नेपालको पदक जित्ने लक्ष्य

राजु घिसिङ

क्वीन्सल्यान्ड, अस्ट्रेलिया — निरन्तर ६ दिन डुंगा खियाउँदै उत्तरी अस्ट्रेलियाको टली नदीमा अभ्यस्त भएको नेपाली राष्ट्रिय र्‍याफ्टिङ टिमले १८ औं विश्व र्‍याफ्टिङ च्याम्पियनसिपमा बिहीबारदेखि आफ्नो चुनौती पेस गर्दै छ । पुरुषतर्फ खुला स्पर्धामा सहभागी नेपाली टिमले पहिलो दिन स्प्रिन्टमा आफ्नो क्ष्ँमताको जाँच गर्नेछ ।

पछिल्ला दुई दिन भारी वर्षाबीच अभ्यास गरेको नेपाली टिमका कप्तान सुरज गुरुङले बुधबार भने, ‘हामीले र्‍यापिड ग्रेड (छालको मापन) ४ भएका नदी मस्र्याङदी, सेती र त्रिशूलीमा दुई महिना अभ्यास गरेका थियौं । टलीको र्‍यापिड ग्रेड पनि ४ नै हो । बढी ढुंगा भएकाले टली अलि कठिन (ट्रिकी) छ । नत्र यहाँ र नेपालमा गरेको प्रशिक्ष्ँणमा खासै भिन्नता छैन । स्वदेशका नदीमा अभ्यास गरिएको रणनीति नै यहाँ (टली) काम लाग्छ । त्यसैले उत्कृष्ट प्रदर्शन गर्ने आस गरेका छौं ।’

च्याम्पियनसिप आयोजना स्थलको ठीकमाथि विद्युत उत्पादनका लागि बाँध बनाइएको छ । त्यहाँबाट छाड्ने पानीको मात्राले पनि नदीको बहाव र गतिमा फरक पार्नेछ ।

नदीको बीच-बीचमा छांगा धेरै भएकाले पानीको उछाल बढी रहेको खेलाडीले महसुस गरेका छन् । उष्ण वर्षात् हुने वन क्षेत्रमा युनेस्को विश्व सम्पदामा सूचीकृत यस टली उपत्यकामा दुई दिनयता लगातार पानी परिरहेको छ । आर ६ अन्तर्गतको यस विश्व च्याम्पियनसिप सञ्चालन अवधिमा निरन्तर वर्षा हुने मौसम पूर्वानुमानमा देखाइएको छ । यसले प्रदर्शनलाई प्रभावित पार्नेछ ।

पदक जित्ने लक्ष्य
अस्ट्रेलियोको यस जाडोयाममा घुलमिल भइसकेको बताउँदै कप्तान सुरजले भने, ‘प्रतियोगितामा सहभागी हुने सबैको लक्ष्य जित्ने (पदक) नै हुन्छ, हाम्रो लक्ष्य पनि त्यही हो ।’

झन्डै चार महिनाअघि त्रिशूलीमा भएको राष्ट्रिय प्रतियोगितामा च्याम्पियन बनेको नेपाल र्‍याफ्ट एन्ड कायक क्लब फिस्लिङका सुरजसहित शक्तिकुमार गुरुङ, पदमबहादुर गुरुङ, दीपेश गुरुङ, सविन गुरुङ र रबिल मियाँले विश्व च्याम्पियनसिपमा पहिलोपल्ट प्याडल चलाउँदै छन् । त्यो टिमका मिलन गुरुङ जापानतिर लागेपछि वैकल्पिक खेलाडीको स्थान प्याडल नेपालका सुनील गुरुङले लिएका छन् । उनीहरूसँग ६ देखि १२ वर्षसम्म रिभरगाइड काम गरेको अनुभव छ । उनीहरूको टिमवर्क राम्रो रहेको प्रशिक्ष्ँक निमबहादुर मगरले बताए ।

विश्व च्याम्पियनसिपमा स्प्रिन्ट, हेड टु हेड, स्ललोम र डाउन रिभर गरी चार स्पर्धा समावेश छन् । स्प्रिन्टमा १ सय, हेट टु हेडमा २ सय, स्ललोममा ३ सय र डाउन रिभरमा ४ सय गरी कुल १ हजार अंकको प्रतिस्पर्धामा सर्बाधिक अंक जोड्ने टिम नै विश्व विजेता बन्नेछ । नेपाली टिमलाई हेड टु हेड र डाउन भिरमा बलियो मानिन्छ । आर ६ को पछिल्लो विश्व च्याम्पियनसिप (जापान २०१७) मा सेमिफाइनल पुगेको नेपाली टिम स्पिन्टमा ११ औं भएको थियो । उक्त नतिजालाई यसपालि सुधार गर्ने अपेक्षा गरिएको छ ।

