क्यानलाई अन्तिम मौका- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

क्यानलाई अन्तिम मौका

क्रिकेट विवाद
कान्तिपुर संवाददाता

काठमाडौँ — नेपाल क्रिकेट संघ (क्यान) को झन्डै दुई वर्षदेखि कायम विवाद सुल्झाउन अन्तर्राष्ट्रिय क्रिकेट परिषद् (आईसीसी) ले नेपाललाई अन्तिम मौका दिएको छ । आईसीसीका कार्यवाहक प्रमुख उस्मान ख्वाजाको नेतृत्वमा राजधानीमा आइतबार र सोमबार फरक–फरक समूहसँगको बैठकले जुनमा हुने आईसीसीको चुनावी साधारणसभाअगावै नेपालको विवाद सुल्झाउन अल्टिमेटम दिएको छ ।

पत्रकार सम्मेलनमा राखेप सदस्यसचिव केशवकुमार विष्ट (बीच), निर्वाचित क्यानका महासचिव अशोकनाथ प्याकुरेल (बायाँ) र सल्लाहकार समितिका संयोजक विनयराज पाण्डे ।

आईसीसी प्रतिनिधिमण्डलले राष्ट्रिय खेलकुद परिषदा सदस्य–सचिव केशवकुमार विष्ट, सल्लाहकार समूह, क्रिकेटका सरोकारवाला निकाय, निवार्चित क्यान र तदर्थ समितिसँग निरन्तर छलफलपछि निलम्बन फुकुवा हुने सम्भावना भने बढेको छ ।

यसअघि निर्वाचित क्यानले साधारणसभा गरेर पास गरेको संशोधित विधान अमान्य भएपछि जिल्ला संघको निर्वाचन प्रक्रिया फेरि दोहोर्‍याउनुपर्ने भएको छ । विधानमा संशोधित गरिएका बुँदाहरू आईसीसीले अमान्य रहने बताएपछि सल्लाहकार समितिले प्रस्ताव गरेको विधान पारित गर्नुपर्ने अवस्था आएको छ । केही दिनमै उक्त प्रक्रिया पूरा गरेर आईसीसीले अगाडि बढ्ने रोडम्याप दिने बताइएको छ । त्यसैमा रहेर क्यानको आगामी कार्यशैली अगाडि बढ्ने छ ।

राष्ट्रिय खेलकुद परिषद (रँखेप) का सदस्य सचिव केशव कुमार विष्टले दुवै पक्ष मिलेर अगाडी बढ्नुको विकल्प नरहेको बुझाइ राखे । ‘नेपाली क्रिकेटले निकास पाउन अब दुवै पक्ष मिल्नु जरुरि छ । राखेप नेपाली खेलकुदकै अभिभावक संस्था भएको नाताले अब सक्दो चाँडो यस विवादलाई सुल्झाउन दुवै पक्षलाई अगाडि बढ्न आग्रह गर्छौं,’ उनले भने । दुवै पक्षले सम्झौता गर्न नसक्दा भने राखेप कठोर निर्णय लिन बाध्य हुने विष्टले बताए ।

सल्लाहकार समितिका संयोजकमध्ये एक विनयराज पाण्डेले जिल्लादेखि नै क्रिकेट हितका लागि काम गर्ने मान्छे नेतृत्वमा आए नेपाली क्रिकेटको दीगो विकास हुने बताए । ‘हामीले अन्तिम मौका पाएका छौं । अहिले राम्रो निर्णय लिएर अघि बढे नेपाली क्रिकेटले निकास पाउँछ । अहिले हामी चुकेको खण्डमा क्यान खारेज हुनुको विकल्प नरहेको आईसीसी प्रतिनिधिले प्रस्ट पारिसकेका छन्,’ उनले भने ।

निवार्चित क्यानका महासचिव अशोकनाथ प्याकुर्‍यालले क्यानमाथि लागेको प्रतिबन्ध हटेको खण्डमा आफ्नो पक्ष सकारात्मक रहेको जानकारी दिए । ‘हामीले पनि क्रिकेटको विकास चाहेका हौं । जिल्लालाई अझै माथि उठाउन विधानमा संशोधन गरिएको थियो । अब आईसीसीले क्यानलै फुकुवा गर्छ भने हामी आफ्नो अडान राख्ने छैनौं,’ उनले भने । प्याकुर्‍यालले आगामी दिनमा सहमतिअनुसार काम बढे आफ्नो तर्फबाट कुनै बाधा नआउने प्रस्ट पारे ।

