स्यान्टु र नविता ब्रान्ड एम्बासडर- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

स्यान्टु र नविता ब्रान्ड एम्बासडर

कान्तिपुर संवाददाता

काठमाडौँ — टेबलटेनिस खेल सामग्री उत्पादक कम्पनी स्टयागले नेपालका शीर्ष वरीयताका दुई खेलाडीलाई ब्रान्ड एम्बासडर नियुक्त गरेको छ ।

स्टयागको ब्रान्ड एम्बासडर बनेका राष्ट्रिय टेबलटेनिस खेलाडीद्वय स्यान्टु श्रेष्ठ र नविता श्रेष्ठ मंगलबार पत्रकार सम्मेलनमा । तस्बिर : केशव थापा/कान्तिपुर

वर्तमान राष्ट्रिय पुरुष च्याम्पियन स्यान्टु श्रेष्ठ र महिला च्याम्पियन नविता श्रेष्ठलाई स्टयाग ब्रान्डले आफ्नो दूत नियुक्त गरेको छ । दुवै खेलाडीले सम्झौतापत्रमा हस्ताक्षर गरेर स्टयाग इन्टरनेसनलको कार्यालयमा पठाएका छन् । स्टयागले अन्तर्राष्ट्रिय टेबलटेनिस फेडेरेसनसँग सहकार्य गरी विभिन्न मुलुकका राष्ट्रिय खेलाडीलाई आफ्नो उत्पादन सहयोग गर्दै आएको छ ।


अखिल नेपाल टेबलटेनिस संघका अध्यक्ष चतुरानन्द राजवैद्यले दुवै खेलाडीलाई ‘गोल्ड क्याटगोरी’ अन्तर्गत प्रायोजन गरेको जानकारी गराए । उनीहरूसँग दुईवर्षे सम्झौता भएको वैद्यले जानकारी दिए । यसवापत दुई वर्षसम्म स्यान्टु र नविताले स्टयागको लागोअंकित खेलसामग्री प्रयोग गर्नुपर्नेछ । दुवै खेलाडीले आफ्नो क्लब नेपाल पुलिसबाट खेल्दा पनि यस ब्रान्डको लोगोअंकित सामग्री प्रयोग गर्नेछन् ।


संघका अनुसार पहिलोपल्ट नेपाली टेबलटेनिस खेलाडी अन्तर्राष्ट्रिय कम्पनीको ब्रान्ड एम्बासडर नियुक्त भएका हुन् । विश्व चर्चित ब्रान्डसँगको सहकार्यले आफूहरूलाई टेबलटेनिसमा अझै राम्रो प्रदर्शन गर्न प्रेरित गर्ने खेलाडीहरूले बताए । ‘अन्तर्राष्ट्रिय प्रतियोगिता खेल्दा हामीलाई कुन जर्सी लगाउने भन्ने द्विविधा हुन्थ्यो, प्रायोजन पाइसकेपछि सजिलो भएको छ,’ सातपल्टकी नेपाल च्याम्पियन नविताले पत्रकार सम्मेलनमा भनिन् ।


गत भदौमा भएको एसियाली खेलकुदको तयारीका क्रममा नेपाली टिमले भारतमा प्रशिक्षण गरेको थियो । त्यसक्रममा भारतमै केन्द्रीय कार्यालय रहेको स्टयाग कम्पनीको प्रायोजनबारे थाहा पाएका नविता र स्यान्टुले ब्रान्ड एम्बासडरका लागि पहल थालेका थिए ।


उनीहरूलाई भारतीय टेबलटेनिस संघका उपाध्यक्ष चेतन गुरुङले पनि सहयोग गरेका थिए । ‘एक महिनाको प्रशिक्षणमा बस्दा त्यहाँका खेलाडीले यो कम्पनीको किट प्रयोग गरेका देख्यौं र हामीले किन सक्दैनौं भनेर पहल थालेका हौं । पछि हाम्रो संघले सहयोग गरेपछि प्रयास सार्थक भयो,’ नम्बर एक खेलाडी स्यान्टुले भने ।


अध्यक्ष वैद्यका अनुसार खेलाडीले वार्षिक २ देखि ३ लाखसम्मको खेल सामग्री पाउनेछन् । त्यसमा जर्सी, ब्याट, ट्रेनिङ किटलगायत हुनेछ ।

