सन्दीपको उत्कृष्ट प्रदर्शन

नारायण खड्का

अस्ट्रेलिया — नेपाली लेगस्पिनर सन्दीप लामिछानेको उत्कृष्ट बलिङसँगै बिग बासमा मेलबर्न स्टार्सले जित हासिल गरेको छ । मेलबर्न क्रिकेट मैदानमा आइतबार भएको खेलमा उनले बिग बासमा उत्कृष्ट प्रदर्शन गरे ।

एक साताअघिमात्र मेलबर्न आइपुगेका सन्दीपले जम्मा ३.४ ओभर बलिङ गर्दै ३ विकेट लिएका थिए । उनले जम्मा ११ रनमात्र खर्चे । यो उनको बिग बासमा अहिलेसम्मकै उत्कृष्ट बलिङ हो । दसौं हजार घरेलु दर्शक र सयौं नेपाली फ्यानबीच बलिङ गरेका उनले पप लोयड, टम कुर्‍रान र बेन डवारसुयिसलाई पेभेलियन फर्काएका थिए भने उनकै बलमा नाथन लायन रनआउट भएका थिए ।

उनले ग्लेन म्याक्सवेलले गरेको बलमा मोइसेस एनरिकेसलाई क्याच आउटसमेत गरेका थिए । उनको खेलको प्रशंसा गर्दै मेलबर्न स्टार्सका कप्तान ग्लेन म्याक्सवेलले सन्दीपले उत्कृष्ट बलिङ गरेको प्रतिक्रिया दिए ।

सन्दीपले अहिलेसम्म अस्ट्रेलियामा ५ खेल खेलिसकेका छन् जसमा उनले ११ विकेट लिइसकेका छन् । जित्नैपर्ने दबाबमा रहेको उनको टिम सिड्नी सिक्सर्सलाई ९४ रनले हराएर सेमिफाइन्ल पुग्यो । स्टार्सले बिहीबार होबार्ट हुरिकेन्ससँग सेमिफाइनल खेल्नेछ ।

सन्दीपको खेललाई समर्थन जनाउन मेलबर्नमा रहेका सयौं नेपाली नेपाली झन्डा र बाजागाजासहित खेलस्थल पुगेका थिए । खेल हेर्न पुगेका तारा गैरैले सन्दीपको खेलले नेपालीलाई गर्वित बनाएको सुनाए ।

‘सन्दीपले समग्र बिग बासमा देखाएको खेल कौशलले अस्ट्रेलियामा रहेका नेपालीको शिर ठाडो मात्र बनाएको छैन, नयाँ खेलाडीलाई हौसलासमेत प्रदान गरेको छ,’ गैरेले भने । सन्दीपले पनि नेपाली प्रशंसकको साथ पाएकामा खुसी व्यक्त गरेका थिए । उनले खेल हेर्न पुगेका नेपालीसँग फोटो खिचाउनुका साथै अटोग्राफसमेत दिएका थिए । उनको खेललाई यहाँका समीक्षकहरूले समेत प्रशंसा गरिरहेका छन् ।

प्रकाशित : माघ २८, २०७५ ०९:१४
प्रतिक्रिया
पठाउनुहोस्

जब अँध्यारो भयो...

प्रदीप मेन्याङ्बो

सुनसरी — धरान रंगशालामा बुढासुब्बा रेडबुल गोल्डकपमा आइतबार संकटा र काँकडभिट्टा फुटबल ट्रेनिङ सेन्टर, झापाको उद्घाटन खेल टाइब्रेकरसम्म पनि बराबरी भएपछि ‘सडनडेथ’ मा भइरहेका बेला खेल्न मिल्ने उज्यालो भएन ।

२१ औं बुढासुब्बा गोल्डकपको उद्घाटन खेलमा प्रतिस्पर्धा गर्दै काँकडभिट्टा (सेतो जर्सी) र संकटाका खेलाडी ।तस्बिर : कान्तिपुर

त्यसैले संकटा र झापाले अघिल्लो चरण प्रवेशका लागि सोमबार बिहान ८ बजे टाइब्रेकर प्रहार गर्ने भएका छन् ।

निर्धारित ९० मिनेटको खेल २–२ को बराबरी भएपछि खेल टाइब्रेकरमा पुगेको थियो । टाइब्रेकरमा पनि बराबरी भएपछि सडनडेथमा पुगेको थियो । सडनडेथमा पनि संकटा र केएफटीसीका ६–६ जनाले बल प्रहार गरेका थिए । बराबरी अवस्थामा साँझ ६:१५ बजेको थियो र अँध्यारो भएपछि आयोजक धरान फुटबल क्लब, रेफ्री र लाइन्समेनले बाँकी प्रतिस्पर्धा सोमबार गराउने निर्णय गरेका हुन् ।

टाइब्रेकरमा संकटाका सेड्रिक अब्बा, दीपेश आलेमगर, रोमन लिम्बू र लक्ष्मण रुचालले गोल गरेका थिए भने अमित तामाङको प्रहार पोलमा ठोक्किएर बाहिरिएको थियो । काँकडभिट्टाका योगेश गुरुङ, दिलेन लोक्ताम, आशिष चापागाईं र सुशील राईले गोल गरेका थिए भने विकास राईको प्रहार गोलरक्षकले बचाए ।

सडनडेथमा दुवै पक्षले ५–५ प्रहार गरेको भए पनि ४–४ गोल भएको थियो । काँकडभिट्टाले सहिद स्मारक ‘ए’ डिभिजन लिग खेलको उपविजेता संकटाविरुद्ध १० औं मिनेटमै अग्रता लिएको थियो । कर्ण लिम्बूले फ्रिकिकमा करिब ३० यार्डबाट गोल गरेर काँकडभिट्टालाई अग्रता दिलाएका थिए । संकटाका सेडरिक अब्बाको पासमा जय गुरुङले गोल गरेपछि ५९ औं मिनेटमा खेल १–१ को बराबर भएको थियो ।

काँकडभिट्टाले फेरि अग्रता लियो । कर्णले ६८ औं मिनेटमा प्रहार गरेको बल पोलमा लागेर फर्किएको थियो, त्यसै बललाई पुजन उपरकोटीले सुन्दर गोलमा परिणत गर्दै काँकडभिट्टालाई २–१ ले अघि बढाएका थिए । तर, दीपेश आलेमगरले इन्ज्युरी समयमा गोल गरेपछि संकटाले काँकडभिट्टालाई २–२ को बराबरीमा रोक्यो । दोस्रो गोलमा पनि अब्बाले पास दिएका थिए ।

स्वदेश र विदेशका आठ टिम सहभागी प्रतियोगितामा विजेताले आठ लाख र उपविजेताले ४ लाख रुपैयाँ पाउनेछन् । प्रतियोगिताका उत्कृष्ट खेलाडीले मोटरसाइकल हात पार्नेछ । सर्वाधिक गोलकर्ताले ३५ हजार तथा पोजिसनका आधारमा उत्कृष्ट हुने खेलाडी र प्रशिक्षकले जनही २५ हजार रुपैयाँ पाउनेछन् । म्यान अफ द म्याचले १५ हजार र धरानका उदीयमान खेलाडीले १५ हजार रुपैयाँ हात पार्नेछन् ।

प्रकाशित : माघ २८, २०७५ ०९:१४
पूरा पढ्नुहोस्
प्रतिक्रिया
पठाउनुहोस्