भारततर्फ जानेलाई नाकामा कडाइ

कोरोना संक्रमणका बेला लकडाउन सुरु भएसँगै भारततर्फ प्रवेश गर्नेहरूलाई एसएसबीले परिचर्यपत्र अनिवार्य गरेको थियो, जुन अहिले पनि जारी छ । सीमावर्ती बजारमा किनमेलका लागि जानेहरू घण्टौं लाइन लागेर चेकजाँच गराउँदा समस्यामा परेको बताउँछन् । ‘कहिले नागरिकता माग्छ, कहिले अन्य थोक माग्छ,’ कञ्चनपुरको भीमदत्त नगरपालिका ८ तिलाचौरका राज भट्टले भने, ‘लाइन लागेर नाम दर्ता गराउँदा आधा घण्टा लाग्छ, त्यसपछि पनि भित्र लगेर फेरि चेक गराइन्छ ।’

‘नागरिकता वा परिचयपत्र अनिवार्य गरेको कोरोनादेखि नै हो,’ भीमदत्त नगरपालिका ११ गड्डाचौकीका किसन खड्काले भने, ‘कोरोनाका बेला संक्रमण रोकथामका लागि लागू भएको कडाइ एसएसबीले अहिले पनि जारी राखेको छ ।’ उनका अनुसार चेकजाँचकै कारण अहिले किनमेलका लागि भारततर्फ जाँदा आधा/एक घण्टा बढी समय लाग्ने गरेको छ । एसएसबीले नियमित चेकजाँचभन्दा केही कडाइ गरेको सुरक्षाकर्मीहरू बताउँछन् । उनीहरूका अनुसार भारतमा २६ जनवरी अर्थात् गणतन्त्र दिवस नजिकिँदै गरेका कारण पनि कडाइ भएको हो ।

एक महिनाअघि भीमदत्त नगरपालिका ११ को वडा कार्यालयले सीमामा आवागमन सहज बनाउन दुवैतर्फका सुरक्षाकर्मीबीच छलफल गरेको थियो । भारततर्फ आउजाउ गर्नेले निकै सास्ती खेप्नुपरेपछि वडा कार्यालयले सहजीकरण गरेको थियो । त्यसपछि आवागमनमा केही सहजता आएको थियो । तर एक महिना नबित्दै फेरि नाकामा कडाइ हुँदा सर्वसाधारणले सास्ती खेप्नुपरेको छ ।

‘केही दिनदेखि नाकामा कडाइ बढाएको छ, चेकजाँचमा निकै सास्ती भइरहेको छ,’ कञ्चनपुर उद्योग वाणिज्य संघका वरिष्ठ उपाध्यक्ष दिनेश मल्लले भने, ‘अहिले एसएसबीको नयाँ टोली आएका कारण पनि केही कडाइ भएको हो ।’ उनले नाकामा नेपाल र भारत दुवैतर्फ नागरिकले सास्ती खेपिरहेको बताए ।

सीमा क्षेत्रका सुरक्षा निकायका प्रमुखहरूको संयुक्त बैठकमा नाकामा हुने सास्ती र दुर्व्यवहार न्यूनीकरणका विषयमा छलफल हुने गरेको छ । नेपाल र भारत सीमावर्ती क्षेत्रका सुरक्षा निकायका प्रमुखले यो विषयलाई प्राथमिकताका साथ उठाउनुका साथै समाधान गर्ने प्रतिबद्धता पनि गर्छन् । तर यो समस्या कहिल्यै समाधान हुन सकेको छैन । उसो त भारतबाट मजदुरी गरेर घर फर्किने नेपालीले पनि निकै सास्ती व्यहोर्नुपर्छ । भारत र नेपालतर्फ आधा दर्जन ठाउँमा चेकजाँचको सास्ती छ । सुरक्षाकर्मीबाट मात्रै होइन गाडी चालकहरूबाट पनि यात्रुहरुले दुःख पाउने गरेका छन् ।

सवारीसाधनमा भारतबाट घर फर्किनेले ५० रुपैयाँ भाडा तोकिएको ठाउँमा ५ सयदेखि हजारसम्म तिर्नुपर्छ । भारततर्फ मात्रै नभई नेपालतर्फ पनि यात्रुहरूले चर्के भाडा तिर्नुपर्छ । कतिपय बाटोमै लुटिएर अलपत्र परेका पनि हुन्छन् । कञ्चनपुरका प्रमुख जिल्ला अधिकारी गोपालप्रसाद अर्यालले भारततर्फ नाकामा भएको कडाइको विषयमा गुनासो नआएको बताए ।