गुलरिया–नेपालगन्ज सडक ४ लेन हुने

कान्तिपुर संवाददाता

गुलरिया — दैनिक सयभन्दा बढी सवारी आउजाउ गर्ने गुलरिया–नेपालगन्ज खण्डलाई ४ लेन बनाउन लागिएको छ। यसका लागि गुलरियादेखि भादा पुलसम्म करिब डेढ किमि सर्भे भइसकेको प्राविधिकले बताए।

बाँकेको नेपालगन्ज–खजुरा खण्ड पनि सर्भे भई टेन्डर प्रक्रियामा गएको डिभिजन सडक कार्यालय नेपालगन्जले जनाएको छ।

गुलरिया र खजुरा खण्ड एकैपटक निर्माण हुने डिभिजनले जनाएको छ। चालु वर्षमा करिब ३ किमि सडक ४ लेन बनाउनका लागि ३३ करोड रुपैयाँ निकासा भइसकेको छ। डिभिजन प्रमुख अर्जुन बमका अनुसार राजनीतिक दलको सहमतिअनुसार जिल्ला प्रहरीदेखि अति व्यस्त मानिएको भादा पुलसम्म पहिलो चरणमा सडक स्तरोन्नति गरिनेछ। एक किमि सडक निर्माणका लागि झन्डै ९ करोड रुपैयाँ लाग्ने अनुमान रहेको बमले बताए। उक्त रकम विद्युत्, टेलिफोनका पोल र खानेपानीका पाइप सार्नेदेखि सहरी क्षेत्रमा पर्ने सडकको दाया–बायाँ नाली बनाउनेमा खर्च हुनेछ। चार लेन सडकका लागि हाललाई २४ मिटर चौडा मापदण्ड तोकिएको छ।
गुलरिया–नेपालगन्ज खण्ड ३६ किलोमिटर दूरीको छ। बजेट निकासाअनुसार चार लेनको काम अघि बढदै जाने सडकका प्राविधिकको भनाइ छ। जिल्ला प्रहरीदेखि चाइना लङ फुडसम्म सडक विस्तार हुँदा २४ मिटर फराकिलो हुने डिभिजन कार्यालयले जनाएको छ। यस क्रममा दर्जनौं घर सार्नुपर्ने अवस्था आउने कार्यालयले जनाएको छ। ०४६ मा सञ्चालन भएको सडक ०५३ मा साढे ३ मिटर चौडा कालोपत्रे भएको थियो। सडक साँघुरो बन्दै गएपछि ०६६ मा साढे ५ मिटर चौडा बनाई कालोपत्रे गरिएको थियो।
 दैनिक सवारी चापले सडकमा आउजाउ गर्न समस्या भइरहेको समय चार लेनको निर्माण हुने भएपछि दुर्घटना न्यूनीकरण हुने स्थानीयको विश्वास छ। सडक डिभिजनले अतिक्रमण गरी निर्माण गरेका घर भत्काउन थालेको जनाएको छ। डिभिजन प्रमुख बमले यसै क्रममा बाँके र बर्दियामा अतिक्रमण गरिएका संरचना हटाउने अभियान थालिएको जनाए। सडक विस्तारपछि दैनिक यातायातका साधन आउजाउमा सजिलो हुने र अनावश्यक सास्ती नहुने स्थानीयको भनाइ छ।

प्रकाशित : वैशाख २५, २०७४ १०:०५
प्रतिक्रिया
पठाउनुहोस्
ADVERTISEMENT

जडीबुटी संकलनमा बाधा

वसन्तप्रताप सिंह

बझाङ — लामो समयसम्म सामुदायिक वन नवीकरण नहुँदा बझाङका दुर्गम गाउँका १५ सय परिवार जडीबुटीलगायत वनस्रोत उपभोग गर्नबाट वञ्चित भएका छन्। जडीबुटी बिक्री र कृषिकर्मबाट गुजारा चलाउँदै आएका उनीहरूले दैनिक जीवनयापन गर्न कठिनाइ भएको बताएका छन्।

