लन्डन — म्यानचेस्टर सिटीले क्लब इतिहासकै सर्वाधिक बढी रकम खर्चंदै एथलेटिक बिल्बाओका डिफेन्डर एमेरिक लापोर्टलाई भित्र्याएको छ । प्रशिक्षक पेप ग्वार्डिओलाले मंगलबार नयाँ डिफेन्डर लापोर्टको आगमनले क्लबको उपाधि जित्ने अभियान अझै बलियो हुने बताए ।

सिटीले लापोर्टलाई भित्र्याउन साढे ६ करोड युरो खर्चेको अनुमान गरिएको छ । २३ वर्षीय फ्रान्सेली खेलाडी जारी सिजनमा ग्वार्डिओलाले अनुबन्धन गरेका छैटौं खेलाडी हुन् । उनले सन् २०२३ सम्म सम्झौता गरेका छन् ।

क्लबसँग आबद्ध भएपछि लापोर्टले खुसी व्यक्त गरे । ‘म यहाँ आउन पाउँदा निकै खुसी छु । सिटी ठूलो लक्ष्य बोकेर अगाडि बढिरहेको युरोपको प्रतिष्ठित क्लब हो,’ उनले थपे, ‘म ग्वार्डिओलाको प्रशिक्षणमा खेल्दै क्लबलाई सफलता दिलाउन सक्दो प्रयास गर्नेछु ।’ क्लबका निर्देशक सिकी बेगरस्टेनले प्रशिक्षकको रणनीतिमा भिज्नसक्ने लापोर्टलाई लामो समय पछयाएपछि भित्र्याउन सफल भएको बताए ।