५९ मिनेट १६ सेकेन्डमा पार गरे । ६० मिनेट २० सेकेन्डमा दुरी पार गरी सेनाका नवराज सावत तेस्रो भए । दोस्रोले ६० हजार र तेस्रोले ४० हजार रुपैयाँ पुरस्कार पाए । सेनाका भीम गुरुङले चौथो स्थान हासिल गरी २० हजार र जुम्लाका प्रकाश कठायतले पाँचौं स्थान हासिल गरी १० हजार रुपैयाँ जिते ।

रारा ट्रेल रनको उपाधि जित्ने दुर्गा जुम्लाको कनकासुन्दरी गाउँपालिका–३ का हुन् । भारतीय सेनाको जागिर छाडेर उनी दौडमै होमिएका छन् । १३ वर्षको उमेरदेखि दौडै आएको उनले स्मरण गराए । उनले कर्णाली स्पोर्टस क्लबमार्फत खेल्दै आइरहेका छन् ।
राराको पर्यटन प्रवर्द्धनका लागि प्रतियोगिता गरिएको नेपाली सेनाले जनाएको छ ।

ट्रेल रनमा कर्णाली प्रदेशका विभिन्न जिल्लाका साथै सेना, प्रहरी र सशस्त्र प्रहरीका खेलाडीले सहभागिता जनाएका थिए । श्रीदल गुल्मका अनुसार प्रतियोगितामा १ सय ३० खेलाडी सहभागी थिए । पहिलोपल्ट आयोजित प्रतियोगिता भव्य रूपमा सफल भएको श्रीदल गुल्मका गुल्मपति सेनानी रवि केसीले बताए ।

प्रतियोगिताको उद्घाटन उत्तर–पश्चिम पृतनाका उपरथी सरोजप्रताप राणाले गरेका थिए । दौडलाई प्रत्येक वर्ष निरन्तरता दिँदै जाने राणाले बताए । उनले प्रतियोगितामार्फत राराको पर्यटन प्रर्वद्धनमा सहयोग पुर्‍याउने विश्वास व्यक्त गरे । राराको पर्यटन विकासलाई माथि उठाउन खेल गतिविधि बढाउँदै लैजानुपर्ने प्रमुख जिल्ला अधिकारी जयकुमार घिमिरेले बताए ।

प्रकाशित : जेष्ठ ९, २०७६ ०७:५२
प्रतिक्रिया
पठाउनुहोस्

सगरमाथा युथ च्याम्पियन

रमेशचन्द्र अधिकारी

धनकुटा — सगरमाथा युथ क्लब मोरङले नवौं अग्नि बसुन्धरा स्मृति टुबोर्ग रारा गोल्डकप फुटबलको उपाधि जितेको छ । चौबिसे गाउँपालिकाको राजारानीमा जारी प्रतियोगिताको फाइनलमा सगरमाथाले चर्च ब्वाइज क्लब काठमाडौंलाई २–० ले पराजित गरेको हो ।

सगरमाथाले उपाधिमा ह्याटिक गरेको छ । सगरमाथाले २ लाख र उपविजेता चर्च ब्वाइजले १ लाख रुपैयाँ पुरस्कार पाए ।

पहिलो हाफ गोलरहित रहेकोमा दोस्रो हाफको अन्तिम समयमा लगातार गोल गर्दै सगरमाथा विजयी भएको हो । सगरमाथाका मनोज राईले ७२ औं र भुवन बस्नेतले ७९ औं मिनेटमा गोल गरे । मनोजले पोस्टको देब्रे कुनाबाट प्रहार गरेको बल जालीको सम्पर्कमा पुगेको थियो । लगत्तै चर्च ब्वाइजका गोलकिपर किशोर गिरी पोस्टभन्दा अगााडि बढेको फाइदा उठाउँदै भुवन खाली पोस्टमा गोल गर्न सफल भए ।

चर्च ब्वाइजका निकेश लिम्बुले पहिलो हाफमा प्रहार गरेको बल बारमा लागेर फर्कियो । छिरिङ गुरुङले दोस्रो हाफको सुरुमा पोस्ट नजिकैबाट प्रहार गरेको बल बाहिरियो । निशान लिम्बुले प्रहार पनि सफल हुन सकेन । सगरमाथाका विष्णु सुनुवार, सुशील राई, भुवन बस्नेतले प्रहार विपक्षी गोलकिपरले बचाए ।

सर्वोकृष्ट खेलाडी सगरमाथाका विष्णु सुनुवार भए । उनले २० हजार रुपैयाँ पाए । राइर्जिङ प्लेयर आयोजक रारा फुटबल क्लबका नरेन्द्र बिक, सर्वाधिक गोलकर्ता दाउफिन्सका पेटेंगा, उत्कृष्ट प्रशिक्षक सगरमाथाका रवि गुरुङ, उत्कृष्ट फरवार्ड सगरमाथाका भुवन गुरुङ, उत्कृष्ट डिफेन्डर चर्चका छिरिङ गुरुङ, उत्कृष्ट गोलरक्षक सगरमाथाका पूर्ण चेम्जोङ र म्यान अफ द फाइनल सगरमाथाका मनोज राईघोषित भए ।

सेमिफाइनलमा चर्च ब्वाइजले क्यामरुनी क्लब दाउफिन्स र सगरमाथा युथले विभागीय टोली एपीएफलाई हराउँदै फाइनल तय गरका थिए ।विजेतालाई पूर्वमन्त्री सुनीलबहादुर थापालगायतले पुरस्कृत गरे ।

प्रकाशित : जेष्ठ ९, २०७६ ०७:५१
पूरा पढ्नुहोस्
प्रतिक्रिया
पठाउनुहोस्