अपांगता बालकलाई उपचार समस्या

काभ्रे — खर्च अभावमा पूर्ण अपांगता भएका एक बालकको उपचार हुन सकेको छैन । दाप्चा काशिखण्ड ६ का २ वर्षीय बालक सम्राट तामाङ र उनको परिवार सहयोगीको प्रतीक्षामा छ ।

जन्मेदेखि नै जन्डिस र निमोनियाँले टाउको नअडिने समस्या भएका सम्राट बोल्न, सुन्न पनि सक्दैनन् । आँखा पनि नदेख्ने उनका हात र खुट्टाका आंैला सीधा छैनन् । ‘१ महिना धुलिखेल अस्पतालमा राखेर निको हुन्छ भनेपछि फर्काएर ल्यायौँ तर सुधार आएन,’ आमा सुजिताले भनिन्, ‘त्यति बेला उपचार गर्न २ लाख ऋण लाग्यो, फेरि उपचार गर्न पैसा नभएकाले त्यतिकै बसेका छौँ ।’ सुजिताका अनुसार बुबा, ठूलोबाबु पनि छोराको उपचार गर्दा लागेको ऋण तिर्न मलेसिया गएका छन् । ‘

उपचारमा लागेको ऋण र विदेश जाँदाको ऋण तिर्न नै नसकिने भयो,’ आमाले दुखेसो गरिन्, ‘यस्तो अवस्थामा छोराको थप उपचार गर्न सक्ने अवस्था छैन ।’ पैसा भए उपचार सम्भव भएको सुनेकी सुजिता सहयोगी हातको पर्खाइमा छिन् ।