एभीएल भलिबल: चितवन टाइग्रेस च्याम्पियन

सुबास हुमागार्इं

काठमाडौँ — नेपाली महिला भलिबलमा एकल वर्चस्व जमाएको नेपाल एपीएफ क्लबलाई एकपक्षीय फाइनलमा पराजित गर्दै चितवन टाइग्रेसले आधीआवादी महिला भलिबल लिग (एभीएल) को उपाधि जितेको छ ।

एभीएल उपाधिसाथ चितवन टाइग्रेसको टोली । तस्बिर : इलिट जोशी

त्रिपुरेश्वरस्थित राखेप कभर्डहलमा बुधबार फितलो प्रदर्शन गरेपछि एपीएफ वर्षको पाँचौं उपाधि जित्न असफल रह्यो । उपाधिसँगै चितवनले ६ लाख र एपीएफले ३ लाख रुपैयाँ पुरस्कार पाए । यो महिला भलिबलमा सर्वाधिक राशिको पुरस्कार हो ।


नेपाल भलिबल संघ र आधीआवादी फाउन्डेसनको संयुक्त आयोजनामा भएको प्रतियोगिताको फाइनलमा तीन अमेरिकी खेलाडीसहित उत्रिएको चितवनले खेलको सुरुआतदेखि नै एपीएफलाई दबाबमा राखेको थियो । पश्चिमाञ्चलबाट खेल्ने स्टार खेलाडीद्वय मन्जु गुरुङ (कप्तान) र अरुणा शाहीको पनि साथ पाएको चितवनले सुरुदेखि बनाएको अग्रता कुनै समय गुमाएन । जसले गर्दा सोझो सेटमै फाइनलको फैसला भयो । प्रतिस्पर्धात्मक पहिलो सेटमा चितवन २५–२० ले अघि रह्यो ।


दोस्रो सेटमा एपीएफले कडा चुनौती प्रस्तुत गर्दै चितवनलाई सहजै अग्रता लिन दिएन । एकसमय १२–८ ले अघि रहेको एपीएफ चितवनले टाइमआउट लिएपछि १३–१२ ले पछाडि परेको थियो । चितवनले उक्तलय कायम राख्दै दोस्रो सेट २५–१७ ले आफ्नो पक्षमा पार्‍यो । तेस्रो सेटमा सुरुदेखि नै लगातार गल्ती दोहोर्‍याएपछि हतोत्साही देखिएको एपीएफले २५–११ को अन्तरमा गुमायो ।

सर्वोत्कृष्ट खेलाडी अरुणा शाही स्कुटरसहित ।


एपीएफले यसअघि चारै प्रतियोगिताको उपाधि जितेको थियो । एपीएफले काठमाडौंमा आयोजित शेरबहादुर स्मृति कप र एनभीए क्लब लिग तथा पोखरामा आयोजित तीज कपको फाइनलमा न्यु डायमन्डलाई पराजित गरेको थियो । न्यु डायमन्ड सहभागी हुन नपाएको सभामुख कपमा भने पुलिस फाइनलमा पराजित भएको थियो । यस प्रतियोगिताको सेमिफाइनलमा पनि एपीएफले डायमन्डलाई सेमिफाइनलमा हराएको थियो ।


प्रतियोगिताको उत्कृष्ट खेलाडीमा चितवनकी अरुणा शाही घोषित भइन् । उनले स्कुटरसहित ५० हजार रुपैयाँ प्राप्त गरिन् । सेटरको भूमिकामा रहेकी अरुणाले प्रभावशाली प्रदर्शन गर्दै विदेशी खेलाडीलाई राम्रो साथ दिइन् । यसअघि पनि न्यु डायमन्डको टोलीबाट खेलेकी अरुणाले यस प्रतियोगिताबाट आफ्नो प्रदर्शन अझै सुध्रिएको प्रमाणित गरेकी छन् । विगतमा पश्चिमान्चलको टोलीमा स्पाइकरको भूमिका निभाएकी अरुणा काँधको चोट र न्यु डायमन्डमा आवश्यकता पर्दा सेटरको भूमिकामा देखिएकी थिइन् ।

एपीएफविरुद्ध स्पाइक प्रहार गर्दै चितवन टाइग्रेसकी विदेशी खेलाडी  ।तस्बिरहरू : इलिट जोशी


