सहिद स्मारक लिग : तालिकाअनुसार खेल अन्याैलमा

बंगबन्धु सहभागिता अझै टुंगो लागेन
सुबास हुमागाईं

काठमाडौँ — अखिल नेपाल फुटबल संघ (एन्फा) ले पछिल्लो ५ वर्षदेखि रोकिएको शीर्ष श्रेणीको सहिद स्मारक ’ए’ डिभिजन लिग फुटबल प्रतियोगिता असोज १३ गतेबाट सुरु गर्ने बताउँदै आएको छ ।

लिग सुरु गर्नकै लागि बुधबार सबै क्लबलाई सामेल गराएर खुला ‘ड्र’ मार्फत खेल तालिका पनि निकालियो । तर तालिका सार्वजनिक भएलगत्तै लिगका निर्देशक सञ्जीव मिश्रले नेपालले बंगबन्धु कपमा सहभागिता जनाएको खण्डमा राष्ट्रिय टोलीका खेलाडी भएका क्लबको खेल भने नहुने बताए ।

लिग तालिकाअनुसार दसैंअगाडि लिगको तीन चरणका खेल हुनेछन् । दसैं र तिहारका लागि ५ साता विश्रामपछि बाँकी १० चरणका खेल हुनेछन् । लिगको अन्तिम खेल पुस १७ गते संकटा र एपीएफबीच हुने एन्फाको तालिकामा उल्लेखित छ । तर नेपालले बंगबन्धु कपमा सहभागिता जनाउँदै फाइनल पुगेको खण्डमा तालिकाअनुसार दसैंअघिका कुनै खेल पनि आयोजना गर्न सम्भव हुँदैन ।

एन्फाले यसपटक एक चरणका खेल समाप्त नभई अर्को चरण खेल नगर्ने निर्णय गर्दा लिग नै अन्योलमा परेको छ । यसले गर्दा पनि राष्ट्रिय टोलीका खेलाडी नभएका क्लबको मात्र खेल सञ्चालन गर्न समस्या भएको हो । नेपालले बंगबन्धु खेलेको स्थितिमा पहिलो चरणको खेलबाट सरस्वती र संकटाबीचको खेलमात्र सम्भव हुने देखिएको छ । हालसम्म राष्ट्रिय टोलीका खेलाडी अनुबन्ध नगर्ने क्लब सम्मिलित खेल यी दुई क्लबको मात्र रहेको छ ।

बंगबन्धु कपमा नेपालसँगै प्यालेस्टाइन र ताजकिस्तान समूह ‘ए’ मा रहेका छन् । समूह चरणमा नेपालले पहिलो खेल ताजकिस्तानविरुद्ध असोज १६ गते खेल्नेछ । दोस्रो खेल असोज २० गते प्यालेस्टाइनविरुद्ध हुनेछ । सेमिफाइनल असोज २३ र २४ तथा फाइनल २६ गते हुनेछ । समूह चरणको खेल सिल्हेटमा हुनेछ भने सेमिफाइनल कक्स बजार र फाइनल ढाकास्थित बंगबन्धु राष्ट्रिय रंगशालामा हुनेछ । प्रतियोगिताको डिफेन्डिङ च्याम्पियन नेपालले बंगबन्धु गोल्डकपको फाइनल यात्रा तय गरेमा लिगको तीन चरणका खेल प्रभावित हुनेछन्, जुन एन्फाले दसैंअगाडि राखेको छ । लिग तालिकाअनुसार असोज २६ गतेसम्म मात्र दसैंअघिका खेल हुनेछन् ।

एन्फा प्रवक्ता किरण राईले पनि बंगबन्धु कपको सहभागिता र लिग सञ्चालन बाँझिँदा अहिले अन्योलको स्थिति सिर्जना भएको स्वीकारे । ‘बंगलादेशले बाँकी पैसा नतिरेसम्म राष्ट्रिय टोलीको प्रशिक्षण सुरु गर्ने छैनौं । खेलाडीहरू अहिले क्लबमै छन् । बंगबन्धु कप र लिग सुरु हुने मिति एकैपटक हुँदा अन्योलको स्थिति छ । छिट्टै उचित विकल्प लिएर क्लब र राष्ट्रिय टोलीको समस्या हटाउनेछौं,’ उनले भने । राष्ट्रिय टोलीको प्रशिक्षण सुरु गरेपछि क्लबले खेलाडी छाड्नुपर्ने एन्फाले बताएको छ ।


