थ्रीस्टारमाथि एपीएफको जित

लालबन्दी गोल्डकप
अमन कोइराला

सर्लाही — लालबन्दी गोल्डकप फुटबल प्रतियोगितामा बिहीबार दोस्रो सेमिफाइनलमा थ्रीस्टारलाई ४–३ ले हराउँदै एपीएफ क्लब उपाधि नजिक पुगेको छ । पहिलो हाफको नवौं मिनेटमा एपीएफका श्याम नेपालीले हानेको फ्रि–किकमा रुपबहादुर लामाले हेडबाट गोल गरेका थिए ।

पहिलो गोलसँगै तीव्र गतिमा खेल्दै एपीएफले सिर्जना गरेको थियो । १४ औं मिनेटमा पेनाल्टी बक्स नजिक गोलकिपरको हातबाट फुस्केको बललाई कभर गर्दै रुपबहादुरको पासमा नवीन लामाले गोल गरेर अग्रता दोब्बर बनाए ।

दुई गोल खाएपछि दबाबमा थ्रीस्टारले आक्रामक खेल सुरु गरेको थियो । २३ औं मिनेटमा थ्रीस्टारका रन्जन विष्टको पासमा अजायी मार्टिनले पेनाल्टी बक्स नजिकैबाट हानेको प्रहार गोलमा परिणत भयो । मार्टिनले गरेको सुन्दर गोलसँगै थ्रीस्टारको मनोबल बढेको थियो ।

मध्यान्तरअघिको तीन मिनेट इन्ज्युरी टाइममा मार्टिनले रन्जनको पासमा गोल गरेर खेललाई बराबरीमा ल्याएका थिए ।

पहिलो हाफ बराबर भएपछि दोस्रो हाफमा दुवै आक्रामक रणनीति लिएर मैदान उत्रिएका थिए । पहिलो मिनेटमै एपीएफका प्रवीण स्याङ्तानको पासमा युवराज खड्काले गोल गरेरलाई फेरि अग्रता दिलाए । ३१ औं मिनेटमा रामकुमार कुमालको पासमा प्रवीणले व्यक्तिगत दोस्रो गोल थप्दै जित सुनिश्चित पारेका थिए । त्यसको ६ मिनेटपछि थ्रीस्टारका बुद्ध चेम्जोङले लामो दूरीबाट गरेको प्रहार गोलमा परिणत भयो । थ्रीस्टारले बाँकी ७ मिनेटमा प्राप्त अवसर गुमाएपछि खेल एपीएफको पक्षमा ४–३ ले टुंगियो ।

एपीएफका नवीन लामा म्यान अफ द म्याच घोषित भए । एपीएफले शनिबार फाइनलमा नेपाल पुलिस क्लबसँग खेल्नेछ ।

प्रकाशित : असार १, २०७५ ०८:५५
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

‘उत्तर कोरियाविरुद्ध प्रतिबन्ध फुकुवा हुँदैन’

बीबीसी

सोल — अमेरिकी विदेशमन्त्री माइक पोम्पियोले ‘पूर्णरूपमा परमाणु नि:शस्त्रीकरण नभएसम्म उत्तर कोरियामाथिको प्रतिबन्ध’ फुकुवा नगरिने बताएका छन् । 

जापानी विदेशमन्त्री तारो कानो, दक्षिण कोरियाली विदेशमन्त्री काङ क्युङ–ह्या र अमेरिकी विदेशमन्त्री माइक पोम्पियो सोलमा बिहीबार आयोजित संयुक्त पत्रकार सम्मेलनका क्रममा । तस्बिर : रोयटर्स

पोम्पियो दक्षिण कोरियाको राजधानी सोलमा जापानी तथा उत्तर कोरियाली समकक्षीसँग संयुक्त रूपमा आयोजित पत्रकार सम्मेलनमा बोल्दै यस्तो बताएका हुन् । अमेरिकी राष्ट्रपति डोनाल्ड ट्रम्पले उत्तर कोरियाली नेता किम जोङ–उनबीच शिखर वार्ता भएपछि पहिलो पटक प्रतिक्रिया दिएका हुन् ।

ट्रम्प र किमबीच मंगलबार भएको शिखर वार्तामा कोरियाली प्रायद्वीपमा पूर्णरूपमा परमाणु नि:शस्त्रीकरण गर्ने तथा देशबीच नयाँ सम्बन्ध स्थापित गर्ने सहमति भएको थियो ।

