दृष्टिविहीन क्रिकेट शृंखला : १० विकेटको जित- खेलकुद - कान्तिपुर समाचार

दृष्टिविहीन क्रिकेट शृंखला : १० विकेटको जित

कान्तिपुर संवाददाता

काठमाडौँ — नेपाली महिला दृष्टिविहीन क्रिकेट टोलीले पाकिस्तानलाई १० विकेटले हराउँदै अन्तर्राष्ट्रिय महिला दृष्टिविहीन क्रिकेट शृंखलामा सफल सुरुआत गरेको छ । दृष्टिविहीन महिला क्रिकेट शृंखला विश्वमै पहिलोपल्ट आयोजना भएको हो । पहिलो खेलमा जितपछि नेपालले ५ खेलको शृंखलामा १–० को अग्रता बनाएको छ । 

लाहोरमा पाकिस्तानविरुद्ध जित पाएपछि नेपाली दृष्टिविहीन महिला खेलाडी  । तस्बिर सौजन्य : एनएसजेएफ

लाहोरस्थित किन्नर्ड कलेजको मैदानमा मंगलबार नेपाली बलरले उत्कृष्ट प्रदर्शन गरेपछि घरेलु टोली पाकिस्तान ५३ रनमै अलआउट भयो । ५४ रनको सामान्य लक्ष्य नेपालले ५.३ ओभरमै बिनाक्षति पूरा गर्‍यो । विनिता पुनले २८ रन बनाइन् । १९ बल खेलेकी उनले ५ चौका समेत प्रहार गरिन् । उनले पहिलो ओभरमै २० रन जोडेकी थिइन् । मन केसीले १४ बल खेल्दै २ चौका मदतमा १९ रन जोडिन् ।


पाकिस्तानका किरन रफिकले सर्वाधिक ९ रन बनाउँदा ४ खेलाडीले खाता समेत खोल्न सकेनन् । पाकिस्तानले १६ रन अतिरिक्तबाट पाएको थियो । नेपालका सरिता घिमिरे र भगवती अम्गाईंले १–१ विकेट लिए । पाकिस्तानका ८ खेलाडी रनआउट भए । विकेटकिपर मन केसी चौधरी र सरिता घिमिरेले समान ४ जनालाई रनआउट गरे ।


उत्कृष्ट फिल्डिङ गर्दै चार रनआउट तथा बलिङमा १ विकेट लिएकी सरिता प्लेयर अफ द म्याच घोषित भइन् । नेपालको जितमा ब्याटिङमा २८ रन बनाएकी विनिता भ्यालुएबल प्लेयर बनिन् । सरिताले १५ हजार र विनिताले ५ हजार पाकिस्तानी रुपैयाँ प्राप्त गरे ।


खेलपछि नेपालकी कप्तान भगवती भट्टराईले पाकिस्तानविरुद्ध खेल्नुअघि केही डर लागे पनि अपेक्षाकृत सहज भएको बताइन् । ‘पाकिस्तानको टिम नयाँ थियो, ६ महिनाअघि मात्र उनीहरूले टिम बनाएका थिए । कस्तो खेल्छ भन्ने थियो । उनीहरूले पनि राम्रो क्रिकेट खेले । हामीले त्यो भन्दा राम्रो खेलेर खेल जित्यौं ।’


अबको खेलमा पनि नेपालले अझै उत्कृष्ट खेल प्रदर्शन गर्ने उनले बताइन् ।


यस्तै पाकिस्तानी कप्तान रबिअ शेहजादीले पहिलो खेल भएका कारण आफूहरूले धेरै कुरा सिक्ने अवसर पाएको बताइन् ।


पाकिस्तान ब्लाइन्ड क्रिकेट काउन्सिलको आयोजनामा विश्वमै पहिलोपल्ट नेपाल र पाकिस्तानको महिला दृष्टिविहीन क्रिकेट टोलीबीच अन्तर्राष्ट्रिय सिरिज भएको हो ।