क्लबका प्रशिक्षक भने क्लब र राष्ट्रिय टोलीमध्ये कहाँ खेल्ने अन्योललाई दुवै पक्ष बसेर सुल्झाउनु उचित हुने बताउँछन् । थ्री–स्टार क्लबका प्रशिक्षक मेघराज केसीले राष्ट्रिय टोलीका खेलाडीबिना लिग खेल्न सम्भव नहुने तर क्लब र एन्फाले उचित विकल्प निकाल्न आवश्यक रहेको बताए । ‘राष्ट्रिय टोलीले खेल्दा खेलाडी उपलब्ध नगराउने भन्ने हुँदैन । क्लबले फुटबल खेल्ने पनि राष्ट्रिय टोलीको प्रदर्शन राम्रो गर्न हो । एन्फाले लिग र राष्ट्रिय टोली दुवैलाई असर नपर्ने विकल्प ल्याउनु जरुरी छ,’ उनले भने ।

संकटा क्लबका प्रशिक्षक सल्यान खड्गीले पनि ठूला टोलीलाई राष्ट्रिय खेलाडीबिना लिग खेल्न सम्भव नहुने बताउँछन् । ‘ठूला क्लबलाई राष्ट्रिय खेलाडीबिना लिग खेल भन्ने अवस्था छैन । सबै क्लबले खेलाडीलाई नियमित तलब दिएर लिगका लागि तयार गरिरहेका छन् । राष्ट्रिय टोलीमा नै लिग नभएका कारण खेलाडीको कमी छ । अहिलेको अवस्थामा लिग महत्त्वपूर्ण छ, तर यसको मतलब राष्ट्रिय टोली छैन भन्ने होइन । एन्फाले क्लबहरूसँग बसेर छिट्टै समाधान खोज्नुपर्छ,’ उनले भने ।

प्रकाशित : आश्विन ५, २०७५ ०९:३५
प्रतिक्रिया
पठाउनुहोस्

अन्तत: लिग हुने

सुबास हुमागाईं

काठमाडौँ — अखिल नेपाल फुटबल संघ (एन्फा) ले ५ वर्षको अन्तरालपछि सहिद स्मारक ‘ए’ डिभिजन लिग असोज १३ गतेबाट नै सुरु गर्ने निर्णय गरेको छ ।

आइतबार सातदोबाटोस्थित संघ परिसरमा आयोजित कार्यक्रममा लिग आयोजक समितिले १४ टोली सहभागी लिगमा रेलिगेसनको प्रावधानबिना नै सञ्चालन गर्ने अन्तिम निर्णय सार्वजनिक गरेको हो । पछिल्लोपटक २०७० सालमा मनाङ–मर्याङ्दी क्लबले ‘ए’ डिभिजन लिग जितेपछि एन्फाले प्रतियोगिता आयोजना गर्न सकेको थिएन । यसपटक ‘फुटबल बचाउन’ रेलिगेसनबिना नै लिग सञ्चालन गर्नुपर्ने अवस्था आएको लिग समितिका संयोजक विज्ञानराज शर्माले बताए ।

पुससम्म चल्ने लिगमा ९१ खेल हुनेछन् र लिगका सम्पूर्ण खेल सातदोबाटोस्थित एन्फा कम्प्लेक्सको मैदान र हलचोकस्थित एपीएफ रंगशालामा सञ्चालन हुनेछ । लिग फुटबल (ए, बी र सी डिभिजन) का लागि विश्व फुटबलको सर्वोच्च संस्था फिफाले ६ लाख ८८ हजार अमेरिकी डलर सहयोग गरेको पनि एन्फाले जानकारी दियो । यसबाहेक एन्फाले लिगको बजार व्यवस्थापन अधिकार १ करोड रुपैयाँमा रामसर मिडिया प्रालिलाई बेचेको छ । टेलिभिजन प्रसारण अधिकारबारे भने संघ अझै पनि छलफलमा रहेको कार्यक्रममा जानकारी दिइयो ।

यसपटक पुरस्कार राशिमा समायोजन गर्दै ५ करोड ८० लाख अनुमानित लागतमा राउन्ड रोबिन प्रणालीमा लिग हुने भएको हो । एन्फाले सहभागी सबै टोलीलाई तयारी खर्चबापत २० लाख रुपैयाँ प्रदान गर्नेछ । लिगको विजेताले ५० लाख, उपविजेताले ३५ लाख र तेस्रो स्थान हासिल गर्नेले २५ लाख रुपैयाँ प्राप्त गर्नेछन् ।

चौथोदेखि छैटौं स्थान हासिल गर्नेले क्रमश: १५, ७ र ५ लाख रुपैयाँ पाउनेछन् । व्यक्तिगत विधातर्फ उत्कृष्ट प्रशिक्षक, गोलरक्षक, डिफेन्स, मिडफिल्ड र फरवार्डले मोटरसाइकल प्राप्त गर्नेछन् भने प्रत्येक खेलका म्यान अफ द म्याचले १० हजार रुपैयाँ पाउनेछन् । यसअघि ‘ए’ डिभिजन लिगको विजेताले ७५ लाख तथा राष्ट्रिय लिग विजेताले १ करोड रुपैयाँ प्राप्त गरेका थिए । वर्तमान कार्यसमितिले विजेतालाई मात्र भन्दा पनि समग्र सहभागी टोलीलाई समेटेर लिगको पुरस्कारमा समायोजन गरेको बताएको छ ।

