यू-१६ को विश्वकप लक्ष्य- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

यू-१६ को विश्वकप लक्ष्य

विनाेद पाण्डे

काठमाडौं — क्रिकेट खेलाडीको तुलनामा नेपाली फुटबल खेलाडी हत्तपत्त बोल्दै बोल्दैन । जब बोल्छन् त्यसले ठूलो अर्थ राख्छ । किर्गिस्तानमा एएफसी यु–१६ छनोटचरण खेल्न गएको नेपाली खेलाडीलाई सुरुमै दबाब आइपरेको थियो ।

क्रिकेट खेलाडीको तुलनामा नेपाली फुटबल खेलाडी हत्तपत्त बोल्दै बोल्दैन । जब बोल्छन् त्यसले ठूलो अर्थ राख्छ । किर्गिस्तानमा एएफसी यू–१६ छनोटचरण खेल्न गएको नेपाली खेलाडीलाई सुरुमै दबाब आइपरेको थियो । प्रशिक्षक उपेन्द्रमान सिंहले त्यो दबाब थुपारिदिएका थिए, हरेक मिटिङमा टोलीका सवैले आफ्नो भनाइ राख्नुपर्ने भनेर ।

नेपाल भोलिपल्ट जोर्डनसँग खेल्दै थियो । अघिल्लो दिन प्रशिक्षकको यस्तो उर्दीपछि सबै खेलाडीको टाउको निहुरिइसकेको थियो, बोल्नुपर्छ भनेर । खेलाडीका लागि बोल्नु र हिमाल चढ्नु उस्तै देखिन्थ्यो । प्राय: खेलाडी मसिनो स्वरमा ‘हामीले राम्रो खेल्नुपर्छ, सबैलाई शुभकामना’ भन्दै आफ्नो भनाइ सिध्याइरहेका थिए । सास नसकिंदै उनीहरूको मन्तव्य सकिइसकेको हुन्थ्यो ।

असिम भुसाल भर्खर यू—१४ बाट तानिएका खेलाडी हुन् । उनले आफ्नो बोल्ने क्रममा भने, ‘हामीभन्दा जोर्डन धेरै माथिको टोली हो, तर पनि हामीले विजय हात पारेर राष्ट्रिय टोलीले ९ गोल खाएको बदला लिनुपर्छ ।’ उनको भनाइ नेपाल चार वर्षअघि विश्वकप छनोटमा जोर्डनमा ९ गोल खाएकोप्रति लक्षित थियो । हुन त नेपालले काठमाडौंमा दोस्रो लेगमा १—१ को बराबरी खेलेर एतिहासिक नतिजा निकालेको थियो । तर नेपाली फुटबलले अझै जोर्डनको पहिलो लेगको नतिजा बिर्सन सकेको छैन । त्यसैलाई असिमले चित्रित गरेका थिए । असिमको यही भनाइमा आफ्नो साथीबाट सबैभन्दा ठूलो ताली पाए । नेपाली फुटबलको विगतको अवस्थाबारे बोलेर मात्र होइन अफिसियलका अगाडि वजनदार भनाइ राखेर उनलाई साथीहरूले ठूलो तालीको साथ दिएका थिए ।

किर्गिस्तान गएको नेपाली यू—१६ टोलीमा सबै एन्फा एकेडेमीबाट उत्पादित खेलाडी छन् । २०५६ सालदेखि नै अखिल नेपाल फुटबल संघले आफ्नै मातहात रहने गरी एन्फा एकेडेमी चलाइरहेको छ । होस्टेलमा प्राय: यसको रेखदेखको जिम्मा टक्कर थापामा हुन्छ । अफिसियलको रूपमा किर्गिस्तानमा रहेका थापाले खेलाडीले यसरी बोल्न लागेको पत्याउनै सकेनन् । पत्याउन पनि कसरी ? थापाका अनुसार एन्फा एकेडेमीको कुनै पनि ब्याचले यसअघि खेलाडी पिच्छै बोलेको देखेका थिएनन् । त्यसमा असिम जसरी बोल्ने त कोही नै थिएनन् । प्रशिक्षक सिंहको नेपाली टोलीलाई तयार पार्ने यो एउटा योजना थियो । त्यसमा उनी सफल हुँदै थिए । जोर्डनसँगको खेल जितेर अन्य दुई टोलीसँग ‘गोर्खाली शक्ति’ देखाएर आफूअनुकूल नतिजा ल्याउने मोटामोटी रणनीति थियो नेपालको ।

समूह ‘बी’ खेल सुरुअघिको पत्रकार सम्मेलनमा आयोजक किर्गिस्तान र ओमानले एक्कासि जोर्डनलाई दाबेदारमा उभ्याइदिए । ओमान त्यही टोली थियो जसले गल्फ कपमा जोर्डनलाई हराएको थियो । रसियन ‘ब्लक’ टोलीसँग खेल्न नेपाललाई सधैं फलामको चिउरा चपाएजस्तो हुन्थ्यो । त्यसमा यसपटक किर्गिस्तान आफैं आयोजक राष्ट्र ।

जोर्डन नेपालभन्दा निकै माथिको टोली थियो । राष्ट्रिय टोलीको फिफा वरीयतामै जोर्डन ९१ र नेपाल १ सय ८५औं स्थानमा छ । त्यसमा जोर्डनका स्ट्राइकर फारिस अब्देल हक यूएईको यूथ लिगमा खेलिरहेका खेलाडी थिए । यसले प्रशिक्षक सिंहको तनाव झन् बढाएको थियो । अब नेपालले कसलाई जित्ने त । अझ जोर्डन प्रशिक्षक सामिह इलक्वातातीले नेपाललाई रहस्यम टिम हुन सक्ने मात्र बताएका थिए । सिंहको आफ्नै योजनाहरू थिए । जितको लालसा, एकाग्रता र स्वउत्प्रेरणा । खेलाडीलाई यी तीन मन्त्र दिएका थिए सिंहले । सिंह र अर्का प्रशिक्षक राजेश मानन्धर खेलाडीहरूलाई भन्थे, ‘राष्ट्रिय टोली जस्तोसुकै होस उमेर समूहमा त्यसले कुनै फरक पार्दैन । यसमा सबैको स्तर एउटै हुन्छ । सबै खेलाडीले र टोलीले शून्यबाट सुरु गर्नुपर्छ । लामो समयदेखि सँगै खेलिरहेकाले हाम्रो स्तर अझ माथि छ ।’ बिस्केकको डोलोन ओमुरजाकोभ रंगशालामा पहिलो खेलमा भयो पनि त्यही । छोटो पास, सानदार ड्रिब्लिङ, निकै छरिता विङ्स र स्ट्राइकर तथा रक्षकहरूले ओभरल्यापमा आएर गर्ने क्रसहरूपछि नेपाली टोली बेजोड देखियो । जोर्डनले पत्तो पाउनै सकेन ।

जोर्डनले खेलको अन्त्यतिर लय मिलाउने प्रयास गरेको थियो । तर नेपालले २—१ को नतिजा निकाल्यो । यो यस्तो नतिजा थियो जहाँ नेपालले जोर्डनलाई कुनै पनि समूहमा पहिलोपटक पराजित गरेको थियो । असिमको त्यो भनाइ जसले खेलाडीको मनोबललाई उठाएको थियो, त्यसलाई मान्ने हो भने नेपालले विश्वकप छनोटमा जोर्डनसँग राष्ट्रिय टोलीले ९ गोल खाएको बदला लिएका थियो । प्रशिक्षक सिंहले जोर्डन कस्तो टोली हो भनेर नतिजा आएपछि यसरी मात्र खुलासा गरे, ‘साँच्चै भन्ने हो भने जोर्डनसँग खेल्नुपर्दा म निकै डराएको थिए । किन भने उनीहरूबारे केही थाहा थिएन । उनीहरूको फुटबल संस्कार राम्रो छ । हाम्रो उनीहरूसँग केही तुलनै हुन सक्दैन । त्यसैले यो नतिजालाई भाग्यमानी पनि भन्नुपर्छ ।’ नेपाललाई रहस्मय टोली भन्ने जोर्डनका प्रशिक्षक इलक्वाताती हार स्विकार्न सकिरहेका थिएनन् ।

कप्तान आफैं उदाहरणीय हुनुपर्छ, कम्तीमा आफ्नै खेलाडीका लागि भए पनि । नेपाली टोली बिस्केक पुगेर जोर्डनसँगको खेलमा उभिँदासम्म मनीष कार्कीमा त्यो क्षमता देखिएको थिएन । जोर्डनसँगको खेलअघिको २—३ टिम मिटिङमा उनी पनि अन्य खेलाडीझैं टाउको लुकाएर ‘अफिसियल’ को भनाइ सुनिरहेको हुन्थे । जोर्डनसँगको स्मरणीय विजयले मनीषमा पनि ठूलो परिवर्तन ल्याइसकेको थियो । उनी नेपाललाई यस विजयको कति अर्थ छ भनेर प्रस्ट्याउनेसमेत भइसकेका थिए ।
पहिलो खेलमा देखाएको प्रदर्शनपछि अन्य टोली नेपाललाई लिएर चकित भइसकेका थिए । सबैले नेपाललाई दाबेदार मान्न लागिसकेका थिए । पहिलो दिन ओमान र आयोजक किर्गिस्तानबीचको खेलले प्रशिक्षक सिंहमा अझै डर थपिदिएको थियो । दुवै टोलीले निकै फास्ट खेलेका थिए । सिंहलाई त त्यो खेल कता कता यूरोपियन च्याम्पियन्स लिगको जस्तो पनि लागेको थियो । मध्यान्तरसम्म किर्गिस्तानसँग नेपालको नतिजा सिंह डरजस्तै थियो । नेपाल २—० ले पछाडि परेको थियो ।
नेपालले सुरुआतमै केही राम्रो मौका गुमाएको थियो । चेन्जिङ रुममा मध्यान्तरमा कसैको मुखबाट आवाज निस्किएको थिएन । त्यसपछि प्रशिक्षक सिंह गर्जिए । पहिला उनले नेपालले पाएको अवसरलाई उदाहरण दिए । अनि किर्गिस्तानले ३१ मिनेटमा २ गोल गर्न सक्छ भने नेपालले किन ३ गोल गर्न सक्दैनौं ? जोर्डनसँग खेलपछि हौसिएका नेपाली खेलाडीहरूले सेनामा जाँच दिन गएको जसरी ३६ इन्च छाती फुलाएर भने, ‘सक्छौं ।’ १८ मिनेटको अन्तरमा ३ गोल गरेर नेपालले ४–२ ले खेल आफ्नो पक्षमा पारेको थियो । नेपालको यो अर्को एतिहासिक नतिजा थियो । पहिलो २ खेलले अन्य समयमा दबिएर खेल्ने नेपालको गोल स्कोरिङ क्षमता देखाइसकेको थियो । रेजिन सुब्बा, दिनेश हेन्जन, अशोक थापा, अभिषेक रिजालजस्ता खेलाडी विपक्षीका लागि कसरी रोक्ने विषय बनिसकेका थिए ।

प्रशिक्षकद्वय सिंह र मानन्धर नेपाली टिम व्यवस्थापनले खेलाडीलाई यो स्थितिमा ल्याउन के मात्र गरेनन् । किर्गिस्तान भ्रमणमा सबै खेलाडीका लागि मोबाइल लान बन्देज लगाइएको थियो । ल्यापटप, सेल्फी स्टिक सबै प्रतिबन्ध थिए । मोबाइलमा पनि विशेषगरी सोसल मिडियामा फेसबुक चलाउन नपाएर खेलाडीहरू ‘सिक’ भएजस्ता देखिन्थे । भ्रमणमा जाँदा फोटो पनि खिच्न नपाउने र फेसबुक पनि चलाउन नपाउँदा उनीहरू नीरस महसुस गर्थे । बिस्केको होटल होस् या इस्तानबुलको ट्रान्जिट नौलो कोही भेटिएमा खेलाडीहरू सजिलै नजिकिन्थे । उनीहरू मेरो फोटो खिच्दे, अनि मलाई फेसबुकमा एड गर र त्यसमा फोटो पठाइदे भन्दै नयाँ व्यक्तिहरूसँग पनि सजिलै हिमचिम हुन्थे । मोबाइल चलाउँदा खेलाडीहरू छुटिएर बस्ने गरेको आरोप प्रशिक्षक सिंहको थियो । उनका अनुसार नेपाली टोलीमा राखिएको यो नयाँ नियमले खेलाडीलाई एकजुट बनाउन पनि मद्दत गरेको थियो ।

