यात्रा थालनी

आदर्श ढकाल

एमस्ट्र्राडम, नेदरल्यान्ड्स — नेपाल आधिकारिक रूपमा वान–डे अन्तर्राष्ट्रिय क्रिकेट खेल्ने २३ औं राष्ट्र बनेको छ । एमस्टलभिनस्थित भीआरए मैदानमा बुधबार उत्रिएपछि नेपाल वान–डे अन्तर्राष्ट्रिय खेल्ने पछिल्लो मुलुक दर्ज भएको हो ।

तर नेपालले त्यस अवसरलाई जितमा परिणत गर्न सकेन । घरेलु टोली नेदरल्यान्ड्ससँग ५५ रनको हार स्विकार्‍यो । नेपालले यो खेल जितेको भए आफ्नो पहिलो वान–डे अन्तर्राष्ट्रिय खेलमै जित हात पार्ने सातौं राष्ट्र बन्थ्यो ।


कप्तान पारस खड्काले कसिलो बलिङ गर्दै ४ विकेट लिएपछि टस जितेर ब्याटिङ गरेको नेदरल्यान्ड्सलाई नेपालले ४७.४ ओभरमा १ सय ८९ रनमा अलआउट गर्‍यो । ओपनर ज्ञानेन्द्र मल्ल र अनिल शाहले लिस्ट ‘ए’ मान्यताप्राप्त खेलमै नेपालबाट अहिलेसम्मको उत्कृष्ट सुरुआत दिलाउने क्रममा ५८ रन जोडे पनि ४१.५ ओभरमा १ सय ३४ रनमै अलआउट भयो ।


एकसमय ८५–१ को बलियो स्थितिमा रहेको नेपालले ४९ रनमा बाँकी ९ विकेट गुमाएको थियो । मध्यक्रमका ब्याट्सम्यान शरद भेषावकरलाई फिल्डिङका क्रममा औंलामा चोट लाग्नु पनि नेपालका लागि ठूलो धक्का भयो । ११ औं नम्बरमा ब्याटिङ गर्न आएका उनी ४ रन बनाई आउट भए । शरद शुक्रबार हुने अर्को खेल खेल्न नसक्ने भएका छन् । अन्तर्राष्ट्रिय क्रिकेटमा सम्भवत् आफ्नो अन्तिम खेल खेलिरहेका शक्ति गौचन ९ रनमा नटआउट रहे ।


धेरैपछि नेपालबाट ठूलो स्कोर बनाउन सफल ज्ञानेन्द्रले आकर्षक कभर ड्राइभहरू प्रहार गरेका थिए । अनिल २१ रन बनाई फ्रेड क्लासेनको बलमा आउट भए पनि ज्ञानेन्द्रले नेपालको इनिङ्सलाई तानेका थिए । पारसलाई १२ रनमा नेदरल्यान्ड्सका कप्तान पिटर सेलारले आउट गरे । ५७ बलमा अर्धशतक पूरा गरेका ज्ञानेन्द्रले त्यसपछि १ रनमात्र जोड्न सके । उनी माइकल रिप्पोनको बलमा एलबीडब्लू आउट भए । ६१ बलको इनिङ्समा ज्ञानेन्द्रले ८ चौका प्रहार गरे ।


यहींबाट नेपालको नाटकीय पतन भयो । आरिफ शेख, सोमपाल कामी र वसन्त रेग्मी शून्यमा आउट भए । दीपेन्द्रसिंह ऐरी विकेटमा टिकिरहे । उनलाई भेट्रान शक्तिको साथ रहयो । ४८ बलमा २ चौका र १ छक्कासहित ३३ रन बनाएका दीपेन्द्रलाई फ्रेड क्लासेनले आउट गरे । शून्यमा आउट हुने सूचीमा करण केसी पनि थपिए । रिप्पोनले २३, सिलारले २० र क्लासेनले ३० रन खर्चेर समान ३ विकेट लिए ।


यसअघि नेदरल्यान्ड्सको ब्याटिङलाई पारसले सटिक लाइन र लेन्थबाट भत्काएका थिए । सोमपाल कामीले तेस्रो ओभरमा डानियल टेर ब्राकलाई आउट गरी पहिलो सफलता दिलाएका थिए । बेन कुपरले २० रन बनाउँदै स्टेफन माइबर्गसँग दोस्रो विकेटमा ४५ रनको साझेदारी गरे । पारसले कुपरलाई एलबीडब्लू धरापमा पारे । २९ बलमा ३२ रन बनाएका माइबर्गलाई युवा स्पिनर सन्दीप लामिछानेले बोल्ड गरे । माइबर्गले करण केसीलाई लगातार तीन चौका प्रहार गरेका थिए । उनले कुल ४ चौका र १ छक्का प्रहार गरे ।
वेस्ली बारेसीलाई पारसले १२ रनमा आरिफ शेखबाट पहिलो स्लिपमा क्याच गराएपछि नेदरल्यान्ड्स ७२–४ को स्थितिमा पुगेको थियो । बास डे लिड र रिप्पोनले पाँचौं विकेटमा जोडेको ६८ रन महत्त्वपूर्ण बन्यो । डी लिडलाई सोमपालले आउट गरे । उनले ६० बल खेली १ चौका र १ छक्का प्रहार गरे । वसन्तको बलमा शक्तिले एकहाते सुन्दर क्याच लिएर सिलारलाई ५ रनमा आउट गरे ।


