कान्तिपुर वेबसाईट
AdvertisementAdvertisement
२२.१२°C काठमाडौं
काठमाडौंमा वायुको गुणस्तर: १५९

संक्रमण बढेसँगै बुस्टर खोप लगाउन सुरु

कञ्चनपुर — कोरोना संक्रमण देखा पर्न थालेपछि खोप दिने क्रम पनि सुरु भएको छ । अहिले ज्येष्ठ नागरिक, स्वास्थ्यकर्मी, गर्भवती र रोग प्रतिरोधात्मक क्षमता कम भएकाहरूलाई बुस्टर डोजका रूपमा खोप दिन थालिएको हो । 

संक्रमण बढेसँगै बुस्टर खोप लगाउन सुरु

जिल्ला स्वास्थ्य कार्यालय कञ्चनपुरका कोल्ड चेन अधिकृत जनक कुँवरका अनुसार अहिले बुस्टर डोजका लागि फाइजरको ५० हजार मात्रा आएको छ । पहिलो चरणमा ५५ वर्षमाथिका व्यक्ति, स्वास्थ्यकर्मी लगायतलाई खोप दिइनेछ । जिल्लाका सबै वडामा खोप अभियान सञ्चालन भइरहेको कुँवरले बताए ।

‘आवश्यकताअनुसार खोप आउने क्रम बढ्दै जानेछ,’ उनले भने, ‘दुई खोप लगाएकालाई तेस्रो र तीन खोप लगाएकालाई चौथो खोप दिइनेछ ।’ संक्रमण बढ्न थालेपछि पुनः खोप अभियान सुरु गरिएको हो ।

पछिल्लो समय भारतबाट घर फर्किनेहरूमा सक्रमण देखिन थालेको छ । कञ्चनपुरको सीमानाका गड्डाचौकीस्थित हेल्थ डेस्कका अनुसार पछिल्लो एक सातामा ६ जनामा संक्रमण देखिएको छ । हेल्थ डेस्कका एक स्वास्थ्यकर्मीमा समेत संक्रमण देखिएको हेल्थ डेस्ककी इन्चार्ज प्रीति बोहराले बताइन् । उनका अनुसार बिहीबार र शुक्रबार मात्रै नाकामा घर फर्किनेमा संक्रमण देखिएको छैन ।

स्वास्थ्य कार्यालयका अनुसार हालसम्म जिल्लामा पहिलो मात्रा खोप लगाउनेको संख्या ४ लाख बढी छ । दोस्रो मात्रा लगाउनेको संख्या ३ लाख बढी छ । बुस्टर डोजका रूपमा तेस्रो मात्रा खोप लगाउनेको संख्या २ लाख पुगेको छ । पहिलो र दोस्रो मात्राको खोप लगाउनेको संख्या ८५ प्रतिशतभन्दा बढी भए पनि बुस्टर डोज लगाउनेको संख्या ४८ प्रतिशत मात्रै छ ।

‘खोपको अभावले संक्रमण कम हुँदा खोप लगाउन नआउनेका कारण मात्रा कम भएको हो,’ कुँवरले भने, ‘अब खोप आएसँगै बुस्टर डोज लगाउनेको संख्या पनि बढ्दै जानेछ ।’ कञ्चनपुरमा बिहीबारदेखि बुस्टर डोजका रूपमा फाइजरको खोप लगाउन थालिएको हो ।

कोरोना संक्रमणको पहिलो र दोस्रो लहरका बेला खोप लगाउनेको संख्या धेरै थियो । सुरुमा खोप लगाउन कम आए पनि दोस्रो लहरका बेला संक्रमणकै कारण धेरैको ज्यान गएपछि खोप लगाउनेको संख्या बढेको थियो । संक्रमण कम भएपछि खोप लगाउन आउनेको संख्या कम भएको थियो ।

प्रकाशित : चैत्र १८, २०७९ ०९:०३
प्रतिक्रिया
पठाउनुहोस्
जनताको राय

मन्त्रीहरुले आफ्ना र दलका शीर्ष नेताका निर्वाचन क्षेत्र केन्द्रित गरी विनियोजित बजेटमा सांसदहरूले संसद्मा गरेको विरोधबारे तपाईंको धारणा के छ ?

x