विराटनगरलाई श्री एयरको साथ

कान्तिपुर संवाददाता

काठमाडौँ — धनगढी प्रिमियर लिग (डीपीएल) तयारीमा रहेको विराटनगर किंग्सले उपाधि जित्ने लक्ष्य लिएको छ । विराटनगर प्रतियोगिताको पहिलो संस्करणको उपविजेता हो । गत संस्करणमा भने विराटनगर लिग चरणभन्दा माथि जान सकेन ।

विराटनगरले मंगलबार श्री एयरलाइन्ससँग मुख्य प्रायोजन सम्झौता गरेको छ । श्री एयरलाइन्स डीपीएलको एयरलाइन्स साझेदार पनि हो । सम्झौता रकमबारे भने कार्यक्रममा सार्वजनिक गरिएन ।

विराटनगरको सहायक प्रायोजकमा नेपाल वेलहोप एग्रिटेक प्रालि, एनआईसी–एसिया बैंक, महालक्ष्मी केबल र सुभारु रहेका छन् ।

श्री एयरलाइन्सका मार्केटिङ म्यानेजर अनिल मानन्धरले आफ्नो कम्पनीले खेलकुदलाई महत्त्व दिएको बताए । ‘हामीले सुरुदेखि नै खेलकुदलाई महत्त्व दिएका छौं । क्रिकेटले पछिल्लो समय राम्रो गरिरहेको छ र घरेलु क्रिकेटमा सहयोग पुर्‍याउन विराटनगरलाई रोजेका हौं । टिमलाई डीपीएल उपाधिका लागि शुभकामना दिन चाहन्छु,’ मानन्धरले भने ।

टोलीका रणनीतिक खेलाडी तथा कप्तान करण केसीले उपाधि जित्ने लक्ष्य लिएको बताए । ‘हाम्रो युवा टिम छ । ठूला नाम नभए पनि हामीले राम्रो प्रदर्शन गर्दै च्याम्पियन हुने लक्ष्य राखेका छौं,’ उनले भने ।

टोलीका प्रशिक्षकका रूपमा हङकङबाट अन्तर्राष्ट्रिय क्रिकेट खेलेका शेरबहादुर लामा (सुनील) ले गर्दै छन् । ‘हाम्रो टिम सन्तुलित छ । स्वदेशी र विदेशी खेलाडीहरू आ–आफ्नो भूमिकामा क्षमतावान छन् । प्रतियोगिताको उपाधि जित्ने छौं,’ उनले भने ।

विराटनगर किंग्सले बायाँहाते अर्थोडक्स स्पिनर ३२ वर्षीय अविनाश यादव र बायाँहाते ब्याट्सम्यान ३५ वर्षीय शिवकान्त शुक्लालाई विदेशी खेलाडीका रूपमा अनुबन्ध गरेको छ । दुवै भारतीय हुन् । दुवैले पहिलो श्रेणीको क्रिकेटमा लामो अनुभव बटुलेका छन् । विराटनगरले उद्घाटन खेलमा धनगढी स्टार्ससँग प्रतिस्पर्धा गर्दै छ ।

विराटनगर किंग्समा आशिफ शेख, कुशल भुर्तेल, पृथु बाँस्कोटा, किशोर महतो, सुसन भारी, हरिशंकर साह, शम्साद शेख, राजेश पुलामी, अर्जुन अधिकारी, अमृत गुरुङ, तृतराज दास, सुवास ऐर (स्थानीय खेलाडी), विदेशी खेलाडीमा अविनाश यादव र शिवकान्त शुक्ला छन् ।

प्रकाशित : माघ २३, २०७५ ११:००
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

रिस्सो सेमिफाइनलमा

दीपक परियार

लेखनाथ — पहिलो हाफ सम्हालिन नसक्दा ए डिभिजन टोली नेपाल पुलिस क्लब मंगलबार जापानको विश्वविद्यालयका खेलाडीसम्मिलित रिस्सो युनिभर्सिटी टिमसँग छैटौं मनकामना केबलकार पोखरा कपको क्वाटरफाइनलमा १–० ले पराजित भएको छ ।

पोखरा कपमा मंगलबार प्रतिस्पर्धा गर्दै रिस्सो युनिभर्सिटी (हरियो) र पुलिस क्लबका खेलाडी । म्यान अफ द म्याच घोषित जापानका नात्सुकी ताकेदा (दायाँ) । तस्बिर : दीपक/कान्तिपुर

पोखरा रंगशालामा जापानी युवा खेलाडीसामु पुलिसका अनुभवी खेलाडी फिक्का देखिए । पहिलो हाफमा विपक्षीलाई कमजोर आँकलन गर्नु पुलिसलाई भारी पर्‍यो । रिस्सोले सेमिफाइनलतर्फ यात्रा बढाउँदा पुलिस प्रतियोगिताबाट बाहिरिने दोस्रो विभागीय टिम बन्यो ।