सुरज, सविन, पदम, रविलले टलीबाटै अन्तर्राष्ट्रिय र्‍याफ्टिङकम डेब्यु गर्दै छन् । सुनील, शक्ति र दीपेशले चीनको युसु नदीमा भएको वल्र्ड र्‍याफ्टिङ प्लेटो च्याम्पियनसिप २०१८ खेलेका थिए ।

मिलन श्रेष्ठ र लिलबहादुरगुरुङसहितको नेपाली टिम १६ देश सहभागी त्यहाँ सातौं भएको थियो । सुनील ब्रम्हापुत्र नदीको तिब्बत क्षेत्रमा भएको फ्रेन्डसेप डाउन रिभर रेस २०१७ को रजत पदक विजेता नेपाली टिमका सदस्य पनि हुन् । सात देश सहभागी रेसको नेपाली टिममा उनीसहित हालका प्रशिक्ष्ँक निम तथा धिरज बीसी, रामजी सेढाईं थिए ।

सत्र देश सहभागी जापान संस्करणमा नेपाली टिम समग्रमा १३ औं स्थानमा थियो । टलीमा पुरुष खुलातर्फ १६ टिम सहभागी स्प्रिन्टमा नेपालले आठौं क्रममा रहेर प्रतिस्पर्धा सुरु गर्नेछ । च्याम्पियनसिपमा कुल १८ देशका ४८ टिम सहभागी छन् । त्यसमा पुरुषतर्फ खुलामा डिफेन्डिङ च्याम्पियन ब्राजिलसहित १६, मास्टर्स (४० वर्षमाथि) ८, यू-२३ मा ५ र यू-१९ मा ४ टिम छन् । महिलातर्फ खुलामा ८, मास्टर्समा २, यू-२३ मा ५ टिम छन् ।

विश्वकपको छनोट
विश्व र्‍याफ्टिङ च्याम्पियनसिप सुरु भएको २० वर्ष पुगेको अवसरमा सन् २०२० मार्चमा चिलीमा ‘आमन्त्रण विश्व र्‍याफ्टिङ कप’ हुँदै छ ।
अन्तर्राष्ट्रिय र्‍याफ्टिङ महासंघ (आईआरएफ) का अध्यक्ष जोसेफ विलिस जोन्सका अनुसार यस विश्व च्याम्पियनसिपमा उत्कृष्ट प्रदर्शन गर्ने पुरुष वा महिला खुला शीर्ष ८ वा ९ टिमलाई चिलीको नतिजाका आधारमा छनोट गर्ने र ती टिमको खर्च चिली सरकारले बेहोर्ने बताए । त्यसमा पनि नेपाली टिमले छनोट हुने लक्ष्य बनाएको छ ।

प्रकाशित : जेष्ठ २, २०७६ ०८:१०
प्रतिक्रिया
पठाउनुहोस्

एएफसी कप-२०१९ : मनाङ घरेलु मैदानमा फितलो

कुशल तिमल्सिना

काठमाडौँ — पटक्कै देखिएन आक्रमण । मनाङका प्रशिक्षक छिरिङ लोप्साङ गुरुङले खेलअघि पत्रकार सम्मेलनमा मिनर्वा पन्जाबविरुद्ध आफ्नो टोलीले धेरैभन्दा धेरै आक्रमणको प्रयास गर्ने दाबी गरेका थिए । बुधबार मनाङले पन्जाबविरुद्ध घरेलु मैदान एन्फा कम्प्लेक्समा एउटै पनि डरलाग्दो आक्रमण बुन्न सकेन ।

फलत: एएफसी कप समूह चरणमा मनाङको जितविहीन यात्रा चौथो खेलसम्म पुगेको छ । यो नतिजाले समूहको शीर्षस्थानमा रहँदै इन्टर जोनल प्लेअफको सेमिफाइनल प्रवेश गर्ने मनाङको लक्ष्यमा गम्भीर धक्का लागेको छ ।

