चार दशकदेखि सडक अलपत्र
काठमाडौँ — कञ्चनपुरलाई डडेलधुराको भित्री मधेस जोड्ने दैजी–जोगबुडा सडक बनाउने विषय उठेको चार दशक पुग्यो । सडक निर्माणका लागि पटक पटक ठेक्का सम्झौता पनि भयो । करोडौं रकम पनि खर्च भइसक्दा पनि सडकको अवस्था दयनीय छ । हिउँदमा जेनतेन यातायातका साधन चले पनि बर्खामा भने पैदल यात्रासमेत जोखिम हुने गरेको छ ।
२०४२ मा तत्कालीन प्रधानमन्त्री लोकेन्द्रबहादुर चन्दले सुरुवात गरेको दैजी–जोगबुडा सडक अझै निर्माण हुन सकेको छैन । केही ठाउँमा भएको कालोपत्र पनि बर्खामा बग्ने गरेको छ । कालोपत्र भएको सडकको नामनिसान नै भेटिँदैन ।
‘सडक बन्ने आसमै हामी बुढा भयौं, अझै सडक उस्तै छ,’ डडेलधुराको परशुराम नगरपालिका–६ की चन्द्रादेवी बमले भनिन् । दैजी–जोगबुडा सडक निर्माण सुरु हुँदा डडेलधुराबाट गाई/भैंसी चराउन यही बाटो भएर तराई झर्थे ।
कञ्चनपुरको वेदकोट नगरपालिकामा पर्ने दैजीदेखि डडेलधुराको सीमा लिप्नासम्म १८ किलोमिटर र लिप्नादेखि डडेलधुराको परशुराम नगरपालिकाको सदरमुकाम लालढुंगासम्म १४ किलोमिटर सडक निर्माण दुई प्याकेजमा भइरहेको छ । प्रदेश गौरवको आयोजनाअन्तर्गत डडेलधुरातर्फ पूर्वाधार विकास कार्यालय डडेलधुरा र कञ्चनपुरतर्फ पूर्वाधार विकास कार्यालय कञ्चनपुर मातहत सडक निर्माणको काम भइरहेको हो ।
कञ्चनपुरतर्फ सडक कालोपत्रका लागि २०७५ मा नागार्जुन कन्स्ट्रक्सन प्रालिसँग १६ करोडमा ठेक्का सम्झौता भएको थियो । २ वर्षभित्र काम सक्नेगरी ठेक्का सम्झौता भए पनि हालसम्म निर्माण कार्यले गति लिन सकेको छैन । वेदकोट नगरपालिकाको छेलादेखि उत्तरतर्फ चुरेमा केही ठाउँमा सडक कालोपत्र भए पनि गत वर्ष बाढीले उक्त सडक बगाएको छ । नागार्जुन कन्स्ट्रक्सन प्रालिका सञ्चालकको मृत्यु भएका कारण पनि काम रोकिएको थियो ।
‘केही ठाउँमा कालोपत्र बगाएको छ, केही ठाउँमा पर्खाल पनि बगेको छ,’ पूर्वाधार विकास कार्यालय कञ्चनपुरका इन्जिनियर हेमराज भट्टले भने, ‘गत वर्षदेखि निर्माण कार्य पनि ठप्प छ ।’ उनका अनुसार लिप्ना क्षेत्रमा गत वर्ष र अघिल्लो वर्ष बाढीका कारण पर्खालसमेत बगाएकाले पुनः मर्मत गर्नुपर्ने भएको छ । दुई वर्षअघि वेदकोट तालसम्मै सडक कालोपत्र गरिएको थियो । उक्त सडक कालोपत्र भएको दुई महिनामै खाल्डाखुल्डी परेको थियो । सडक निर्माणमा कमसल सामग्री प्रयोग तथा मापदण्डअनुसार काम नभएको भन्दै स्थानीयले विरोध गरेका छन् ।
डडेलधुरातर्फ पनि डेढ वर्षदेखि सडक निर्माण ठप्प छ । आउँदो असारसम्म काम सक्नेगरी शर्मा राजेन्द्र जेभीसँग १४ किलोमिटर सडक कालोपत्रका लागि ०७७ मा २१ करोड ३६ लाखमा ठेक्का सम्झौता भएको थियो । परशुराम नगरपालिकाको गाई बाँधेदेखि जोगबुडासम्म ५ किलोमिटर सडक कालोपत्र भए पनि बाँकी सडकको काम अघि बढ्न सकेको छैन ।
‘डेढ वर्षदेखि काम ठप्प छ,’ पूर्वाधार विकास कार्यालय डडेलधुराका इन्जिनियर सूर्यप्रकाश जोशीले भने, ‘गत वर्ष बाढीले सडक बगाएपछि काम सुरु हुन सकेको छैन ।’ उनले निर्माण कम्पनीलाई ताकेता गरे पनि काम सुरु नगरेको बताए । शर्मा राजेन्द्र जेभी डडेलधुरा कांग्रेसका सभापति भीमबहादुर साउदको हो । उनी परशुराम नगरपालिकाका पूर्वनगर प्रमुख पनि हुन् ।