विदेशी खेलाडीको हकमा एन्फाले यसपटक नयाँ प्रावधान ल्याएको छ । हरेक क्लबले अधिकतम ४ विदेशी खेलाडी अनुबन्धन गर्न पाउनेमा त्यसमध्ये १ दक्षिण एसियाली हुनुपर्ने प्रावधान रहेको छ । ३ वा सोभन्दा कम खेलाडीको हकमा भने दक्षिण एसियाली हुनुपर्ने छैन । एन्फा अध्यक्ष कर्माछिरिङ शेर्पाले दक्षिण एसियाली फुटबल विकासका लागि संघले यो कदम चालेको र अन्य दक्षिण एसियाली राष्ट्रले पनि यस कदमलाई स्वागत गरेको बताए ।

यसपटक तीन नयाँ क्लबले ‘ए’ डिभिजन खेल्दैछन् । समयमै ‘ए’ डिभिजन हुन नसक्दा दुई पटक बढुवा भएका क्लब एकैपटक ‘ए’ डिभिजन लिग खेल्दैछन् । २०७० कै ‘बी’ डिभिजनमा बढुवा भएको ब्रिगेड ब्वाइज क्लबसँगै गत वर्ष भएको ‘बी’ डिभिजन लिगमा शीर्ष दुई स्थान हासिल गरेका च्यासल युथ क्लब र न्युरोड टिम (एनआरटी) लिगमा प्रतिस्पर्धा गर्दैछन् । यसपटक रेलिगेसन नहुने भएपछि अर्को वर्ष बढुवा हुने टोलीसहित ‘ए’ डिभिजनमा क्लबको घुइँचो लाग्ने पक्का छ । एन्फाले छिट्टै उचित कदम नचालेमा लिगको पिरामिडमा असर पर्ने देखिन्छ ।

पछिल्लो पटक ‘ए’ डिभिजन नखेलेर रेलिगेसनमा परेको एनआरटी लगत्तै आयोजना हुन लागेको लिगमा खेल्नुले पनि लिगको अवधारणा फितलो रहेको प्रस्ट हुन्छ । विगतमा तल्लो डिभिजन हुँदै माथिल्लोसम्म आइपुग्ने लिग कार्यक्रम यसपटक भने माथिल्लोमै अडिएको छ । एन्फाले छिट्टै तल्लो श्रेणीको लिगबारे पनि कार्यक्रम घोषणा गर्ने बताउँदै आएको छ ।

यसपटक विगतमा टाउको दुखाइ बन्दै आएको खेल मिलेमतोको समस्या निर्मूल पार्न एन्फाले विशेष कदम चाल्ने भएको छ । यसका लागि एन्फाले नेपाल प्रहरीका पूर्वडीआईजी सुदीप आचार्यलाई इन्टेग्रिटी अफिसरका रूपमा नियुक्त गरिसकेको छ । आचार्यले दिल्लीमा आयोजित विशेष कोर्समा सहभागी भएर आएपछि लिग अवधिका लागि विशेष समिति निर्माण गर्ने एन्फाले जनाएको छ । यसबाहेक खेल हुने हरेक मैदानमा विशेष क्यामेरा जडान गर्ने एन्फाको तयारी छ ।

पूरा पैसा पाएमात्र बंगबन्धु खेल्ने
बंगलादेश फुटबल महसंघ (बीएफएफ) को आयोजनामा असोज १५ गतेदेखि बंगबन्धु कप २०१८ आयोजना हुँदैछ । नेपालले सन् २०१६ मा यस प्रतियोगिताको उपाधि जितेपछि पाउनुपर्ने पुरस्कार रकम ५० हजार अमेरिकी डलर पूरा नपाएपछि नेपालको सहभागिता अन्योलमा थियो । बीएफएफले पुरस्कार राशिको आधा रकम तिरिसकेको छ भने २५ हजार डलर अझै तिरेको छैन ।

प्रतियोगिताको खेल तालिका सार्वजनिक भइसक्दा पनि एन्फाले असोज १२ सम्म रकम पठाउन बीएफएफलाई अल्टिमेटम दिएको छ । एन्फा महासचिव इन्द्रमान तुलाधरले बाँकी रहेको २५ हजार डलर असोज १२ गतेसम्म तिरे मात्र नेपाली टोली बंगलादेश जाने प्रस्ट पारे ।

प्रकाशित : आश्विन १, २०७५ ०८:०७
पूरा पढ्नुहोस्
प्रतिक्रिया
पठाउनुहोस्