विश्वकप छनोटको उत्कर्ष-संकटमा अर्जेन्टिना

एएफपी

पेरिस — विश्वकप २०१८ को छनोट चरण अहिले उत्कर्षतर्फ छ । लियोनल मेसीको अर्जेन्टिना समस्यामा छ । सिरिया प्ले–अफ खेल्दैछ, उसको विश्वकप खेल्ने सपना अझै तुहिएको छैन ।

अनि युरोपेली च्याम्पियन पोर्चुगलले अझै धेरै गर्नुु छ । विश्वकप छनोट अन्त्यतर्फ पुग्दा कहाँ कस्तो छ त ? एएफपीले तयार पारेको रिपोर्ट :

संकटमा अर्जेन्टिना
ब्राजिलले अर्को वर्षको मार्चमा हुने विश्वकपका लागि आफ्नो स्थान सुरक्षित गरिसकेको छ । तर दक्षिण अमेरिकाबाट स्वत: छनोट हुने तीन टिमको निर्णय हुन अझै बाँकी छ । र, यताको छनोटमा दुई चरणका खेल मात्र बाँकी छन् । दुईपल्टको विश्वकप च्याम्पियन अर्जेन्टिनाले सन् १९७० यता लगातार विश्वकपको अन्तिम चरण खेलेको छ । तर पाँचपल्ट बेलन डे’अर जितेका मेसी र उनका साथीहरूको टिम भने संकटमा छ । तीन वर्ष अगाडि ब्राजिलमा भएको विश्वकपमा फाइनल खेलेको अर्जेन्टिना अहिले पाँचौं स्थानमा छ । अझ कोपा अमेरिका विजेता चिली त छैटौं स्थानमा छ । 

जर्मनी अगाडि बढ्दै, पोर्चुगल र फ्रान्सलाई गाह्रो
आउने विश्वकपको अन्तिम चरण खेल्ने ३२ टिममध्ये १४ टिम त युरोपकै हुनेछन् । तर अहिलेसम्म युरोपबाट बेल्जियमले मात्र रुसमा खेल्ने निधो भइसकेको छ । युरोपेली छनोटमा पनि दुई चरणका खेल बाँकी छन् । विश्वकपको डिफेन्डिङ च्याम्पियन जर्मनीले बिहीबार उत्तरी आयरल्यान्डको सामना गर्नेछ र त्यसमा बराबरी निकाले, उसले पनि रुसको यात्रा तय गर्नेछ । युरोपमा रहेको छनोटका नौ समूह विजेताले विश्वकपमा स्वत: प्रवेश पाउनेछन् । उपविजेताबीच प्ले–अफ हुनेछ । पोर्चुगल र फ्रान्सलाई भने केही गाह्रो छ ।

नजिकको दूरीमा नाइजेरिया र ट्युनिसिया
अफ्रिकाबाट पाँच टिम रुस जानेछन् । तर यहाँ पनि अन्तिम चरण खेल्न कुनै टिमको निर्णय भइसकेको छैन । नाइजेरिया छैटौं विश्वकपको नजिक छ । यस्तै स्थिति अल्जेरियाको पनि छ । अफ्रिकी च्याम्पियन क्यामरुन पनि बलियो स्थितिमा छ भन्दा फरक पर्दैन ।

युद्धग्रस्त सिरिया प्ले–अफ खेल्दै
इरान, जापान, दक्षिण कोरिया र साउदी अरेबियाले अर्को वर्ष विश्वकपमा एसियाको प्रतिनिधित्व गर्नेछन्, यो तय भइसकेको छ । तर पाँचौं टिम कुन हुनेछ त ? सिरिया अथवा अस्ट्रेलिया । युद्धबाट गुज्रिरहेको सिरियाले अहिलेसम्म तय गरेको विश्वकप छनोट यात्रा अविश्वसनीय छ, परीको कथा जस्तो । यही टिमले प्ले–अफमा अस्ट्रेलियाको सामना गर्न लागेको हो । यसको विजेताले थप प्ले–अफ खेल्नेछ र यो रहनेछ, कन्काकेफको चौथो स्थानमा रहेको टिमविरुद्ध । 