वातावरण संरक्षण नियमावली २०५४ (दोस्रो संशोधन २०६४) को अनुसूची १ र २ मा भएको प्रारम्भिक वातावरणीय परीक्षण (आईईई) र प्रारम्भिक वातावरणीय प्रभाव मूल्यांकन (ईआईए) सम्बन्धी व्यवस्थाको फरक व्याख्याले गर्दा जिल्लाका ५ सामुदयिक वन नवीकरण हुन सकेका छैनन्।
कार्ययोजनाको म्याद समाप्त भएको २ वर्ष बित्न लाग्दा पनि साबिक कैलाश गाविसको श्रीविनायक, गडरायको विनायक, कोटदेवलको रनाडा, रिलुको दय र हेमन्तबाडाको हेमन्तबाडा सामुदायिक वन नवीवरण हुन नसकेका हुन्। वन नवीकरण नभएको अवस्थामा सरकारको अनुमतिबिना स्थानीयले कुनै पनि वन पैदावारको उपयोग गर्नु कानुनी रूपमा दण्डनीय हुन्छ।
सामुदयिक वनका उपभोक्ताले भने वन हस्तान्तरण गर्दा गरिनुपर्ने भनेर किटान भएको व्यवस्थालाई जिल्ला वनले अपव्याख्या गरी आफूहरूलाई दु:ख दिइरहेको बताएका छन्। श्रीविनायक सामुदायिक वनका अध्यक्ष देजीजंग सिंहले भने, ‘हुँदै नभएको व्यवस्था देखाएर हामीले वर्षौंदेखि संरक्षण र उपयोग गर्दै आएको वनबाट अलग गराउने काम भएको छ।’
नवीकरण नभएपछि आयस्रोतको प्रमुख माध्यम जडीबुटी संकलन गर्न नपाएको, काठ नपाउँदा घरगोठ बनाउन नपाएको र पशुपालन र कृषि कार्यका लागि वनस्रोत उपभोग गर्न नपाएको दय सामुदायिक वनका उमेश जेठाराले बताए। उनले भने, ‘खेतीपाती हँुदैन। अरू रोजगारको विकल्प छैन, वनकै जडीबुटी बेचेर परिवार पालिरहेका धेरैको बिचल्ली हुन लाग्दा पनि जिल्ला वनले हाम्रो समस्या सुनेन।’
पटक–पटक समस्या जानकारी गराउँदा पनि जिल्ला वनले चासो नदेखाएको रनाडा सामुदायिक वनका वीरेन्द्रबहादुर सिहंले बताए। गडरायकी शान्ति बोहोराले भनिन्, ‘हामीले वर्षाैंदेखि जोगाएको वनमा घाँसदाउरा गर्न नपाउने अवस्था भएको छ। हामी साह्रै मर्कामा पर्‍यौं।’
यता जिल्ला वन अधिकृत अशोककुमार श्रेष्ठले भने यहाँका सामुदायिक वनको समस्याबारे आफू जानकार भए पनि नियमका कारण नवीकरण रोकिएको बताए। उनले उपभोक्ताको गुनासो सुन्दै समस्या समाधानका लागि आफूले पनि पहल गरिरहेको बताएका छन्।
समयमै नवीकरण नहुँदा अन्तर्राष्ट्रिय संस्था फरेस्ट स्टेवार्डसिप काउन्सिलबाट दिगो वन व्यवस्थापनका अन्तर्राष्ट्रिय आधार र मापदण्डअनुसार व्यवस्थित भएको भनेर प्रमाणपत्र पाएका यी ५ वटै वनको प्रमाण खोसिने अवस्थामा पुगेको सामुदायिक वन उपभोक्ता महासंघका सचिव मंगल खड्काले बताए।

प्रकाशित : वैशाख २५, २०७४ १०:०४
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT