दार्चुला — नौगाड गाउँपालिकामा दलहन बालीको उत्पादन र बजार प्रवर्द्धनमा गाउँपालिकाले सहयोग गरेको छ । गाउँपालिकाको अधिकांश ठाउँमा दालजन्य बाली उत्पादन हुने भएपछि बजार विस्तारका लागि गाउँपालिकाले सहयोग गरेको हो ।
नौगाड गाउँपालिकाले चालु आर्थिक वर्ष २०७९/०८० को कृषि तथा पशुपन्छी विकास शाखाको वार्षिक स्वीकृत कार्यक्रमअन्तर्गत दाल बालीमा बजार प्रवर्द्धन कार्यक्रम अगाडि बढाएको छ । स्थानीय उत्पादनको बजार प्रवर्द्धनका लागि दालहरूको ढुवानी, ब्रान्डिङ, प्याकेजिङ र अन्य साधनमा अनुदान दिएको छ । यसका लागि चालु आवमा गाउँपालिकाले बजेट विनियोजन गरेको कृषि तथा पशुपन्छी विकास शाखा अधिकृत प्रकाश सिंह धामीले बताए । उनका अनुसार अधिकांश बस्तीमा विभिन्न प्रकारका सिमी, भटमास, केराउलगायतका दाल प्रशस्त उत्पादन हुने गरेको छ ।
अहिलेसम्म किसानहरूले उत्पादन गरेको दालले खासै मूल्य नपाएको हुनाले उत्पादनमा मन लगाउन सकेका थिएनन् । अब गाउँपालिकाले बजार प्रवर्द्धन र ढुवानीमा सहयोग गरे उत्पादनमा वृद्धि हुने उनको बुझाइ छ । कार्यक्रम सञ्चालनका लागि आवश्यक पर्ने दाल तौलिने काँटा मेसिन, बोरा र गाउँपालिकाका टाढाटाढा गाउँबाट ढुवानी गरेबापत ढुवानीमा अनुदान उपलब्ध गरिएको छ । स्थानीय दाल बालीको प्रवर्द्धन गर्न र बजारको सुनिश्चितता गर्नका लागि यो कार्यक्रम सञ्चालन गरिएको गाउँपालिकाले जनाएको छ ।
स्थानीय बस्तीहरूमा धेरै थरीका दाल बाली उत्पादन हुन्छन्, तर तिनको बजारीकरणको अभाव र ढुवानी समस्याको कारणले सम्बन्धित बजारसम्म पुग्न नसक्ने भएकाले यो कार्यक्रम सञ्चालन गरिएको गाउँपालिकाका उपाध्यक्ष जगतसिंह ठगुन्नाले बताए । बजारमा पाइने दालमा भन्दा उच्च पहाडी क्षेत्रमा उत्पादन भएको दाल बालीमा पौष्टिक तत्त्वका हिसाबले गुणस्तर र फाइदाजनक रहेको गाउँपालिकाको बुझाइ छ । यसले किसानलाई उत्पादनमा आकर्षण र बजारको सुनिश्चिता हुने बाँझा खेतहरूमा उत्पादन सुरु हुने सम्भावना बढेको उपाध्यक्ष ठगुन्नाको भनाइ छ । उनले गाउँपालिकाका स्थानीय बजार एवं सदरमुकाम खलंगा, गोकुलेश्वर बजारमा नौगाडमा उत्पादन भएको दाल बिक्री भइरहेको बताए । रासायनिक मल र विषादी नमिसिएको र रोग, किरा कम लागेको कारणले पनि अहिले स्थानीय दाल बालीमा रुचि बढेको कृषि तथा पशुपन्छी विकास शाखा अधिकृत धामीको भनाइ छ । स्थानीय दुई सहकारी संस्थाले किसानबाट खरिद गरेर ब्रान्डिङ गरेर बजारमा पठाउने छन् ।