मेक्सिको छनोटको बाटोमा
मेक्सिको लगातार सातौंपल्ट विश्वकप छनोटको संघारमा छ । यस्तै बलियो स्थिति कोस्टारिकाको पनि छ । स्वत: छनोट हुने तेस्रो टिमको निर्णय भने जटिल देखिन्छ । चौथोले भने प्ले–अफ खेल्नेछ । अहिले तत्काल पानामा तेस्रोमा छ, मेक्सिको र कोस्टारिका पछि ।

प्रकाशित : आश्विन १८, २०७४ ०७:५४
प्रतिक्रिया
पठाउनुहोस्

मैदान स्तरोन्नतिको ९२ लाख फिर्ता

माधव अर्याल

पाल्पा — युवा तथा खेलकुद मन्त्रालयले गत आर्थिक वर्षमा मैदान स्तरोन्नतिका लागि ३ करोड ४८ लाख रकम जिल्लामा अख्तियारी पठाए पनि ९२ लाख ३५ हजार रुपैयाँ फिर्ता भएको छ । खेलमैदान निर्माण स्रोत सुनिश्चितता कार्यक्रमअन्तर्गत यो रकम जिल्लामा भित्रिएको हो ।

आर्थिक वर्षको अन्तिममा रकम आएकाले अधिकांश विद्यालय, क्लब, समुदायले काम गर्न नसक्दा बजेट फिर्ता भएको जिल्ला समन्वय समितिले जनाएको छ । 

विभिन्न विद्यालय तथा युवा समूहका लागि ४ देखि १० लाख रुपैयाँसम्म बजेट आएको थियो । जिल्ला समन्वय समितिका अनुसार निकासा असारमा मात्रै भएकाले अधिकांशले काम गर्न नसक्दा ठूलो बजेट फिर्ता गएको हो । यम्घाको भगवती निमाविमा खेलमैदान निर्माण तथा सोही गाउँमै भलिबल खेलमैदान निर्माण गर्न चार/चार लाख रुपैयाँ आएको थियो । कालिका माविको खेलमैदान निर्माण गर्न पालुङमैनादी र भगवती मावि खेलमैदान निर्माणका लागि सोमादीका लागिसमेत पाँच/पाँच लाख बजेट आएको हो । 

कचलको देवीस्वारी मावि खेलमैदान निर्माण र तानसेनको पद्म पब्लिक मावि खेलमैदान निर्माण गर्न पनि पाँच/पाँच लाख बजेट आएको थियो । जिल्ला समन्वय समितिका अनुसार भलायटार युवा समूह रामपुर नगरपालिका ३ मा भलायटार खेलमैदान निर्माण गर्न १० लाख आएको हो । कसेनीको फुटबल मैदानका साथै स्टेडियमसहित खेलमैदान निर्माण गर्न ८ लाख बजेट आएको थियो ।

तिनाउ गाउँपालिकाअन्तर्गत दोभान र कचलको साबिक ६ मा खेलमैदान निर्माण गर्न पाँच/पाँच लाख बजेट आएको थियो । तिनाउकै कोलडाँडामा खेलमैदान निर्माण गर्नसमेत पाँच लाख आएको हो । तत्कालीन युवा तथा खेलकुदमन्त्री दलजित श्रीपाइलीका स्वकीय सचिव राजेन्द्र विश्वकर्माको पहलमा यहाँ स्रोत सुनिश्चितता कार्यक्रमअन्तर्गत खेलकुदका लागि बजेट परेको हो । साबिकको सिद्धेश्वर ६ मा खेलमैदान बनाउन १० लाख बजेट आएको थियो । यस्तै, बगनासकाली गाउँपालिकाअन्तर्गतको चापपानीस्थित सतिघा भलिबल खेलमैदान निर्माण साथै कटौजेपानी खेलमैदान निर्माणका लागि पाँच/पाँच लाख बजेट विनियोजन भएर आएको थियो । 

