आर्मी स्ट्राइकरको धार 

फ्रेन्ड्स ३–० मछिन्द्र
आर्मी २–१ हिमालयन शेर्पा
ब्रिगेड ब्वाइज ०–१ जावलाखेल
कान्तिपुर संवाददाता

काठमाडौँ — त्रिभुवन आर्मी ‘ए’ डिभिजन लिगका दुई अपराजित टोलीमध्ये एक हो । पहिलो खेलमा एनआरटीसँग बराबरी खेलेको आर्मीले त्यसयताका चारै खेलमा निरन्तर जित निकालेको छ ।

आर्मीका भरत खवासलाई एयर बलमा चुनौती तेस्र्याउँदै हिमालयन शेर्पाका उलरिच सिडेव । तस्बिर : हेमन्त श्रेष्ठ/कान्तिपुर 

आर्मीमा राष्ट्रिय टिमका तीन स्ट्राइकर छन्, भरत खवास, नवयुग श्रेष्ठ र जर्जप्रिन्स कार्की । नवयुग चोटग्रस्त छन् भने जर्जप्रिन्स विभागीय प्रशिक्षणमा छन् । भरतको दुई गोल सहयोगमा आर्मीले आइतबार हिमालयन शेर्पालाई २–१ ले पराजित गर्‍यो ।

पछिल्लो चरणका खेलबाट मात्र आर्मीका स्ट्राइकरले गोल गर्न सके । पाँचौं चरणमा त्यसले निरन्तरता पायो । आर्मीको पाँच खेलबाट १३ अंक भएको छ र शीर्षस्थानमा मनाङसँगको दूरी २ अंकमा झारेको छ । शेर्पा भने समान खेलबाट १० अंकसहित छैटौं स्थानमा झरेको छ ।

फिनिसिङमा देखिएको केही कमजोरीलाई छाड्ने हो भने भरतले लिगमा पुनरागमन गरेका छन् । महत्त्वपूर्ण तीन अंक जोडेर शीर्षस्थानको मनाङमाथि दबाब कायम राख्न सकेकामा प्रशिक्षक नवीन न्यौपानेले राहतको महसुस गरे । ‘लिगका सुरुआती तीन खेलमा स्ट्राइकरबाट गोल निस्कन नसक्नु चिन्ताको विषय थियो । चौथो र पाँचौं चरणसम्म आउँदा भरतले गोल गर्न थालेका छन्, यो हाम्रा लागि सकारात्मक कुरा हो,’ प्रशिक्षक न्यौपानेले थपे, ‘तीन अंक हाम्रा लागि यसकारण पनि महत्त्वपूर्ण छ कि हामीले मनाङलाई पछ्याइरहनु छ र उसमाथि दबाब कायम राखिराख्नु छ ।’

शेर्पाविरुद्ध भरतले पहिलो हाफमा गोल गरे पनि बाँकी दुई अवसरमा चुकेका थिए । यद्यपि ३३ औं मिनेटमा सन्तोष तामाङको कर्नरमा पेनाल्टी एरियामा अनमार्क रहेका भरतले सानदार हेडिङ गोल गरे ।
पहिलो हाफ पूरै आर्मीले नियन्त्रणमा राखेको थियो । सन्तोषको पासमा टंक बस्नेतले आठौं र २४ औं मिनेटमा गोलको अवसर खेर फाले । शेर्पाले भने गोलको एउटा अवसर पाएको थियो । २१ औं मिनेटमा विश्वासको क्रसमा कर्ण लिम्बूले गोल लाइनबाट हेड बल टच गर्न सकेनन् ।

दोस्रो हाफमा आर्मी एकाएक रक्षात्मक देखियो । एक गोलको अग्रतामै सुरक्षित महसुस गरेको आर्मीले दबाब खेपे पनि शेर्पालाई सजिलै गोल गर्न दिएन । आर्मी दोस्रो हाफमा शेर्पाको आक्रमण रोक्दैमा व्यस्त देखियो । ८५ औं मिनेटमा भरतले व्यक्तिगत दोस्रो गोल गरे । दिनेशको क्रसमा किपर बिट भएपछि भरतले ट्यापिङ गरी सहज गोल गरे । त्यसको एक मिनेटपछि नै अलरिचले १८ यार्डबाट पहिलो बार च्यापेर गरेको प्रहार आर्मीका गोलरक्षक विकेशले जज गर्नै सकेनन् ।

