आठौ खेलकुदको स्वागतमा नेपालगन्जमा दीप प्रज्ज्वलन

सातौं राष्ट्रिय खेलकुद प्रतियोगिताको शुक्रवार धरानमा भएको समापन समारोहमा युवा तथा खेलकुदमन्त्री दलजित श्रीपाली र राखेप सदस्य–सचिव केशव बिष्टले संयुक्त रुपमा मध्यपश्चिम क्षेत्रीय खेलकुद विकास समितिका अध्यक्ष भीम ओलीलाई झण्डा हस्तान्तरण गरेसँगै खेल क्षेत्रमा खुशीयाली छाएको हो । आठौ खेलकुद्को स्वागत गर्दै विभिन्न खेल संघहरु र खेलाडीहरुले नेपालगन्जमा शुक्रबार साँझ दीप प्रज्वलन गरे ।

बाँके जिल्ला भलिबल संघका अध्यक्ष टीएस ठकुरी, जिल्ला फुटबल संघका अध्यक्ष भोजराज शाही, एथलेटिक्स संघका अध्यक्ष विक्रमजंग थापा, क्रिकेट संघ अध्यक्ष दुर्गा थापा, सुटिङ संघका अध्यक्ष रोहित टण्डन, बदरुदीन अन्सारी, भारोत्तोलन संघका अब्दुल वाहिद मन्सुरीलगायतले संयुक्त विज्ञप्ति जारी गर्दै उक्त निर्णयको स्वागत गरेका हुन् । क्षेत्रीय खेलकुद विकास समितिको पहलको प्रसंशा गर्दै उनीहरुले उक्त प्रतियोगितालाई भव्य सफल पार्ने प्रतिबद्धता पनि व्यक्त गरेका छन् ।

खेल र खेलाडीको सहरका रुपमा चिनिएको नेपालगन्जमा यसअघि २०५५ सालमा चौथो बृहद् राष्ट्रिय खेलकुद प्रतियोगिता भएको थियो । तत्कालीन राखेप सदस्य रतन टण्डनले सम्पूर्ण खेलाडी तथा अफिसियलको आवास र भोजनको सम्पूर्ण व्यवस्था आफैंले गर्ने गरी व्यवस्थापनको जिम्मा लिएका थिए । झण्डै १३ वर्ष रोकिएको राष्ट्रिय खेलकुदलाई नेपालगन्जले ब्युझाएको थियो ।

‘मध्यपश्चिमले आँट गरेको छ । सबैको सहयोग र साझेदारीमा भव्य ढंगले सफल पार्ने जिम्मेवारी पाएका छौ,' क्षेत्रीय अध्यक्ष ओलीले भने । पछिल्लो समय नेपालगन्जमा राष्ट्रियस्तरका ठूला खेल स्पर्धा भइरहेका छन् । प्रधानमन्त्री कप भलिबल, नेपालगन्ज म्याराथन र नेपालगन्ज गोल्डकप स्थापित हुने चरणमा छन् ।

२०३८ सालमा बृहत राष्ट्रिय खेलकुद प्रारम्भ भएको हो । काठमाडौंबाट सुरु प्रतियोगिता २०४० सालमा दोस्रो पश्चिमाञ्चलको पोखरा तथा २०४२ सालमा तेस्रो राष्ट्रिय खेलकुद वीरगञ्जमा भएको थियो । २०६५ चैतमा पाँचौ प्रतियोगिता काठमाडौंमा र छैटौं संस्करण ०६८ सालमा सुदुरपश्चिमको धनगढी र महेन्द्रनगरमा आयोजना गरिएको थियो ।