पुलिसले हालै सर्वाधिक पुरस्कार राशिको नकआउट फुटबल सुदूरपश्चिम खप्तड गोल्डकप जितेको थियो । फरक पृष्ठभूमिका टिमसँग प्रतिस्पर्धा गर्नु दुवै टोलीको चुनौती थियो । बाजी भने आमन्त्रित जापानी टोलीले मार्‍यो ।

‘टेक्निकल’ खेल खेलेका रिस्सोका खेलाडीको प्रदर्शनमा सुरुदेखि नै दर्शक लोभिए । १९ औं मिनेटमा राइट विंगर यासुताका सुजुकीले गोल गरे । उनले नात्सुकी ताकेदाको पासमा गोल गरे । ताकेदाले पेनाल्टी एरियाबाहिरबाट मिलाएको पासलाई सुजुकीले वान टचमै पोस्टको दिशा दिए । जापानीको खेल बुझ्नै समय लागेको पुलिसलाई एक गोलले थप हतास बनायो । पहिलो हाफमै रिस्सोलाई केही अवसर मिल्यो । ताकुया हितोमीले डिफेन्सलाई बिट गर्दै हानेको बल पुलिसले कठिनसँग बचायो ।

खेलको ३३ औं मिनेटमा हितोमीकै कर्नरलाई ताकुतो योसिनाले हानेको हेड प्रहार बाहिरियो । ३८ औं मिनेटमा रिस्सोले थप अवसर सिर्जना गर्‍यो । दाइची ओगावाको हेडिङलाई पुलिसका कप्तान विक्रम धिमालले गोललाइनबाट क्लियर गर्दै गोल थपिनबाट जोगाए । गोलकिपर बिट भइसकेको अवस्थामा विक्रमले क्लियर गरेका थिए । ४२ औं मिनेटमा कप्तान हिरोतो होसिकावाको लामो कडा प्रहारलाई पुलिसका गोलकिपर शत्रुधन चौधरीले बचाए ।

रिस्सोको खेलको भेउ पाएपछि दोस्रो हाफमा पुलिसले केही सुधार ल्यायो । फिनिसिङमा भने बारम्बार चुक्यो । आफूलाई सुधारेर बनाएका दुई उत्कृष्ट मुभमा स्कोर हुन नसक्दा पुलिस खेलमा फर्किने सम्भावना टर्‍यो । ६८ औंं मिनेटमा रवि पासवानले पेनाल्टी एरियाबाट गरेको प्रहार विपक्षी गोलकिपरबाट रिबाउन्ड भयो । त्यसलाई पेनाल्टी एरियाबाट भरत शाहले जाली चुमाउन खोजे ।

उक्त बल पनि गोलकिपर तेइता मित्सुमोरीले पन्च गरेर बचाए । रिस्सोका डिफेन्सले बल क्लियर गर्दा खेललाई बराबरीमा पुर्‍याउने पुलिसको चाहनामा तुषारापात भयो । ७६ औं मिनेटमा पुलिसले अर्को अवसर बनायो । नीरकुमार राईले २० यार्डबाट बार च्यापेर गरेको कडा शट पोस्ट नजिकबाट बाहिरियो । रिस्सोका नात्सुकी ताकेदा म्यान अफ द म्याच भए ।

रिस्सोका प्रशिक्षक ताकेसा तोकाइरिनले विपक्षीको खेलको अवस्था थाहा नहुँदा नहुँदै पनि मैदानमा होमिएको बताए । उनले लामो यात्राको थकान भएकाले आफ्ना खेलाडीले अझै शतप्रतिशत दिएर खेल्न नसकेको सुनाए । उनले भने, ‘मैदानसँग परिचित भएपछि र खेलाडी फिट भएको अवस्थामा सेमिफाइनलमा हाम्रो प्रदर्शन सुधारिने छ ।’

पुलिसका प्रशिक्षक अनन्त थापाले विपक्षीको क्षमतालाई कम आँकलन गर्दा पहिलो हाफमै गोल खानुपरेको प्रतिक्रिया दिए । उनले भने, ‘जापानी टिमसँग खेल्न पाउनु हाम्रा लागि अवसर हो । यसले नेपाली फुटबलको लेभल कस्तो छ भन्ने छर्लंग देखाएको छ । आधुनिक फुटबल कसरी खेलिन्छ भन्ने जापानी टिमले प्रदर्शन गर्‍यो । सुरुमा युवा टिम देखिएकाले जित्छौं भन्ने लागेको थियो । तर गोल खानु नै टर्निङ प्वाइन्ट बन्यो ।’

बुधबार अन्तिम क्वाटरफाइनलमा मनाङ मस्र्याङदीले बिग्रेड ब्वाइजसँग खेल्नेछ । बिग्रेडले घरेलु टोली पोखरालाई हराएको थियो ।

प्रकाशित : माघ २३, २०७५ १०:५८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT