सरस्वती र धनबहादुरलाई अवार्ड

कान्तिपुर संवाददाता

काठमाडौँ — एपीएफकी सरस्वती चौधरी र त्रिभुवन आर्मी क्लबका धनबहादुर भट्ट प्लेयर अफ द इयर अवार्डबाट सम्मानित भएका छन् । 

प्लेयर अफ द इयर अवार्ड विजेता एपीएफकी सरस्वती चौधरी ।


नेपाल भलिबल संघले हालै आयोजना गरेको एनभीए अवार्डमा उत्कृष्ट बनेका महिलातर्फ सरस्वती र पुरुषतर्फ धनबहादुरले ३० हजार रुपैयाँ राशिको प्लेयर अफ द इयर अवार्ड पाएका हुन् । राष्ट्रिय खेलकुद परिषद्का उपाध्यक्ष पिताम्बर तिम्सिनालगायतले खेलाडीलाई अवार्ड वितरण गरे । धनबहादुर अहिले रामेछाप सिभिल च्याम्पियनसिप भलिबलमा व्यस्त रहेकाले उनी अवार्ड वितरणमा उपस्थित थिएनन् ।

डेढ वर्षअघि भलिबल नेपालको राष्ट्रिय खेल भएलगत्तै संघका अध्यक्षसमेत रहेका मनोरन्जन रमण शर्माले १० लाख रुपैयाँको अक्षय कोषको स्थापना गरेका थिए । त्यही रकमको ब्याजबाट वार्षिक रूपमा १–१ महिला र पुरुष खेलाडीलाई नगदसहित सम्मान गर्ने परम्परा यसपालिदेखि थालनी भएको हो ।

‘म भलिबल संघमा रहे पनि नरहे पनि वा म जीवित रहुन्जेलसम्म यो अक्षय कोषमार्फत खेलाडीको हितका लागि लगानी हुनेछ,’ अवार्ड कार्यक्रममा शर्माले भने, ‘भविष्यमा मेरा छोरानातिले यसमा रकम थप गरी सहयोग गर्न सक्नेछन् ।’

राष्ट्रिय टोलीकी मुख्य स्पाइकरसमेत रहेकी सरस्वतीले घरेलु प्रतियोगिताका नौमध्ये ८ उपाधि एपीएफलाई दिलाउन महत्त्वपूर्ण भूमिका खेलेकी थिइन् । पछिल्लो समय एपीएफ टिम नै सरस्वतीको प्रदर्शनप्रेरित छ ।

सर्भर धनबहादुरले घरेलु भलिबलमा आर्मीको टिमको प्रदर्शनमा निर्णायक भूमिका खेल्दै आएका छन् । राष्ट्रिय टोलीमा पनि उनले नियमित उत्कृष्ट प्रदर्शन गरिरहेका छन् ।

नेपालले अर्को वर्ष भदौमा एसियाली सेन्ट्रल जोन भलिबलको आयोजना गर्दै छ । जहाँ ९ टिमको सहभागिता रहने छ । भलिबल संघका महासचिव जितेन्द्रबहादुर चन्दले निर्माणाधीन राखेप कभर्डहल समयमै सम्पन्न भए प्रतियोगिता गर्न सहज हुने बताए ।

राखेप उपाध्यक्ष तिम्सिनाले राष्ट्रिय खेल विकासका लागि सबै सरोकारवालासँग सर्वपक्षीय छलफल गरी योजना बनाउने आश्वासन दिए ।

प्रकाशित : माघ २६, २०७५ ०९:२६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

सेना छाड्ने बेलायती बढे

नवीन पोखरेल

लन्डन — बेलायती सेनामा भर्ती हुने ब्रिटिस नागरिकहरूको संख्या घटेको छ । बेलायती सेनाका अनुसार गत वर्ष ८ हजार भन्दा बढी सैनिकले जागिर छाडेको तथ्यांक सार्वजनिक भएपछि प्रधानमन्त्रीले संसदको प्रतिरक्षा समितिका सदस्य मार्क फ्रांस्वालाई यसबारे अध्ययन गरी प्रतिवेदन पेस गर्न निर्देशन समेत दिएकी छन् । गत वर्ष बेलायतले १३ हजार सैनिक भर्ती गरेको थियो । 

मार्कले आम्र्ड फोर्सेसमा धेरै मानिस सहभागी गराउन आवश्यक भएको जनाउँदै प्रधानमन्त्री मेले यसको सुधारका उपायका लागि अध्ययन गर्न निर्देशन दिएकी हुन् । सेनाले भर्तीमा सघाउन निजी क्षेत्रको एक कम्पनीलाई ठेक्का दिए पनि भर्ती हुनेको भने संख्या बढ्न नसकेको समाचारमा जनाइएको छ । बेलायतभित्रै सेनाको जागिरको आकर्षण घटदै गए पनि नेपाली युवाको आकर्षण बढदै गएको छ ।

यस वर्ष नेपालबाट भर्ती भई बेलायत आउने युवाको संख्या समेत वृद्धि हुने जनाइएको छ । सन् २०१९ का लागि बेलायती सेनाको गोर्खा ब्रिगेडका लागि नेपालमा भर्ती भने सकिएको छ । ‘दि फोर्सेस टिभी’ ले जनाएअनुसार झन्डै १० हजार नेपाली युवाले गोर्खा भर्तीका लागि विभिन्न चरणको छनोटमा भाग लिएका थिए । पोखरामा गरिएको अन्तिम छनोटमा ४ सय जना छनोट भएका छन् । जुन ३४ वर्ष यताकै सबभन्दा बढी हो ।

छनोटमा २५ किलो बालुवा भरिएको डोको नाम्लोले बोकेर पहाडमा ५ किलोमिटर पार गर्ने कठिन चरण थियो । २५ किलो बालुवा डोकोमा राखेर पहाड पहाड दौड्ने परीक्षा भर्ती छनोटमा सबैभन्दा कठिन र डरलाग्दो ठानिन्छ । डोको दौड सन् १९८९ देखि मात्र ल्याइएको हो ।

हाल झन्डै ३ हजार नेपाली बेलायती सेनामा छन् । बेलायती सेनामा गोर्खाका परिचित नेपाली सन् १८१५ देखि प्रवेश गरेका हुन् । पहिलो र दोस्रो विश्वयुद्धसहित अन्य कैयौं महत्त्वपूर्ण लडाइँमा ४३ हजार भन्दा बढी गोर्खाले ज्यान गुमाएका र हजारौं घाइते भएको इतिहास छ । यसबीचमा १३ जना गोर्खालाई सम्मानसहित साहसिक पदक भिक्टोरिया क्रस (भिसी) प्रदान गरिसकिएको छ ।

सेवारत गोर्खाहरूले बेलायती सैनिकसरह तलब र सेवा सुविधा पाए पनि निवृत्त भइसकेपछिको सेवा सुविधाबारे बेलायतले आफूहरूमाथि भेदभाव गरेको भन्दै आन्दोलनरत छन् । समान पेन्सन अलावा क्षतिपूर्ति र अन्य सेवा सुविधा हुनुपर्ने भूतपूर्व गोर्खाहरूको माग छ ।

प्रकाशित : माघ २६, २०७५ ०९:२३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT