रत्नजित र विष्णुको जित

नेपालका नम्बर १ खेलाडी रत्नजित तामाङ र विष्णु कटवालले जित हात पारे भने दीपेश धामीले ‘वाकओभर’ पाए । सिंगल्समा १३ स्वदेशी खेलाडीको चुनौती भने पहिलो चरणमै टुंगियो ।

त्रिपुरेश्वरस्थित राष्ट्रिय खेलकुद परिषदको कभर्डहलमा भएको खेलमा रत्नजितले पाकिस्तानका मोहम्मद इर्फान सइद भट्टीलाई २१–१६ र २५–२३ ले पराजित गर्दै पुरुष सिंगल्समा दोस्रो चरणको यात्रा तय गरे । प्रतियोगितामा तेस्रो वरीयताका उनले त्यसका लागि ३५ मिनेट लगाए । विष्णुले बंगलादेशका मोआज्जम होसैनको चुनौती २१–१९ र २१–१५ ले २५ मिनेटमै समाप्त पार्दै पहिलो चरण पार गरे ।

दीपेश धामीले भने इन्डोनेसियाका इमाम अदि कुसुमाबाट वाकओभर पाए । पुरुष सिंगल्समा सहभागी नेपाली खेलाडीहरू इरफान अन्सारी, सुमन लिम्बू, दीपक बोहरा, विजित थापामगर, जोसेफ अधिकारी, भूगोल गुरुङ, सुदीप सेढाईं, सन्जीव खडका पहिलो चरणमै पराजित भए । भियतनामी खेलाडीलाई प्रतिद्वन्द्वी पाएका साजनकृष्ण ताम्राकार पहिलो सेटमै रिटायर्ड भए ।
वुमेन्स सिंगल्समा कोर्टमा ओर्लिएका चारै नेपाली खेलाडी पराजित भए र त्यसमा सुनैना मुखिया, शोभा गौचन, अनुमाया राई र जेसिका गुरुङ रहे । मिक्स डबल्समा दीपेश धामी र पूजा श्रेष्ठको जोडीले भारतीय खेलाडीसँग प्रतिस्पर्धात्मक खेलमा २१–१८, २०–२२ र २१–८ को हार बेहोर्‍यो ।