घरेलु दर्शकको साथ आफ्ना लागि सबैभन्दा ठूलो हौसला रहेको बताउने मनाङका खेलाडीबीच पन्जावसँग खेलमा तालमेल नमिलेको प्रस्टै देखिन्थ्यो । एक साताको प्रशिक्षणका क्रममा आक्रामक रणनीतिको अभ्यास गरेको मनाङले खेलमा त्यो शैली उतार्न नसकेको प्रशिक्षक लोप्साङले स्वीकारे ।

‘हामीले जुन रणनीतिसाथ तयारी गरेका थियौं, कुनै पनि खेलाडीले आफ्नो पोजिसनमा शतप्रतिशत खेल्न सकेनन्,’ प्रशिक्षक लोप्साङले भने, ‘विपक्षीभन्दा हामीले कमजोर प्रदर्शन ग¥यौं । खासमा मिडफिल्डबाट सोचेअनुसार प्रदर्शन भएन, स्ट्राइकरबीच पनि तालमेल देखिएन ।’
यो बराबरीपछि मनाङ र पन्जाब दुवैले प्रतियोगितामा जितविहीन यात्रा कायममात्र राखेनन्, दुवैको अर्को चरणको यात्रा पनि अत्यन्तै कठिन बनेको छ ।

यसअघि पन्जाबको घरेलु मैदान भुवनेश्वरस्थित कालिंगा रंगशालाको खेल २–२ को बराबरीमा सकिएको थियो । एएफसी कपअन्तर्गत दक्षिण एसियाली ‘ई’ समूहमा रहेका मनाङसँग २ र पन्जाबसँग ४ अंक भएको छ । चार टोलीसम्मिलित समूहमा मनाङ चौथो र पन्जाब तेस्रो स्थानमा छन् ।

बुधबारै भारतको चेन्नाइनले बंगलादेशको ढाका अवहानी लिमिटेडसँग ३–२ को हार बेहोरेको छ । सुरुआती अग्रता जोगाउन नसक्दा चेन्नाइनले ढाकाको घरेलु मैदानमा ३ अंक हासिल गर्न चुक्यो । ४ खेलबाट चेन्नाइन र अवहानी दुवैको ७–७ अंक भएको छ । गोलअन्तरका आधारमा चेन्नाइनपहिलो र अबहानी दोस्रो स्थानमा छन् । मनाङले समूहका बाँकी दुई खेल यिनै दुई टोलीसँग खेल्नेछ ।

एन्फा कम्प्लेक्समा घरेलु टोली मनाङले पहिलो हाफमा एउटै पनि पोस्ट आक्रमण बुन्न सकेन । गर या मरको अवस्थामा रहेको मनाङ रक्षात्मक बन्न बाध्य भएको थियो । मिनर्वाले भने पहिलो हाफमा ५ उत्कृष्ट अवसर पाएकोमा गोल गर्न असफल रह्यो ।

सुरुआती आठौं मिनेटमा स्ट्राइकर लालमुआनपुइया सामुइलले २५ यार्डबाट गरेको सिधा प्रहार क्रसबारमा लागेर फर्किएपछि पन्जाबले अग्रता अवसर गुमायो । त्यसको ५ मिनेटपछि मोइराङथेन थोइवा सिंहको समान शैलीको प्रहार पनि क्रसबारमा लागेर फर्कियो । ३८ औं मिनेटमा सामुइलले एक डिफेन्डर बिट गरी बक्सभित्रबाट गरेको प्रहार मनाङका गोलरक्षक विशाल श्रेष्ठले पन्च गरेर बचाए ।

१७ वर्षीय स्ट्राइकर थोइवाको गोलमार्फत पाहुना टोलीले ३९ औं मिनेटमा अग्रता बनायो । कालिफ अल हसनको क्रस प्रहार विशालले पन्च गरे पनि बक्सभित्र अनमार्क रहेका थोइवाले रिबाउन्ड बललाई गोलमा परिणत गरे । त्यसको एक मिनेटपछि नै श्रेयस गोपालनले गोल अवसर पाएका थिए । तर उनको प्रहार विशालले रोके ।

पहिलो हाफको इन्ज्युरी समयमा पन्जाब १० खेलाडीमा समेटियो । मनाङका स्ट्राइकर अदिलेजालाई फाउल गरेपछि प्रतीक जोशी दोस्रो पहेँलो कार्ड खाँदै मैदान छाड्न बाध्य भए । उनले ४१ औं मिनेटमा पहिलो पहेँलो कार्ड पाएका थिए ।