अनुशासनमा अझ बढी जोड दिइएको थियो । एन्फा एकेडेमीमा रहेका खेलाडीहरूलाई लिएर अनुशासनबारे धेरै चर्चा हुने गरेको छ । यसपटक पल्टनमा रहेका सिपाहीलाई जसरी खेलाडीलाई अनुशासनको दायरामा ल्याइएको थियो । बिस्केक पुगेपछि नेपाल पहिलो दिन अभ्यासका क्रममा जान लाग्दा रेजिन, राजेश परियार, सुमन अर्याल र राजीव लोप्चान बसमा १५ मिनेटजस्तो ढिला गरी आइपुगेका थिए । प्रशिक्षकद्वयले यी चार खेलाडीलाई केही सजाय दिने योजना बनाइसकेका थिए । तर जोर्डन टोलीले नेपालको प्रशिक्षण हेरिरहेकाले उनीहरू सजाय पाउनबाट जोगिए ।

किर्गिस्तान जानुअघिसम्म प्रेजेन तामाङ नेपालको अग्रपंक्तिका प्रमुख खेलाडी थिए । ओमानसँग खेल्ने दिन नेपालले हरेक दिनजस्तो बिहान १५ मिनेट स्ट्रेचिङ गरेको थियो । प्रेजेन १२ मिनेट ढिला आइपुगे । प्रशिक्षक सिंहले उनलाई स्ट्रेचिङमै मात्र नभई ओमानसँगको खेलमा प्लेइङ ११ मै राखेनन् । उनको भनाइ थियो, ‘खेलाडी जत्तिकै प्रतिभावान होस, तर ऊ अनुशासनमा बस्दैन भने उसले आफ्नो प्रतिभाअनुसार कहिल्यै खेल्न सक्दैन ।’ प्रेजेनको हकमा उनको बुझाइ पनि त्यही थियो ।
नेपाल यू–१६ ले यसअघि तीनपटक एएफसी यू–१६ छनोट चरण पार गरेको थियो । सबै स्वदेशी भूमिमा थियो । ओमानसँगको अन्तिम खेलमा नेपालले बराबरीको नतिजा निकाल्न सक्यो भने पनि भारतमा हुने एएफसी यू १६ च्याम्पियनसिपमा छनोट हुने थियो । विदेशी भूमिमा नेपालले यो सफलता पहिलोपटक पाउने थियो । तर नेपाल ३–१ ले पराजित भयो । मध्यान्तरसम्म नेपाल २–० ले पछाडि थियो । तर किर्गिस्तानविरुद्धजस्तो नेपालले नतिजा उल्टाउन सकेन । ओमानले नेपालको सबै खेल बुझेको थियो । दुवै विङ्सलाई कसेर राखेको थियो र क्रस भइहालेको बल पनि उनीहरूले सजिलै क्लियर गरेका थिए ।
नेपाल र ओमानको दुवै ६–६ अंक भएको थियो । हेड टु हेडमा पनि ओमान अगाडि थियो । यस्तोमा नेपालको अन्तिम आशा किर्गिस्तान र जोर्डनसँगै अन्य समूहको केही खेलमा थियो । एएफसी यू–१६ को समूह चरणमा कुल ११ समूह थिए र त्यसबाट सबै विजेता अर्को वर्ष भारतमा हुने च्याम्पियनसिपमा छनोट हुन्थे । नेपालले समूह विजेता हुने मौका गुमाइसकेको थियो । त्यस्तै शीर्ष चार उपविजेता पनि च्याम्पियनसिपमा पुग्ने थिए । किर्गिस्तानले जोर्डनलाई पराजित गरेपछि र अन्य केही नतिजा आफूअनुकूल आएपछि नेपाल चौथो उपविजेताको रूपमा एएफसी यू–१६ च्याम्पियनसिपमा छनोट भएको थियो ।

असोज ३ गते नेपालका लागि एतिहासिक दिन बन्दै थियो । त्यस दिन संविधान जारी हुँदै थियो नेपालमा । किर्गिस्तानमा ओमानसँग त्यही दिन आफूअनुकूल नतिजा निकालेमा नेपाल यू–१६ पहिलो पटक विदेशी भूमिबाट छनोट हँुदै थियो । बिहानको टिम मिटिङमा अधिकांश संविधान र नेपाल यू–१६ को सम्भावित सफलतालाई जोडेर हेरिएको थियो । नेपालले त्यो आफ्नो हातबाट त्यो मौका चुकाएको थियो । तर असोज ४ हुनुअगाडि नै यू–१६ टोलीले संविधान जारी भएको खुसीमा अर्को उत्साह थपिसकेको थियो छनोट भएर । गोलरक्षक अर्पण कार्कीको सानदार प्रदर्शनअगाडि सन्देश गुरुङ गोलपोस्टमुनि सधैं दोस्रो नम्बरमा रहे । ‘मेहनत र जोश हाम्रो राम्रो थियो, मुख्य टिमवर्क हो,’ सन्देश भन्छन, ‘खेल्न पाउनु र नपाउनुमा यसले कुनै सरोकार राख्दैन ।’ रक्षक रोमन लिम्बु नेपाल दोस्रो चरणका लागि योग्य भएकाले छनोट भएको तर्क राख्दै थिए ।

