वालिङ-१०० माउन्टेनको उपाधि क्यानडाका वालेसलाई- खेलकुद - कान्तिपुर समाचार

वालिङ-१०० माउन्टेनको उपाधि क्यानडाका वालेसलाई

प्रतिक्षा काफ्ले

स्याङ्जा — वालिङमा शनिबार भएको अन्तर्राष्ट्रिय माउन्टेन बाइक प्रतियोगिताको उपाधि क्यानडियन खेलाडी कोरी वालेसले हात पारेका छन् ।

स्याङ्जाको वालिङ्‌मा संचालित अन्तर‌राष्ट्रिय वालिङ्-१०० माउन्टेन बाइक प्रतियोगिताकाे उपाधि हात पारेका क्यानेडाली खेलाडी कोरी वालेस । तस्बिर : प्रतिक्षा काफ्ले/कान्तिपुर 


कोरीले एकसय किलोमिटरको दूरी ६ घण्टा २० मिनेट ५८ सेकेण्डमा पूरा गरेका हुन् । टाइटलतर्फ प्रथम भएका कोरीले नगद ५ लाखसहित मेडल र प्रमाणपत्र प्राप्त गरेका छन् ।


महिलातर्फ लक्ष्मी मगर आठ घण्टा नौ मिनेट २६ सेकेण्डमा निर्धारित दूरी पार गरेर प्रथम भइन् । उनले ३ लाख नगदसहित मेडल र प्रमाणपत्र प्राप्त गरेकी छन् ।


यसैगरी प्रतियोगितामा ८ घण्टा ५१ मिनेट ५६ सेकेन्डमा सो दूरी पार गरी सोनी गुरुङले द्वितीय स्थान हात पार्न सफल भएकी छन् । द्वितीय भएसँगै गुरुङले ५० हजारसहित मेडल र प्रमाणपत्र प्राप्त गरिन् । प्रतियोगितामा पुरुषतर्फ हर्कबहादुर लामा प्रथम, कमल ओली द्वितीय र सन्तोष गुरुङले तृतीय स्थान हाँसिल गर्न सफल भएका छन् । उनीहरुले क्रमशः १ लाख ५० हजार, ५० हजार र ३० हजार नगद, मेडल र प्रमाणपत्र प्राप्त गरेका छन् ।


प्रतियोगिताको घोषणसभामा गण्डकी प्रदेशसभा सदस्य एवं विधायन समितिका सभापति मोहनप्रसाद रेग्मी, वालिङ नगरप्रमुख दिलीपप्रताप खाँण, नगरपालिकाका प्रमुख प्रशासकीय अधिकृतलगायतले विजयी खेलाडीलाई पुरस्कार वितरण एवं सम्मान गरेका थिए । २ पटकसम्म वर्ल्ड च्याम्पियन बनेका टाइटलतर्फ च्याम्पियन भएका क्यानेडाली खेलाडी वालेसले आफू सहभागी भएको प्रतियोगिता मध्ये यहाँ भएको प्रतियोगिता निकै कठिन खालको भएको बताए ।


यो प्रतियोगिताले आफूमा थप साहस बढेको प्रतिक्रिया दिँदै माउन्टेन बाइक प्रतियोगिताका लागि यो ठाउँ उपयुक्त भएको बताए । वन्डरफूल वालिङ पर्यटन विकास संस्थाको आयोजना र वालिङ नगरपालिकाको सहयोगमा सम्पन्न भएको प्रतियोगिताबाट जिल्लालाई नै साहसिक पर्यटकीय गन्तव्यका रूपमा विश्वभरि परिचित गराउने उद्देश्य लिइएको संस्थाका अध्यक्ष दिनकर नेपालले जानकारी दिए ।


प्रतियोगितामा दुई पटकसम्म विश्व च्याम्पियन बनेका क्यानेडाली वालेससहित दुई विदेशी र २६ स्वदेशी गरी २८ खेलाडीको सहभागिता रहेको थियो ।

प्रकाशित : फाल्गुन २६, २०७५ ११:३८
प्रतिक्रिया
पठाउनुहोस्

वालिङ १०० च्यालेन्ज सुरु

प्रतिक्षा काफ्ले

स्याङ्जा — पर्यटन प्रर्वद्धनका लागि सय किलोमिटरको अन्तर्राष्ट्रिय माउन्टेन बाइक प्रतियोगिता ‘वालिङ १०० अल्टिमेट एमटीबी च्यालेन्ज’ सुरु भएको छ । 