सिरिजअन्तर्गत अब खेल फैसलावाद र इस्लामाबादमा हुनेछ । दोस्रो खेल बिहीवार फैसलावादमा हुनेछ । नेपाली टोली बुधबार लाहोरबाट फैसलावाद जानेछ ।

प्रकाशित : माघ १६, २०७५ ०८:०९
प्रतिक्रिया
पठाउनुहोस्

पुलिसको जितमा अभिषेक नायक

वेदराज पौडेल

इटहरी — सीएफसी भुटानलाई २–० ले पराजित गर्दै नेपाल पुलिस क्लब इटहरीमा जारी मदन भण्डारी स्मृति इटहरी गोल्डकप फुटबलको सेमिफाइनल पुगेको छ । पुलिसका अभिषेक रिजालले दोस्रो हाफको १८ औं मिनेट र इन्जुरी टाइममा एक गोल थप्दै पुलिसलाई विजयी गराए । उनी म्यान अफ द म्याच भए । 

भुटानका हास्दा आलोकको प्रहार रोक्ने प्रयासमा पुलिसका अभिषेक रिजाल (रातो) । तस्बिर : वेदराज/कान्तिपुर

पुलिसले बिहीबार मनाङ मस्र्याङदीसँग दोस्रो सेमिफाइनल प्रतिस्पर्धा गर्नेछ । बुधबार मेची नेत्रालय झापा र आर्मीबीच पहिलो सेमिफाइनल हुनेछ ।

खेलको अन्तिम मिनेटमा भुटानका सिद्धान्तले पेनाल्टी बक्सभित्र निकालेको सुन्दर पासलाई निमाले प्रहार गर्न सकेनन् । उनको सुझबुझपूर्ण प्रहारले भुटानलाई एक गोल गर्ने अवसर थियो । तर बल पोलको दायाँबाट बाहिरियो ।

भुटानी गोलरक्षक निगम सिंहले गरेको गल्ती तत्कालै कप्तान निवास रानाले सच्याए । विपक्षीले बल पन्च गरेको बल बक्सभित्रै खसेपछि निवासले क्लियर गरेका थिए । भुटानका अभिषेक थापाले गरेको प्रहार पुलिसका गोलरक्षक शत्रुधन चौधरीले बचाउ गरे । बल लिएर अघि बढिरहेका अभिषेकलाई फाउल गरेपछि भुटानले पाएको फ्रिकिक आदर्शले सदुपयोग गर्न सकेनन् ।
पुलिसले भुटानका खेलाडीलाई दबाबमा राखे पनि दर्शकको अपेक्षाअनुरुप प्रदर्शन गर्न सकेन । खेलको १७ औं मिनेटमा पाएको राम्रो अवसर पुलिसका अभिषेक रिजालले चुकाएका थिए । पहिलो हाफका उनका प्रयासहरू खेर गए पनि दोस्रो हाफको १८ औं मिनेटमा तीर्थ रानाले मिलाइदिएको पासमा उनले गोल गरेका थिए । निर्धारित समय सकिएपछि थप इन्ज्युरी टाइममा अभिषेकले अर्काे गोल थपेका थिए । उनकै दुई गोल पुलिसको जितमा निर्णायक भयो ।

भुटानका प्रशिक्षक विकास प्रधानले मध्यरात आइपुगेर दिउँसो मैदानमा उत्रनुपर्दा सोचअनुरुप नतिजा ल्याउन नसकिएको बताए । उनले आफ्ना तीन खेलाडी काँकडभिट्टाबाट भिसा समस्याका कारण फर्किएपछि टिमले लयमा खेल्न नसकेको सुनाए । पुलिसका प्रशिक्षक अनन्तराज थापाले इटहरी रंगशालामा खेलाडीले अभ्यास गर्न नपाएका कारण र विपक्षी कस्तो टिम हो भनेर जानकार नहुँदा अपेक्षा गरे जति प्रदर्शन गर्न नसकेको बताए ।

प्रकाशित : माघ १६, २०७५ ०८:०८
पूरा पढ्नुहोस्
प्रतिक्रिया
पठाउनुहोस्
×