निस्दी गाउँपालिकाअन्तर्गत साबिकको गल्धा ३ मा खेलमैदान निर्माणका साथै बगनासकालीको पोखराथोकस्थित कमेरेघारी खेलमैदान निर्माणका लागिसमेत पाँच/पाँच लाख रुपैयाँ निकासा भएको थियो । यस्तै, रैनादेवी छहराअन्तर्गतको रैनादेवी मावि खेलमैदान भुवनपोखरीका लागि १० लाख बजेट विनियोजन भएको थियो । तानसेनको देववाणी मावि खेलमैदान, भैरव जनता माविमा खेलमैदान निर्माण तथा मर्मत, माथागढी गाउँपालिकाअन्तर्गतको साबिक झडेवा ५ मा खेलमैदान निर्माणका लागिसमेत पाँच/पाँच लाख बजेट आएको हो । रिब्दीकोट गाउँपालिकाको साबिक ख्याहा ८, तानसेनको जनता नमुना मावि खेलमैदान मर्मत तथा सुधार, रैनादेवी छहराको साबिक सिद्धेश्वर २ सोही गाउँपालिकाको साबिक सत्यवती ८ मा खेलमैदान निर्माण गर्नसमेत पाँच/पाँच लाख बजेट आएको जिल्ला समन्वय समितिका स्थानीय विकास अधिकारी रामप्रसाद पाण्डेयले बताए ।

त्यस्तै, रिब्दीकोटको साबिक देउराली ८ मा क्रिकेट खेलमैदान निर्माण, खस्यौलीमा कभर्डहल निर्माण, डीपीआर तथा निर्माण, रैनादेवी छहराको साबिक सोमादी ४ र सोमादी ६ मा खेलमैदान निर्माण गर्न पाँच/पाँच लाख रुपैयाँ बजेट आएको थियो । रिब्दीकोटको पालुङमैनादीस्थित चण्डिका भवानी आधारभूत विद्यालयमा खेलमैदान निर्माण गर्न पाँच लाख बजेट आएको थियो । यस्तै, साबिकको तानसेन १२ मा रामप्रसाद स्मृति खेलमैदान निर्माण गर्न १० लाख बजेट आएको हो । रैनादेवी छहराको सत्यवतीस्थित पानीचौर, बगनासकालीको साबिक चिर्तुङधारा ९, रैनादेवी छहराकै जनज्योति युवा क्लब खेलमैदान निर्माण गर्नसमेत पाँच/पाँच लाख बजेट आएको थियो । उता, बगनासकालीको चापपानीस्थित कालिका आधारभूत विद्यालयको खेलमैदान निर्माण र चापपानीकै झिरभन्ज्याङ खेलमैदान निर्माण गर्न पाँच/पाँच लाख बजेट निकासा भएको थियो । 

यस्तै, बगनासकालीकै दर्लमडाँडाको केवल स्मृति खेलमैदान निर्माण गर्न भने १० लाख बजेट विनियोजित थियो । रिब्दीकोटको देउराली, पालुङमैनादीस्थित प्रभात मावि, माथागढीको चिदीपानीस्थित सौभाग्य मावि, रम्भा गाउँपालिकाको रकमादेवी आधारभूत विद्यालयको खेलमैदान निर्माण गर्न पाँच/पाँच लाख बजेट आएको थियो । यस्तै, रम्भा गाउँपालिकाकै अमृत पब्लिक मावि, बगनासकालीको दर्लमडाँडा मावि, तानसेन ५ साबिकको १३ स्थित लक्ष्मी मावि, परमानन्द बालविद्या आश्रम र बगनासकालीको चापपानीस्थित चन्द्र माविको खेलमैदान निर्माण गर्न पनि पाँच/पाँच लाख रकम आएको थियो । ‘ढिला बजेट आए पनि हतारहतार काम गरेको देखिएको थियो,’ पालुङमैनादीस्थित कालिका माविमा अनुगमनमा पुगेको कोष तथा लेखा नियन्त्रण कार्यालयका प्रमुख वासुदेव शर्मा भट्टराईले भने । 

प्रकाशित : आश्विन १८, २०७४ ०७:५४
पूरा पढ्नुहोस्
प्रतिक्रिया
पठाउनुहोस्