शृंखला जित्ने मौका

यूएईका नियमित कप्तान रोहन मुस्ताफासहित अन्य दुई खेलाडी अहमद राजा र रमिज शेहजादलाई क्रिकेट बोर्डले अनुशासन मिचेकामा ८ साता प्रतिबन्ध लगाएको छ । अर्का खेलाडी एडनान मुफ्तीले पनि संन्यास घोषणा गरिसकेकाले नेपालको सम्भावना देखिएको हो ।

एकदिवसीय अन्तर्राष्ट्रिय मान्यता पाएको पछिल्लो राष्ट्र नेपालले सम्हालिने प्रयासमा रहेको यूएईसँग तीनवटा एकदिवसीय अन्तर्राष्ट्रिय शृंखला खेल्दै छ । मार्चमा जिम्बावेमा भएको आईसीसी विश्वकप छनोटबाट नेपालले एकदिवसीय अन्तर्राष्ट्रिय मान्यता पाएको थियो ।

त्यसयता नेपालले तीनवटा मात्र एकदिवसीय अन्तर्राष्ट्रिय खेलेको छ । वरीयतामा आउन कम्तीमा ६ खेल खेल्नुपर्ने हुन्छ । यूएईसँगको शृंखलापछि एकदिवसीय अन्तर्राष्ट्रिय वरीयतामा छिर्ने हुनाले शृंखलामा आफूअनुकूल नतिजा ल्याए नेपालले वरीयतामा राम्रो स्थान बनाउन पनि सक्छ ।

यसअघि खेलेका तीन एकदिवसीय अन्तर्राष्ट्रियमध्ये २ वटामा पराजय भोगेको छ । एक पराजय एसिया कप छनोटमा मलेसियामा यूएईविरुद्ध नै थियो । हाल १४ राष्ट्र रहेको एकदिवसीय अन्तर्राष्ट्रिय वरीयतामा यूएई पुछारमा छ ।