प्रकाशित : माघ १६, २०७५ ०८:११
प्रतिक्रिया
पठाउनुहोस्

दृष्टिविहीन क्रिकेट शृंखला : १० विकेटको जित

कान्तिपुर संवाददाता

काठमाडौँ — नेपाली महिला दृष्टिविहीन क्रिकेट टोलीले पाकिस्तानलाई १० विकेटले हराउँदै अन्तर्राष्ट्रिय महिला दृष्टिविहीन क्रिकेट शृंखलामा सफल सुरुआत गरेको छ । दृष्टिविहीन महिला क्रिकेट शृंखला विश्वमै पहिलोपल्ट आयोजना भएको हो । पहिलो खेलमा जितपछि नेपालले ५ खेलको शृंखलामा १–० को अग्रता बनाएको छ । 

लाहोरमा पाकिस्तानविरुद्ध जित पाएपछि नेपाली दृष्टिविहीन महिला खेलाडी  । तस्बिर सौजन्य : एनएसजेएफ

लाहोरस्थित किन्नर्ड कलेजको मैदानमा मंगलबार नेपाली बलरले उत्कृष्ट प्रदर्शन गरेपछि घरेलु टोली पाकिस्तान ५३ रनमै अलआउट भयो । ५४ रनको सामान्य लक्ष्य नेपालले ५.३ ओभरमै बिनाक्षति पूरा गर्‍यो । विनिता पुनले २८ रन बनाइन् । १९ बल खेलेकी उनले ५ चौका समेत प्रहार गरिन् । उनले पहिलो ओभरमै २० रन जोडेकी थिइन् । मन केसीले १४ बल खेल्दै २ चौका मदतमा १९ रन जोडिन् ।

पाकिस्तानका किरन रफिकले सर्वाधिक ९ रन बनाउँदा ४ खेलाडीले खाता समेत खोल्न सकेनन् । पाकिस्तानले १६ रन अतिरिक्तबाट पाएको थियो । नेपालका सरिता घिमिरे र भगवती अम्गाईंले १–१ विकेट लिए । पाकिस्तानका ८ खेलाडी रनआउट भए । विकेटकिपर मन केसी चौधरी र सरिता घिमिरेले समान ४ जनालाई रनआउट गरे ।

उत्कृष्ट फिल्डिङ गर्दै चार रनआउट तथा बलिङमा १ विकेट लिएकी सरिता प्लेयर अफ द म्याच घोषित भइन् । नेपालको जितमा ब्याटिङमा २८ रन बनाएकी विनिता भ्यालुएबल प्लेयर बनिन् । सरिताले १५ हजार र विनिताले ५ हजार पाकिस्तानी रुपैयाँ प्राप्त गरे ।

खेलपछि नेपालकी कप्तान भगवती भट्टराईले पाकिस्तानविरुद्ध खेल्नुअघि केही डर लागे पनि अपेक्षाकृत सहज भएको बताइन् । ‘पाकिस्तानको टिम नयाँ थियो, ६ महिनाअघि मात्र उनीहरूले टिम बनाएका थिए । कस्तो खेल्छ भन्ने थियो । उनीहरूले पनि राम्रो क्रिकेट खेले । हामीले त्यो भन्दा राम्रो खेलेर खेल जित्यौं ।’

अबको खेलमा पनि नेपालले अझै उत्कृष्ट खेल प्रदर्शन गर्ने उनले बताइन् ।

यस्तै पाकिस्तानी कप्तान रबिअ शेहजादीले पहिलो खेल भएका कारण आफूहरूले धेरै कुरा सिक्ने अवसर पाएको बताइन् ।

पाकिस्तान ब्लाइन्ड क्रिकेट काउन्सिलको आयोजनामा विश्वमै पहिलोपल्ट नेपाल र पाकिस्तानको महिला दृष्टिविहीन क्रिकेट टोलीबीच अन्तर्राष्ट्रिय सिरिज भएको हो ।

सिरिजअन्तर्गत अब खेल फैसलावाद र इस्लामाबादमा हुनेछ । दोस्रो खेल बिहीवार फैसलावादमा हुनेछ । नेपाली टोली बुधबार लाहोरबाट फैसलावाद जानेछ ।

प्रकाशित : माघ १६, २०७५ ०८:०९
पूरा पढ्नुहोस्
प्रतिक्रिया
पठाउनुहोस्
×