शिखर वार्ता सकेर अमेरिका फर्केलगत्तै ट्रम्पले ‘बैठक अपेक्षा गरेभन्दा निकै सफल भएको जनाउँदै उत्तर कोरियाबाट अमेरिकालाई अब परमाणु आक्रमणको खतरा नरहेको’ दाबी गरेका थिए । बैठकमा किमले कोरियाली प्रायद्वीपलाई परमाणु हतियारमुक्त बनाउने प्रतिबद्धता व्यक्त गरेका थिए ।

राष्ट्रपति ट्रम्पले अमेरिका र दक्षिण कोरियाबीच नियमितजसो हुँदै आएको संयुक्त सैन्य अभ्यास अन्त्य गर्ने घोषणा गरेपछि पोम्पियो सिंगापुरबाट दक्षिण कोरिया पुगेका हुन् ।

पत्रकार सम्मेलनमा बोल्दै पोम्पियोले अमेरिका र उत्तर कोरियाबीचको सम्बन्धमा ‘नयाँ मोड’ आएको बताए । पोम्पियोले अमेरिका ‘पूर्ण, प्रमाणीकरण गर्न सकिने तथा उल्ट्याउन नसकिने परमाणु नि:शस्त्रीकरणको पक्षमा रहेको’ दोहोर्‍याए । यद्यपि, ट्रम्प र किमबीचको शिखर वार्तामा परमाणु नि:शस्त्रीकरण कसरी गर्ने भन्नेबारे विस्तृत विवरण भने उल्लेख छैन । पत्रकार सम्मेलनमा बोल्दै दक्षिण कोरियाली विदेशमन्त्री काङ क्युङ–ह्याले सोल र वासिङ्टनबीचको सम्बन्ध विगतमा जस्तै निकै बलियो रहेको दाबी गरे । उनका जापानी समकक्षी तारो कोनोले मंगलबारको शिखर बैठकले ‘चुनौतीपूर्ण भए पनि महत्त्वपूर्ण सुरुवात’ भएको जनाए ।

दुई कोरियाबीच सैन्य वार्ता
दक्षिण र उत्तर कोरियाको सीमा क्षेत्र पानमुन्जोममा बिहीबार दुवै देशका सैनिक जर्नेल स्तरको वार्ता सुरु भएको छ । स्थानीय सञ्चारमाध्यमका अनुसार बिहीबार बिहानबाट सुरु भएको वार्तामा कोरियाली प्रायद्वीपमा दिगो शान्ति स्थापना गर्न आवश्यक गृहकार्य तथा परमाणु नि:शस्त्रीकरणको प्रक्रियाबारे छलफल भएको जनाइएको छ ।

वार्तामा दक्षिण कोरियाली प्रतिनिधिमण्डलको मेजर जनरल किम डो ग्युन र उत्तर कोरियाली टोलीको नेतृत्व जनरल आन लक सनले गरेका थिए ।

‘एक–अर्कालाई राम्रोसँग बुझ्यौं’

वासिङ्टन (सीएनएन)– अमेरिकी राष्ट्रपति डोनाल्ड ट्रम्पले गत मंगलबार उत्तर कोरियाली नेता किम जोङ–उनसँग भएको शिखर वार्तापछि एक–अर्कालाई राम्रोसँग बुझेको बताएका छन् । ऐतिहासिक बैठकपछि फक्स न्युजलाई दिएको अन्तर्वार्तामा उनले आफूहरूले ऐतिहासिक कार्य गरेको दाबी गरे । अन्तर्वार्ताका क्रममा ट्रम्पले उत्तर कोरियामाथि क्रूर शब्द प्रयोग गरेर मूर्खता गरेको महसुस भएको बताए । तर ट्रम्पले कोरियाविरुद्धको कडा आलोचनाले दुई देशको मिलन गराएको दाबी गरे । ट्रम्पले भने, ‘मलाई क्रूर व्यवहार गर्न मन थिएन । तर त्यतिबेला हामीसँग अन्य विकल्प पनि थिएनन् ।’ यसअघि पटकपटक वाक्युद्धमा उत्रेका ट्रम्प र किमले एक–अर्काको अपमान हुने गरी सार्वजनिक अभिव्यक्ति दिएका थिए । ट्रम्पले किमलाई ‘लिटल रकेट म्यान’ तथा किमले ट्रम्पलाई ‘पागल बूढो’ को संज्ञा दिएका थिए ।

प्रकाशित : असार १, २०७५ ०८:५२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
×