किर्गिस्तान, जोर्डन र ओमानसँग नेपाल नेपाल छनोट चरणका प्रतिद्वन्द्वी थियो । नेपाल यू–१६ टोलीको प्रतिस्पर्धा नेपाली यू–१९ फुटबल टोलीसँगैं थियो । अघिल्लो महिना बंगलादेशमा साफ यू–१६ च्याम्पियनसिपमा नेपाल सेमिफाइनलमै रोकिएको थियो । पुरानो प्रतिद्वन्द्वी भारतले नेपालको आशा समाप्त पारेको थियो । त्यसपछि नेपाल रित्तो हात नेपाल फर्कनुपरेको थियो । नेपाली टोली फर्किंदा कुनै त्यस्तो ठूलो स्वागत नपाएपछि सफलताको अर्थ उनीहरूले थाहा पाएका थिए । त्यसमा यू–१९ ले साफ च्याम्पियनसिप जितेपछि यू–१६ टोली ओझेलमा परेको जस्तै भएको थियो । अझ यू–१९ को सम्मान क्रम सुरु भएको थियो । त्यसले उनीहरूको छाती पोल्न सुरु गरेको थियो । आफूभन्दा सिनियरहरूले सम्मान पाएर नभई आफूहरूले चुकाएकोमा ।

नेपालले फुटबलको विश्वकपमा सहभागिता जनाउन सक्ने भनेको उमेर समूहमा मात्र हो । त्यसमा पनि विशेषगरी यू–१६ मा । तर नेपालले यसअघि सहभागिता जनाएको एएफसी यू–१६ च्याम्पियनसिपमा समूह चरण पार गर्न सकेको छैन । सेमिफाइनलसम्म पुग्ने टोलीले फिफा यू–१७ विश्वकपमा प्रवेश पाउँछन् । नेपालको लक्ष्य उमेर समूहमा विश्वकप खेल्ने छ । अहिले त्यो लक्ष्यमा नेपाली यू–१६ टोली अगाडि आएका छन् ।

प्रकाशित : आश्विन १२, २०७२ १२:०९
प्रतिक्रिया
पठाउनुहोस्

संविधान जारी भएकोमा अमेरिकी राष्ट्रपति ओबामाद्वारा खुसी व्यक्त

रासस

न्युयोर्क — अमेरिकी राष्ट्रपति बाराक ओबामाले नेपालमा लोकतान्त्रिक र समावेशी संविधान जारी भएकोमा नेपाल र नेपाली जनतालाई बधाई एवम् शुभकामना दिएका छन् ।

राष्ट्रसङ्घको ७०औँ महासभा भाग लिन आएका राष्ट्र एवम् सरकार प्रमुखहरुको सम्मानमा राष्ट्रपति ओबामाद्वारा सोमबार आयोजित रात्रिभोजका अवसरमा नेपाली प्रतिनिधि मण्डलका नेता एवम् उपप्रधानमन्त्री प्रकाशमान सिंहलाई नेपालमा लोकतान्त्रिक समावेशी संविधान जारी भएकोमा बधाई तथा शुभकामना दिएका हुन् ।

उपप्रधानमन्त्री सिंहले राजनीतिक दलहरुको सहमतिमा संविधानसभाबाट सङ्घीय लोकतान्त्रिक गणतान्त्रिक नेपालको संविधान जारी भएको र दलहरुको सहमतिमा यसको कार्यान्वयन गरिने बताएका थियो ।

यसैगरी राष्ट्रपति ओबामाले राष्ट्रसङ्घका महासचिव वानकी मुनद्वारा आयोजित  विश्वका नेताहरु सम्मिलित शान्ति सम्मेलनका अवसरमा पनि उपप्रधानमन्त्री सिंहलाई नेपालमा संविधानसभाबाट संविधान जारी भएकोमा राम्रो काम भएको भन्दै खुसी प्रकट गरेका थिए ।

प्रकाशित : आश्विन १२, २०७२ ११:२१
पूरा पढ्नुहोस्
प्रतिक्रिया
पठाउनुहोस्
×