२६.१२°C काठमाडौं
बझाङमा ट्रकसँग मोटरसाइकल ठोक्किँदा १ जनाको मृत्यु
बझाङ — बझाङमा ट्रकसँग मोटरसाइकल ठोक्किँदा एक जनाको मृत्यु भएको छ । मंगलबार बिहान धनगढीबाट बझाङ आउँदै गरेको मालवाहक ट्रक र चैनपुरदेखि बागथलातर्फ जाँदै गरेको मोटरसाइकल ठोक्किँदा मोटरसाइकलमा सवार २५ वर्षीया अमृता खत्रीको मृत्यु भएको हो । खत्री ४ महिनाकी गर्भवती भएको प्रहरीको भनाइ छ ।
दुर्गाथली गाउँपालिका–३ रकैल घर भएकी खत्री चार महिनाकी गर्भवतीसमेत रहेको बुझिएको जिल्ला प्रहरी कार्यालयका प्रवक्ता रमेश अवस्थीले बताए ।
सुपप्र ०१०१० प ५३१७ नम्बरको मोटरसाइकल सुपप्र ०१००१ ख ३०७१ नम्बरको ट्रकसँग जयपृथ्वी राजमार्गमा पर्ने केदारस्युँ गाउँपालिकाको बज्वा भन्ने ठाउँमा ठोक्किएको थियो । मृतक खत्री मोटरसाइकलको पछाडि बसेको प्रत्यक्षदर्शीले बताएका छन् ।
ट्रकचालक दीपेन्द्र साउदलाई प्रहरीले नियन्त्रणमा लिएको छ । मोटरसाइकल चालक नारायण जोशी भने दुर्घटनापछि फरार रहेको प्रहरीले बताएको छ । जोशी र मृतक खत्री एउटै गैरसरकारी संस्थामा कार्यरत रहेको पनि खुल्न आएको जिल्ला प्रहरी कार्यालयका प्रमुख डीएसपी जागेश्वर भण्डारीले बताए ।
प्रकाशित : माघ २४, २०७९ १५:१४