‘समयमै गोल निस्कियो र आर्मी जोगियो । अन्यथा दोस्रो हाफमा लिएको रक्षात्मक रणनीति आर्मीका लागि प्रत्युत्पादक हुन सक्थ्यो । हामी दोस्रो हाफमा डिफेन्सिभ र काउन्टर एट्याकमा गोल निकाल्ने रणनीतिमा थियौं । त्यसैले हामी दबाबमा देखियौं,’ खेलपछि आर्मीका प्रशिक्षक न्यौपानेले भने ।

लिगमा पहिलो हार व्यहोरेको शेर्पाका प्रशिक्षक सुवास लिम्बूले अवसर सदुपयोग गर्न नसक्दा हार बेहोर्नुपरेको बताए । ‘हामीले उत्तिकै अवसर सृजना गरेका हौं, अघिल्ला चरणमा भन्दा राम्रो पनि भएको हो । तर, स्ट्राइकरले अवसर उपयोग गर्न सकेनन्,’ लिम्बूले थपे, ‘लिगमा हाम्रो लक्ष्य शीर्ष ६ भित्र पर्ने हो । पहिलो खेल हारेका मात्र हौं, बाहिरिएका छैनौं, अन्य खेलमा अझै राम्रो खेल्ने प्रयास गर्नेछौं ।’ सुवासले भने ।

आइतबारकै पहिलो खेलमा अन्तिम ३० मिनेटमा ३ गोल गरी फ्रेन्ड्स क्लबले जारी लिगमा पहिलो जित आत्मसात् गरेको छ । फोफाना ब्राहिमनले ६६ औं, संजोग महर्जनले ८४ औं र अनिल महर्जनले इन्ज्युरी समयको अन्तिम मिनेटमा गोल गरे ।

लिगमा जित निकाल्न असफल मछिन्द्रले अहिलेसम्म एक गोल पनि गर्न सकेको छैन । गोल गर्न नसक्ने मछिन्द्र एक्लो टिम हो । जितपछि फ्रेन्ड्सको चार अंक भएको छ र लिगको नवौं स्थानमा उक्लिएको छ । २ अंक भएको मछिन्द्र भने पुछारबाट दोस्रो स्थानमा छ ।

हल्चोक मैदानमा ललितपुरको अर्को टिम ग्रान्डमास्टर जावलाखेल युथ क्लबले पनि लिगमा पहिलो जित निकाल्ने क्रममा ब्रिगेड ब्वाइज क्लबलाई १–० ले हरायो । खेलको ८८ औं मिनेटमा पाएको पेनाल्टीमा अरुज सिंहले गोल गरे । जितले जावलाखेल दसौं स्थानमा उक्लँदा ब्रिगेड ब्वाइज बाह्रौं स्थानमा झरेको छ ।

प्रकाशित : मंसिर १७, २०७५ ०९:२५
प्रतिक्रिया
पठाउनुहोस्

डर्बीमा आर्सनलको सान

एएफपी

लन्डन — तनावपूर्ण लन्डन डर्बीमा टोटेनहमविरुद्ध ४–२ गोलको जित हासिल गरी आर्सनल इंग्लिस प्रिमियर लिगको चौथो स्थानमा उक्लिएको छ ।

चेल्सीका पेड्रो गोल गरेपछि ।तस्बिर : एपी

इमिरेट्स रंगशालामा सुरुआतमै पिएरे एमरिक उवामेयाङको पेनाल्टी गोलमा घरेलु टोलीले अग्रता लिए पनि एरिक डायर रह्यारी केनले चार मिनेटको अन्तरमा २ गोल गरेपछि टोटेनहमले पहिलो हाफमा २–१ को अग्रता लिएको थियो । केनले पेनाल्टीमा गोल गरे ।

दोस्रो हाफ आर्सनलले एकपक्षीय बनायो । ५६ औं मिनेटमा उवामेयाङले व्यक्तिगत दोस्रो गोल गर्दा अलेक्जान्द्रे लाकाजेट्टले ७४ औं र लुकास टोरेइराले ७७ औं मिनेटमा गोल गरे । जान भर्टोनघनले ८५औं मिनेटमा दोस्रो पहेंलो कार्ड खाएपछि टोटेनहम १० खेलाडीमा सीमित भयो ।

आर्सनल १४ खेलबाट ३० अंकसहित चौथो स्थानमा उक्लँदा टोटेनहम समान अंक भए पनि गोल अन्तरमा पछि परेको छ । ३१ अंकसहित चेल्सी तेस्रो स्थानमा छ ।