ठूलो विकेट नेपालले ४० औं ओभरमा लियो, जब पारसले रिप्पोनलाई दीपेन्द्रबाट क्याच गराए । रिप्पोनले ७६ बल खेली २ चौका प्रहार गर्दै ५१ रन बनाए । दुई बलपछि शेन स्नाटरलाई बोल्ड गर्दै पारसले नेदरल्यान्ड्सको स्थिति १५९–८ मा पुर्‍याए । पुछारका ब्याट्सम्यानको योगदानमा नेदरल्यान्ड्सले स्कोर १ सय ८९ रन पुर्‍यायो ।


मध्यम गतिका बलर पारसले १० ओभरमा २६ रन खर्चेर ४ विकेट लिए । सोमपालले ८.४ ओभरमा १ मेडन राख्दै ३४ रन खर्चेर ३ विकेट लिए । करण, सन्दीप र वसन्तको नाममा १–१ विकेट रहयो ।


गार्ड अफ अनर लिँदै शक्ति गौचन


पहिलो वान–डे अन्तर्राष्ट्रिय खेल्ने नेपाली टोली


ज्ञानेन्द्र मल्ल


सन्दीप लामिछाने


सोमपाल कामी


नेपाली समर्थक प्रकाशित : श्रावण १७, २०७५ ०८:०५

ADVERTISEMENT
प्रतिक्रिया
पठाउनुहोस्
ADVERTISEMENT

रग्बी सेभेन्सको आशा

कान्तिपुर संवाददाता

काठमाडौँ — नेपाली टोलीका कप्तान कृष्ण क्षेत्रीले सिंगापुरमा हुने एसिया रग्बी सेभेन्स ट्रफीमा राम्रो गर्ने आशा रहेको बताएका छन् ।

‘केही गर्छौं भन्ने आस छ र गर्नुपर्छ पनि,’ बुधबार टिमको बिदाइमा कप्तान कृष्णले भने, ‘हामीसँग विगतको अनुभव पनि छ । त्यसैले यसपालि राम्रो गर्ने आशा र विश्वास छ ।’ १२ खेलाडीसहितको नेपाली टोली बिहीबार सिंगापुर जानेछ । अगस्ट ४ र ५ मा सिंगापुरमा हुने महादेशीय प्रतियोगितामा १३ देशले प्रतिस्पर्धा गर्दै छन् । त्यसमा नेपालले यूएई, जोर्डन र इन्डोनेसिया रहेको समूह ‘बी’ मा प्रतिस्पर्धा गर्नेछ ।

‘यूएई कठिन टिम हो,’ कप्तान कृष्णले भने, ‘जोर्डनविरुद्ध जित हात पार्ने आशा छ । इन्डोनेसिया वरीयताप्राप्त टिम हो । हामी वरीयताविहीन भए पनि उसलाई पराजित गर्नसक्छौं भन्ने लागेको छ ।’

समूह ‘ए’ मा चार र समूह ‘सी’ मा पाँच टिम छन् । सर्वाधिक अंकका आधारमा शीर्ष चार टिम विश्व च्याम्पियनसिपलाई लागि छनोट हुनेछन् । उनीहरूले नै एसियाली उपाधिका लागि प्रतिस्पर्धा गर्नेछन् । अरु टिमले प्लेट र बल च्याम्पियनसिप खेल्नेछन् । अन्तिम स्थानमा रहने टिमको यात्रा भने समूह चरणमै सकिनेछ ।

‘एसिया रग्बी सेभेन्सका लागि दुई महिना प्रशिक्षण गरेका छौं । सबैले मिहिनेत गरे । त्यसैले उच्च स्तरमा प्रदर्शन गर्ने आशा छ, जसले नेपाली रग्बीलाई परिवर्तन गर्नसक्छ,’ नेपाली टोलीका मुख्य प्रशिक्षक राधिका हेटियाचीले भने । यी श्रीलंकाली प्रशिक्षकले नयाँ खेलाडीको रूपमा आर्मीका झुकेन राई, सञ्जय अधिकारी, हुतराज प्रधान, सिकिन्दर चौधरी र हिमालयन रग्बी क्लबका विक्रम पुरीलाई लिएका छन् । कप्तान कृष्ण, उपकप्तान विराट श्रेष्ठ, कृष्णप्रसाद धमला, जनक वाइबा, श्रीराम श्रेष्ठ, विराट ऐडी र प्रेमबहादुर कोइराला भने अन्तर्राष्ट्रिय प्रतियोगिताका पुरानै खेलाडी हुन् ।

नेपाल रग्बी संघका अध्यक्ष टंकलाल घिसिङका अनुसार नेपाली महिला टिमले पनि एसिया रग्बी सेभेन्स ट्रफीमा प्रतिस्पर्धा गर्नेछ । ब्रुनाईमा अक्टोबर २२ र २३ मा हुने महिलाको प्रतियोगितालाई नेपाली टोलीको बन्द प्रशिक्षण भइरहेको उनले बताए ।

प्रकाशित : श्रावण १७, २०७५ ०८:०३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
×