१० खेलाडीमा समेटिएको पन्जाबविरुद्ध दोस्रो हाफमा मनाङ केही चलायमान देखिए पनि गोल गर्न भने ८१ मिनेटसम्म कुर्नुपर्‍यो । अन्जन विष्टको पासमा डिफेन्डर सहिद अजिजले पन्जाबका गोलरक्षक अर्शदीप सिंहलाई छक्याउँदै बल गोललाइन पार गराए ।

यसअघि खेलको ५९ औं मिनेटमा कमल श्रेष्ठको क्रसमा अन्जनको हेडर पोस्ट नजिकैबाट बाहिरियो । ६६ औं मिनेटमा हेमन गुरुङको कर्नरमा अजिजले गरेको हेडरले पनि पोस्टको दिशा लिन सकेन । पन्जाबका श्रेयस गोपालनले वान भर्सेस वानको अवसर पाए । तर विशाल बाधक बने ।

८८ औं मिनेटमा पन्जाबका गोपालनले गरेको हेडर गोललाई साउदी अरेबियाका रेफ्री शुक्री हुसेन अल हुन्फुसले अफसाइड करार गरिदिए । थपिएको ५ मिनेट इन्ज्युरी टाइममा मनाङका ओलावाले अफिजले दुई अवसर पाए तर दुवैमा पन्जाबका गोलरक्षक सिंहले रोके । अदिलेजाको पासमा ओलावालेले वान भर्सेस वान अवसर पाउँदा सिंहले एक हातले पन्च गरेर बल रोकेपछि अन्तिम समयमा विजयी गोल अवसर चुकेको हो । वैकल्पिक कोटा सकिसकेपछि डिफेन्डर रोबर्ट अल्फ्रेट प्रिमस चोटग्रस्त भएकाले पन्जाब अन्तिम १० मिनेट ९ खेलाडीमा समेटिएको थियो ।

‘रेफ्रीले पैसा खाए’
खेलमा आफूअनुकूल नतिजा नआएपछि पन्जाबका प्रशिक्षक सचिन तानाजी बडाढेले खेलपछि पत्रकार सम्मेलनमा रेफ्रीमाथि आक्रोश पोखे । उनले रेफ्रीले पैसा लिएर मनाङको पक्षमा निर्णय सुनाएको गम्भीर आरोप लगाएका छन् । ‘म मेरा खेलाडीको प्रदर्शनबाट गर्व गर्छु, उनीहरूले निकै नै राम्रो खेले । ११ विरुद्ध ९ जना खेल्दा गोल गर्न सकियो धेरै खुसीको कुरा हो,’ उनले भने ।

प्रशिक्षक बडाढेले आफ्ना डिफेन्डरलाई दिइएको रातो कार्ड, मनाङको गोलमा आफ्ना गोलरक्षकमाथिको फाउल र आफ्नो टिमले गरेको गोललाई अफसाइड करार गर्नुलाई रेफ्रीको कमजोरी मानेका छन् । ‘त्यो रेडकार्ड थियो र ?,’ उनले प्रतिप्रश्न गरे, ‘अवश्य पनि थिएन । हामीले गरेको गोललाई अफसाइड दिइयो । सायद उनीहरूले पैसा लिएका थिए । यस्ता निर्णयले खेलको अवस्था बिगारिदिन्छ ।’

उनले आफ्नो असन्तुष्टि समेटेर एएफसीमा उजुरी दिने बताएका छन् । ‘हाम्रो टिमले ९ विरुद्ध ११ जनासँग प्रतिस्पर्धा गरिरहेको थियो । उनीहरूले खेलको अवस्था र विकास बुझ्नुपथ्र्यो । हामी एएफसीमा उजुरी दिन्छौं,’ प्रशिक्षक बडाढेले भने, ‘यस्ता घटना दोहोरिन नदिन म्याच कमिस्नरले तत्काल गम्भीर निर्णय लिनुपर्छ, ता कि यो नदोहोरियोस् ।’ उनले मनाङको दोस्रो चरण प्रवेशको सम्भावना सकिएको र आफ्नो टिमका लागि अन्य खेलको नतिजामा भरपर्ने पनि बताए ।

प्रकाशित : जेष्ठ २, २०७६ ०८:०७
पूरा पढ्नुहोस्
प्रतिक्रिया
पठाउनुहोस्