विदेशी खेलाडीको अग्लो उचाइ र शक्तिशाली प्रहारलाई एपीएफको डिफेन्सले रोक्न सकेन । बलियो विपक्षीविरुद्ध अपेक्षित प्रदर्शन गर्न नसक्दा टोलीले हारको सामना गर्नुपरेको हो । विजेता टोलीका विदेशी प्रशिक्षक कोरी सोलोमनले विदेशी खेलाडी हाबी हुँदा जित सहज भएको स्वीकारे । ‘हामीसँग भएका विदेशी खेलाडीको उचाइ नेपाली खेलाडीभन्दा अग्ला थिए । त्यसको फाइदा उठाउँदै हामीले लगातार अंक बटुल्न सक्यौं,’ उनले भने । निकै अपेक्षा गरिएका एपीएफका ब्लकर हीरा केसी, स्पाइकर सरस्वती चौधरी, सेटर तथा कप्तान विनिता बुढाथोकी र रेश्मा भण्डारीले अपेक्षित प्रदर्शन गर्न सकेनन् ।


अमेरिकामा विश्वविद्यालय स्तरको प्रशिक्षक रहेका सोलोमनले नेपाली भलिबलको स्तर पनि राम्रो रहेको बताए । ‘नेपालको भलिबल स्तर राम्रो छ । यस्तो प्रतियोगिताले खेल सुधार्न महत्त्पूर्ण भूमिका खेल्छ । आफूभन्दा माथिल्लो स्तरका विदेशी खेलाडीसँग खेल्दा आफ्नो खेल पनि बढ्छ,’ उनले थपे, ‘प्रतियोगिता निकै राम्रो थियो । नियमित आयोजनाले खेलाडीको विकासमा नै सघाउ पुग्छ । यस किसिमका प्रतियोगिता भइरहे म फेरि यहाँ आउन तयार छु ।’


एपीएफका प्रशिक्षक ज्ञानेन्द्र विष्टले खेलाडीले आफ्नो नियमित खेल प्रदर्शन गर्न नसक्दा हार्नुपरेको बताए । ‘अग्ला विदेशी खेलाडी देखेपछि खेलाडीको मनोबल गिर्‍यो । उनीहरूले नियमित खेल पनि प्रदर्शन गर्न सकेनन् । हाम्रो रिसिभमा पनि समस्या देखियो,’ उनले भने । प्रशिक्षक विष्टले अघिल्लो दिन सेमिफाइनल जितेपछि आफ्नो टोली चितवनका विदेशी खेलाडीविरुद्ध खेल्न तयार रहेको अभिव्यक्ति दिएका थिए ।


अमेरिकी खेलाडीमध्ये ओपन स्पाइकर जोस्लिन बिर्कसले नेपालमा खेल्दाको अनुभव विशेष रहेको सुनाइन् । ‘हामी तीनैजनाको उचाइ नेपाली खेलाडीभन्दा बढी छ । यसका बाबजुद यहाँका खेलाडीको डिफेन्स गर्ने शैली मनपर्‍यो । हामीहरूको खेल नेपाली खेलाडीसँग मिलाएर लग्न सहज भयो,’ उनले भनिन् । प्रशिक्षक सोलोमनका अनुसार तीनै खेलाडी विश्वविद्यालय स्तरबाट व्यावसायिक भलिबलतर्फ करिअर बनाउन युरोपका स्वीडेन, फ्रान्सलगायतका देशमा पुग्ने गरेका छन् ।


बुधबारै तेस्रो स्थानको खेलमा न्यु डायमन्ड क्लबले नेपाल पुलिस क्लबलाई सोझो सेटमा पराजित गर्‍यो । न्यु डायमन्डले २५–१८, २५–२१, २५–१९ को जित दर्ता गर्दै १ लाख ५० हजार रुपैयाँ प्राप्त गर्‍यो ।

प्रकाशित : आश्विन १८, २०७५ ०७:५८
ADVERTISEMENT
प्रतिक्रिया
पठाउनुहोस्
ADVERTISEMENT

१८ बलमै जित

कान्तिपुर संवाददाता

काठमाडौँ — अपेक्षा के थियो भने नेपालले म्यानमारको सामना गर्दा सहज जितमात्र निस्कने छैन । जितमा धेरै कीर्तिमान पनि बन्ने छन् । हुन पनि क्रिकेटको आधार नै तयार नभएको देशमाथि नितान्त एकपक्षीय जित निस्कनुपर्ने हो ।

प्लेयर अफ द म्याच बनेका सन्दीप लामिछाने । तस्बिर सौजन्य : रमन सिवाकोटी

तर आईसीसी वल्र्ड ट्वान्टी–२० एसिया रिजिनल क्वालिफायरमा नेपालले बुधबार यही म्यानमारलाई हराउँदा सोचेजस्तो जित रहेन । नेपाल त्यस खेलमा ८ विकेटले विजयी रह्यो । यसमा म्यानमारका खेलाडीसँग सकारात्मक रहने कुनै न कुनै आधार हुनेछ ।