चेल्सीले स्थानीय प्रतिस्पर्धी फुलहमलाई २–० गोलले हराउँदै उत्कृष्ट पुनरागमन गरेको छ । पेड्रो र रुवेन लोफ्ट–चेकको गोलले औसत प्रदर्शनमा चेल्सी विजयी भयो । स्टामफोर्ड ब्रिजमा सुरुआतमै गोल गरेर पेड्रोले सानदार सुरुआत दिलाएका थिए । त्यसयता चेल्सी आफ्नो लय भेट्टाउन संघर्षरत देखियो ।

अन्तिममा लफ्टस–चेकले दोस्रो गोल गरी जित निश्चित गराए । फुलहमको जिम्मेवारी सम्हालेको दोस्रो खेलमै चेल्सीले आफ्ना पूर्वप्रशिक्षक क्लाउडियो रिनेरीलाई स्टामफोर्ड ब्रिजमा स्वागत गरेको थियो ।
शनिबार म्यानचेस्टर युनाइटेडले रेलिगेसनबाट बच्न संघर्षरत साउथ ह्याम्टनसँग दुई–दुई गोलको बराबरी खेल्यो ।

सबै गोल पहिलो हाफमै भएको खेलमा स्टुवार्ट आम्स्ट्रङ र सेर्डिक सोआरेसले अग्रता बनाएका थिए । तर, रोमेलु लुकाकु र एन्डर हरेराले गोल गरेपछि खेल बराबरीमा आयो । दोस्रो हाफमा साउथह्याम्पटनले आफ्नो मैदानमा युनाइटेडलाई गोलको अवसर दिएन ।

युभेन्ट्सको लगातार पाँचौं जित
मिलान– क्रिस्टियानो रोनाल्डोको पेनाल्टी गोलसँगै डिफेन्डिङ च्याम्पियन युभेन्ट्सले शनिबार फियोरेन्टिनालाई ३–० ले हराएर सिरी ‘ए’ मा आफ्नो प्रभावलाई अझ बलियो बनाएको छ । लगातार आठौंपल्ट लिग च्याम्पियन बन्ने दाउमा रहेको युभेन्ट्सले जितसँगै ११ अंकको अग्रता बनायो ।

रोनाल्डोले लिगको १४ खेलमा १० औं गोल गरेका हुन् । उनले पेनाल्टीमार्फत ७९ औं मिनेटमा गोल गरे । थप गोल रोडरिगो बेन्तान्चुर र कप्तान जर्जियो केलिनीले गरेका थिए । पोर्चुगिज स्टार रोनाल्डोले पहेंलो कार्ड पाएपछि यो सिजनमै पहिलोपल्ट सब्स्टिच्युट गरिएको थियो र उनले अन्तिम दस मिनेट बेन्चमा बिताए ।

‘टिमका रूपमा उत्कृष्ट । महत्त्वपूर्ण जित,’ पाँचपल्टका बेलन डि’अर विजेता रोनाल्डोले भने । मासिमिलानो एलिग्रीको टिमले १४ खेलबाट ४० अंक जोडेको छ । दोस्रो स्थानमा रहेको नेपोलीको
एट्लान्टाविरुद्ध सोमबार खेल्नुअघि २९ अंक रहेको छ ।

युभेन्टसको यो लगातार पाँचौं जित हो र लिगका १४ खेलमध्ये १३ औं जित पनि । युभेन्ट्सले विपक्षीको मैदानमा खेलेका सबै खेल जितेको छ । उसले घरेलु मैदानमा जेनोआविरुद्ध मात्र बराबरी खेलेको थियो ।

‘यो महान् विजेता र महान् प्रतिभाशालीको टिम हो तर सबै महान् मान्छेहरूमाथि,’ एलिग्रीले भने, ‘एक्लैको टेक्निक पर्याप्त हुन्न । चाहना राख्नु आवश्यक छ । टिमका सहकर्मीहरूसँगै काम गरेर विपक्षीलाई तल पार्ने चुनौतीको सामना गर्ने खेलाडी चाहिन्छ,’ उनले थपे, ‘हामीलाई कठिनाइ थाहा छ । तर, हामीले चाँडै खेलमा वर्चस्व जमायौं । दोस्रो हाफमा फियोरेन्टिनाले समस्यामा पारे पनि हामी जितका लागि योग्य थियौं ।’

प्रकाशित : मंसिर १७, २०७५ ०९:२३
पूरा पढ्नुहोस्
प्रतिक्रिया
पठाउनुहोस्