रुकुम पश्चिम — त्रिभुवन विश्वविद्यालयअन्तर्गत रुकुम पश्चिममा रहेका जम्मा ६ वटा क्याम्पसमा स्वतन्त्र विद्यार्थी युनियनको निर्वाचन सम्पन्न भएको छ । सबै क्याम्पसमा निर्वाचन सकिँदा नेकपा माओवादी केन्द्रनिकट अखिल क्रान्तिकारीले अधिकांश स्थानमा जित हासिल गरेको छ ।
सर्वसम्मत नेतृत्व चयन गरिएका ४ वटा क्याम्पस र चुनाव भएका ३ मध्ये २ वटा क्याम्पसमा गरेर ६ वटा क्याम्पसमा आफ्नो संगठनले जित हात पारेको जिल्ला अध्यक्ष नारायण केसीले बताए । केसीका अनुसार अखिल क्रान्तिकारीका तर्फबाट बाँफिकोटको स्यार्पू क्याम्पसमा किरण विश्वकर्मा, सानीभेरीको सानीभेरी क्याम्पसमा भागिराम भण्डारी, चौरजहारीको शितल क्याम्पसमा निराजन केसी र त्रिवेणीको सिम्रुतु क्याम्पसमा निर्माला बुढाथोकी सर्वसम्मत भएका छन् । त्यसैगरी आठबीसकोटको राडीज्युला क्याम्पसमा दीपक केसी र चौरजहारीको जहारी क्याम्पसमा भरत विक निर्वाचित भएको पनि अध्यक्ष केसीले जानकारी दिए ।
मुसीकाटको रुकुमेली क्याम्पसमा भने कांग्रेस निकट नेपाल विद्यार्थी संघका अनिशेष केसीको प्यानल विजयी भएको छ । अखिल क्रान्तिकारीले नेतृत्व पाएकामध्ये सर्वसम्मत भएका ठाउँमा विभिन्न संगठनको समान सहभागिता रहेको छ । तर चुनाव जितेका स्थानहरुमा भने अखिल क्रान्तिकारीले बहुमत पदाधिकारी र सदस्यहरु जितेको छ ।
सर्वसम्मत निर्वाचन सम्पन्न भएका बाहेका क्याम्पसमा आइतबार चुनाव गरिएको थियो । शान्तिपूर्ण ढंगले जिल्लाका सबै क्याम्पसहरुमा स्वतन्त्र विद्यार्थी युनियनको निर्वाचन सम्पन्न भएको क्याम्पसहरुले बताएका छन् ।
नवनिर्वाचित स्वातन्त्र विद्यार्थी युनियनका नेताहरूले क्याम्पसको सर्वांगीण विकासका साथै शैक्षिक उन्नयनका लागि काम गर्ने प्रतिबद्धता जनाएका छन् । स्यापू क्याम्पसका अध्यक्ष किरण विश्वकर्माले स्वावियुको लामो रिक्ततालाई पूरा गर्दै शैक्षिक विकासमा जुट्ने बताए । त्यस्तै रुकुमेली क्याम्पसका अध्यक्ष अनिशेष केसीले भने, ‘हामी क्याम्पसको विकास, शैक्षिक वृत्तीका साथै यहाँको सुशासन तथा शैक्षिक क्यालेन्डरको प्रभावकारी कार्यन्वयनका लागि लाग्छौं । सरोकारवाला सबैको सल्लाह, सुझाव लिएर अघि बढ्ने योजना छ ।'
जिल्ला सदरमुकाममा रहेको एकमात्र आंगिक र पुरानो मध्यपश्चिम विश्वविद्यालयअन्तर्गतको मुसीकोट खलंगा बहुमुखी क्याम्पसमा भने विद्यार्थी संगठनका बिचमा कुरा नमिल्दा स्ववियुको चुनाव हुन सकेको छैन । विश्वविद्यालयको निर्देशन र सरोकारवालका बिचमा छलफल गरेर चुनाव तोक्ने क्याम्पस प्रमुख बुद्धिप्रसाद गौतमले जानकारी दिए ।
प्रकाशित : चैत्र ७, २०७९ ०८:०८