आईसीसीले अबको केही दिनमा क्यानको आगामी गतिविधि कसरी हुनेबारे रोडम्याप तयार गर्दै छ । विशेष साधारणसभा र त्यसपछि हुने जिल्लाको चुनावबारे समयसीमा पनि त्यसै रोडम्यापले बनाउने छ । त्यसअघि आईसीसीका तीन सदस्यसहित क्यान र सल्लाहकार समितिका १–१ सदस्य रहेर अनुगमन समिति पनि गठन गरिने छ । आईसीसीको निर्देशनअनुसार सम्पूर्ण प्रक्रिया पूरा गरे आगामी जुनमा आईसीसी बैठकले नेपालको निलम्बन फुकुवा गर्न सक्नेछ ।

प्रकाशित : माघ १७, २०७४ ०६:५०
प्रतिक्रिया
पठाउनुहोस्

अभ्यासमा नेपाल विजयी

विश्व क्रिकेट लिगको तयारी भ्रमण
कान्तिपुर संवाददाता

काठमाडौँ — विश्व क्रिकेट लिग डिभिजन(२ को तयारीका लागि संयुक्त अरब इमिरेट्स (यूएई) पुगेको नेपाली टोलीले पहिलो अभ्यास खेलमा यूएई ‘ए’ लाई २५ रनले पराजित गरेको छ । यूएईको राष्ट्रिय टोलीका चिराग सुरी र मोहमद कासिमसहित राष्ट्रिय स्तरका खेलाडी रहेको टोलीविरुद्ध नेपालले टस जितेर ब्याटिङ रोजेको थियो ।

ओपनिङ ब्याटिङमा जाादै दिलीप नाथ र ज्ञानेन्द्र मल्ल । 


नेपालले इनिङ्सको तीन बल बाँकी छँदा अलआउट हुनुअघि २ सय ४६ रन जोड्यो । उपकप्तान ज्ञानेन्द्र मल्ल १८ रनमा कट बिहाइन्ड भएपछि दिलीप नाथ र अनिल साहले दोस्रो विकेटमा ६० रनको साझेदारी गरे । अनिलले ३१ तथा दिलीपले ६१ रन जोडे । मध्यक्रममा १६ रनको अन्तरमा ४ विकेट गुमाएको नेपालको इनिङ्सलाई रोहित पौडेलले उकासेका थिए ।

कप्तान पारस खड्काले २० रन जोड्दा आरिफ शेख र दीपेन्द्रसिंह ऐरीले २(२ रन जोडे । ४३ रन जोडेका रोहितले २१ रन बनाएका वसन्त रेग्मीसँग सातौं विकेटमा ४५ रन जोडेपछि नेपाल राम्रो स्कोरतर्फ उन्मुख भयो । नवौं नम्बरमा ब्याटिङ गर्न आएका करण केसीले १६ बलमा ४ चौका र २ छक्कासहित ३५ रन जोडेपछि नेपालले बलियो लक्ष्य प्रस्तुत गरेको थियो । यूएईका कासिमले ३ विकेट लिए ।

जवाफी ब्याटिङमा यूएई ‘ए’ ले बलियो सुरुआत गर्‍यो । प्रारम्भिक जोडीले १५ ओभरमा ८७ रनको साझेदारी गरेपछि नेपाली टोली दबाबमा परेको थियो ।
त्यसपछि दीपेन्द्र र कप्तान पारसले चार ओभरमा ४ विकेट निकालेपछि नेपाल खेलमा फर्किएको थियो । दीपेन्द्रले ओपनरद्वय फहाद नवाज (३६) र चिराग (४५ रन) लाई पेभेलियन फर्काए ।

मध्यक्रममा नील लोबोले ५९ रन जोड्दै टोलीलाई उकास्न खोजे पनि अन्य ब्याट्सम्यानले राम्रो साथ दिन सकेनन् । घरेलु टोली ४८.४ ओभरमा २ सय २१ मा अल आउट भयो । कप्तान पारसले ५ तथा दीपेन्द्रले ३ विकेट लिएका थिए ।
नेपालले यस अभ्यास खेलका लागि १४ सदस्यीय अन्तिम टोलीबाट शरद भेषावकर, सन्दीप लामिछाने र सोमपाल कामीलाई विश्राम दिएको थियो । नेपालले यूएईमा अझै दुई अभ्यास खेल खेल्नेछ । टोली यूएईबाट आइतबार नामिबिया जाने कार्यक्रम छ ।

प्रकाशित : माघ १७, २०७४ ०६:५०
पूरा पढ्नुहोस्
प्रतिक्रिया
पठाउनुहोस्
×