कञ्चनपुर — कञ्चनपुरको कृष्णपुर नगरपालिका ५ अमखैयाबाट भन्सार छली भित्र्याइएको १ लाख ७४ हजार रुपैयाँ बराबरको अवैध सामान बरामद गरिएको छ । ईलाका प्रहरी कार्यालय कञ्चनपुरले बुधबार बेवारिसे अवस्थामा उक्त सामान बरामद गरेको हो ।
बरामद गरिएको सामानमा कपडा र दूध पाउडर रहेको छ । उक्त सामान भन्सार कार्यालय गड्डाचौकीलाई बुझाइएको जिल्ला प्रहरी कार्यालय कञ्चनपुरका डीएसपी प्रकाश डाँगीले बताए ।
काठमाडौँ — ललितपुर महानगरपालिकाले महानगरभित्रका अव्यवस्थित तार हटाउन 'स्काई लिफ्टिङ' ल्याएको छ । शहर कुरुप बनाउने गरी टाँगिएका तार हटाउनेदेखि सडक आसपासका रुख बिरुवाका हाँगा काट्न, स्मार्ट सडक बत्ती सरसफाइ गर्न र नयाँ जडान गर्न, होर्डिङ बोर्ड निकाल्नलगायत सहरी सुन्दरता बढाउने गरी काम गर्न महानगरपालिकाले 'स्काई लिफ्टिङ' खरिद गरेको हो ।
मेयर चिरीबाबु महर्जनले शहरी सुन्दरता बढाउन महानगरले सबै प्रयास गरिरहेको बताए । 'यो मेसिन बहुउपयोगी रहेछ । यसलाई अहिले हामी सहरी सुन्दरता बढाउने काममा प्रयोग गर्दैछौँ,' मेयर महर्जनले भने ।
महानगरले यसअघि विरुवालाई नुहाइदिन विशेष किसिमको पानी ट्याङ्कर खरिद गरेको थियो । उक्त ट्याङ्करले बिरुवामा पानी हाल्दा धुलाम्मे बिरुवा सफा देखिन्छ । महानगरले यो ट्याङ्करबाट बिरुवामा पानी हिउँद महिनामा हाल्ने गर्छ । हिउँदमा आकाशबाट पानी नपर्दा धुलाम्मे भएका बिरुवा यो ट्याङ्करबाट पानी हाल्दा सुकिला र चिल्ला देखिन्छन् ।
महानगरपालिकाका प्रमुख प्रशासकीय अधिकृत गणेश अर्यालले सहरलाई सुन्दर र सफा बनाउने कामलाई महानगरले प्राथमिकताका साथ काम गरिरहेको बताए ।
प्रकाशित : चैत्र २, २०७९ १४:४७