स्याङ्जाको वालिङ्मा संचालित वालिङ्-१०० माउन्टेन बाइक प्रतियोगितामा सहभागी खेलाडीहरु । तस्बिर : प्रतिक्षा काफ्ले/कान्तिपुर । 

शनिबार बिहान सात बजेबाट सुरु भएको खेल संचालन गरिएको हो । यसअघि फेब्रुअरी १ मा सञ्चालन गर्न तय गरिएको प्रतियोगिता आजका लागि सारिएको हो । वालिङ नगरपालिकाको सहयोगमा संचालित प्रतियोगितामा स्वदेशी तथा विदेशी गरी २७ जना खेलाडीको सहभागिता रहेको वण्डरफुलका अध्यक्ष दिनकर नेपालले बताए ।

माउण्टेन बाइक प्रतियोगिताले वालिङलाई पर्यटन गन्तव्यको रुपमा विकास गर्ने प्रमुख उद्देश्य रहेको आयोजकले जनाएको छ । प्रतियोगितामा २ पटकसम्म वर्ल्ड च्याम्पियन बनेका क्यानेडियन खेलाडी, भारतीय खेलाडी, आर्मी, एपीएफकोसमेत सहभागिता रहेको अध्यक्ष नेपालले बताए । वालिङलाई साहसिक खेलको केन्द्र बनाउनका लागि प्रतियोगिताले सघाउ पुग्ने उनको भनाई छ ।

नगरभित्रका संस्कृति, पर्यटन र प्रकृतिका माध्यमबाट वालिङ तथा स्याङ्जामा पर्यटक भित्रयाउने र पर्यटनको विकास गरी नागरिकको जीवनस्तर माथि उकास्ने उद्देश्यले वण्डरफूल वालिङ नामक संस्थाको स्थापना भएको हो । वालिङमा रहेका होमस्टेको प्रचारप्रसार गर्दै पर्यटक आगमनमा अभिवृद्धि गर्नका लागि प्रतियोगिताले सहयोग गर्ने अपेक्षा लिइएको छ ।

प्रतिस्पर्धाको लागि साइकलिङ रुट वालिङको सुकौँदी बगरबाट सुरु भई त्रियासी, छापागाउँ, सिंगारकोट, माँझकोट, तलाथोक, मिनाङकोट, जगतभञ्याङ, केँवरे, चिहानडाँडा, काफलडाँडा, गह्रौँशुर मन्दिर, बजाकोट, दाङसेया, करादी, झोलुङगे, उनियाचौर, घुरुङखा, डुम्रेभञ्याङ, स्वरेकमैदान, टापु भञ्याङ, डौँवा हुँदै पुनः सुकौँदी आएर सय किलोमिटर यात्रा पूरा हुने आयोजकले बताएको छ । प्रतियोगिता साँझ ५ बजे सकिनेछ । प्रतियोगीलाई रुटमा पर्ने विभिन्न धार्मिक तथा पर्यटकीय स्थलहरुमा स्थानीयले स्वागत गर्नेछन् ।

प्रतिस्पर्धामा सहभागी भएका र गति कम भएकाहरुलाई सहज हुनेगरी १०० किलोमिटरको दूरीलाई ४ भागमा विभिजन गरिएको छ । जसअनुसार २५, ५०, ७५ र १०० किलोमिटरको दूरी रहेको छ । प्रतिस्पर्धीले चार तहमध्ये जति दूरी पार गरेको छ त्यसै अनुसारको प्रमाणपत्र प्राप्त गर्ने प्रतियोगिताका निर्देशक नेपालले जनाए । खेलको टाइटल पुरस्कार ५ लाख रुपैयाँ रहेको छ । जसमा महिला तथा पुरुषको संयुक्त प्रतिस्पर्धा रहने छ भने प्रतियोगितामा पुरुष र महिलाको छुट्टाछुट्टै विजेतालाई पनि पुरस्कृत गरिने छ ।

जसानुसार पुरुषतर्फको विजेताले १ लाख ५० हजार र महिलातर्फ ३ लाख रुपैयाँ नगद पुरस्कार पाउने छन् । विनेता खेलाडीलाई मेडल र प्रमाणपत्र पनि प्रदान गरिने छ ।

प्रकाशित : फाल्गुन २५, २०७५ १०:५९
पूरा पढ्नुहोस्
प्रतिक्रिया
पठाउनुहोस्
×