मलेसियाको क्वालालम्पुरमा भएको खेलमा म्यानमारले टस जितेर पहिलो ब्याटिङको अपेक्षित निर्णय गर्‍यो । यसक्रममा १० ओभरमात्र टिकेर २९ रन बनायो । म्यानमारका लागि एक ब्याट्सम्यानले मात्र दोहोरो रन बनाए । ती रहे कप्तान लिन आङ । उनले १६ रन बनाए । त्यसबाहेक सर्वाधिक स्कोर प्रारम्भिक ब्याट्सम्यान को लिन थुको रह्यो । उनको ब्याटबाट ४ रन निस्केको थियो । अरु ६ ब्याट्सम्यानले खाता नै खोल्न सकेनन् ।


म्यानमारलाई सस्तोमा समेट्न सन्दीप लामिछाने निर्णायक रहे । उनले ३ रनमात्र खर्चे र ४ विकेट लिए । म्यानमारले २३ रन बनाउँदा तीन विकेटमात्र गुमाएको थियो । त्यसयता उसले थप ६ रनमा बाँकी सबै विकेट गुमायो । म्यानमारलाई जति दु:ख ब्याटिङ प्रदर्शनमा हुनेछ, त्यत्तिकै खुसी बलिङमा रहने छ । नेपालले ३० रन बनाउँदासम्म २ विकेट गुमाएको थियो । प्रारम्भिक ब्याट्सम्यान प्रदीप ऐरी टेट वाइको बलमा शून्यमै आउट भए ।


त्यसयता अनिल शाह ११ रन बनाएर पाइङ दानुको बलमा एलबीडब्लु आउट भए । नेपाललाई जितसम्म पुग्न ३ ओभरमात्र आवश्यक परेको थियो । खासमा यो जित पनि एकपक्षीयजस्तै हो, तर धेरैले नेपालले यसअघि यही म्यानमारमाथि प्राप्त जितसँग तुलना गर्नेछन् । सन् २००६ मा म्यानमारले १० रन बनाएयता नेपालले दुई बलमै जितसम्मको यात्रा तय गरेको थियो ।


यसअघि भएका खेलमा थाइल्यान्ड र मलेसिया विजयी रहे । जहाँ थाइल्यान्डको जित निकै सहज रह्यो, त्यहीं मलेसिया भने जितका लागि पसिना बगाउन बाध्य रह्यो । दिनको पहिलो खेलमा थाइल्यान्डले चीनलाई १० विकेटले हरायो । जितका लागि ३६ रनको लक्ष्य पाएको थाइल्यान्डले २ ओभर ४ बलमा त्यसलाई पूरा गरेको थियो । चीन २० ओभर त टिक्न सफल रह्यो, तर त्यसबीचमा ९ विकेट गुमाएर ३५ रनमात्र बनाउन सक्यो ।


चीनबाट कोही पनि ब्याट्सम्यानले दोहोरो अंक छुन सकेनन् । उसका लागि नवौं क्रमका ब्याट्सम्यान या वाङले सर्वाधिक ८ रन बनाए । थाई बलरमध्ये ड्यानियल ज्याकोब्सले ३ विकेट लिए । उनले नै थाई इनिङ्सको सुरुआत पनि गरे । उनी १९ रन बनाएर नटआउट रहे ।


अर्को खेलमा मलेसियाले पहिले ब्याटिङ गर्दै ६ विकेट गुमाएर १ सय ५४ रन बनाएको थियो । मलेसियाले १२ रनमात्र बनाउँदा ३ विकेट गुमाएको थियो र दबाबमा देखिएको थियो । यो स्थिति बनाउन भुटानका सन्जिवन गुरुङले ३ विकेट लिए । तर मध्य र तल्लो क्रमका ब्याट्सम्यानले मलेसियाका लागि खुलेर रन बनाए । सुसन अल्गारत्नम्ले सर्वाधिक ३५ रन बनाए । यस्तै सरविन मुनियान्डीले ३१ रनको योगदान दिए र उनी नटआउट रहे । जवाफमा भुटानले २० ओभरमा ९ विकेट गुमाएर ८७ रन बनायो ।


उसका लागि प्रारम्भिक ब्याट्सम्यान जिग्मे सिंङगेले सर्वाधिक २१ रन बनाए । मलेसियाली बलरमध्ये अनवर रहमान घातक साबित भए । उनले ८ रनमा ४ विकेट लिए । तीन खेल समाप्तिमा थाइल्यान्ड रनरेटको आधारमा शीर्षस्थानमा छ भने नेपालले त्यसभन्दा पछि दोस्रोमा छ । नेपालले अर्को खेल शनिबार आयोजक मलेसियासँग खेल्ने छ।

प्रकाशित : आश्विन १८, २०७५ ०७:५७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
×