कुरूप बन्दै ‘मिनी खप्तड’- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

कुरूप बन्दै ‘मिनी खप्तड’

कान्तिपुर संवाददाता

डोटी — ‘मिनी खप्तड’का रूपमा चिनिएको डोटीको नयाँ पर्यटकीय गन्तव्य बगलेक पछिल्लो समय प्लास्टिकजन्य वस्तु थुप्रिएर कुरूप बन्न थालेको छ । पूर्वीचौकी गाउँपालिका–२ बगलेकमा दैनिक आन्तरिक पर्यटकको भीड लाग्ने गर्छ ।


उनीहरूले छोडेर जाने खाद्यबस्तु तथा प्लास्टिकजन्य सामग्रीको व्यवस्थापन गर्न नसक्दा सो क्षेत्र कुरूप बन्न पुगेको वडाध्यक्ष योगेन्द्र ठकुल्लाले बताए ।

हरिया पाटन र बोटबिरुवाका ससाना बुट्याउनहरूले बगलेकमा खप्तडको सम्झना गराउने गर्छ । मौसम र दृश्यावलोकनका लागि मनमोहक रहेको बगलेक सडकको पहुँचसंँग जोडिएपछि नयाँ पर्यटकीय गन्तव्य बनेको छ । दिपायल, सिलगढी, डडेल्धुरा तथा धनगढीबाट समेत बगलेकमा पर्यटक रमाउने गर्छन् । त्यहाअधिकांश वनभोज खाने आउनेको लर्को हुन्छ । त्यसबाहेकका लागि तयारी खाद्यहरू बोकेर नै आउने गरे पनि उनीहरूले छोडेर जाने प्लास्टिकजन्य वस्तु, पानी तथा रक्सीका बोतलले हरियाली पाटन कुरूप बन्दै गएको स्थानीय किरण ठकुल्लाले गुनासो गरे ।

फोहोर व्यवस्थापनका लागि केही डस्कबिन राखिएका भए पनि नियमित सरसफाइ गर्ने र त्यसतर्फ चासो राख्ने संयन्त्र नभएकाले फोहोर बढ्दै गएको छ । स्थानीयले समयमै फोहोर व्यवस्थापन नगरे फोहोर व्यवस्थापन दीर्घकालीन चुनौती बन्ने स्थानीयले चिन्ता व्यक्त गर्दै आएका छन् । खप्तडको प्रवेशद्वार मुखमै पर्ने बगलेकमा पर्यटकहरूको चलहपहल बढेसँंगै त्यस क्षेत्रमा आवश्यक पूर्वाधार र व्यवस्थापनतर्फ स्थानीय सरकारले चासो दिनुपर्ने पर्यटन व्यवसायी दीपकबहादुर खड्काले बताए ।

प्रकाशित : मंसिर १४, २०७९ ०८:२०
प्रतिक्रिया
पठाउनुहोस्

भूकम्पपीडितहरू अझै टहरामा

खाद्यान्न र राहत सामग्रीको व्यवस्थापन भए पनि पुनःनिर्माणको काम भएन 
मोहन शाही

डोटी — कात्तिक २२ गते राति आएको भूकम्पबाट विस्थापित भएका परिवार अझै त्रिपालमुनि बास बस्न बाध्य छन् । कठ्यांग्रिँदो जाडोमा उनीहरू त्रिपालमुक्त कहिले हुन्छन् भन्नेमा सरकार मौन छ । भूकम्प पीडितहरूको अस्थायी टहरा र घरबासको स्थायी पुनःनिर्माणबारे कुनै टुंगो नलाग्दा उनीहरू चिन्तित छन् ।


यतिसम्म कि राष्ट्रिय विपद् जोखिम न्यूनीकरण तथा व्यवस्थापन प्राधिकरणले भूकम्प आएको तीन साता बित्दासम्म क्षतिको विवरणसमेत संकलन गर्न सकेको छैन ।

घरबासको स्थायी पुनःनिर्माणको लागि प्रदेश सरकार, संघीय सरकार र विभिन्न निकायहरूसँग समन्वय भइरहे पनि कसले बनाउँछ भन्ने विषयमा हालसम्म कुनै टुंगो नलागेको पूर्वीचौकी गाउँपालिकाका अध्यक्ष रामप्रसाद उपाध्यायले बताए । स्थलगत अनुगमनका लागि प्राधिकरणको टोली डोटीमा अझै आउन सकेको छैन । टोली आउनेबारे आफूलाई कुनै जानकारी नभएको डोटीकी प्रमुख जिल्ला अधिकारी कल्पना श्रेष्ठले बताइन् । उनले खाद्यान्न र राहतका अन्य सामग्रीको व्यवस्थापन भइरहे पनि पुनः निर्माणबारे भने अहिले नै भन्न नसकिने बताइन् । प्रदेश र संघीय सरकारले यथाशीघ्र भूकम्प प्रभावितका लागि चासो नराखे पूर्वीचौकी गाउँपालिकाले अस्थायी टहरा निर्माण गर्ने गाउँपालिकाका अध्यक्ष उपाध्यायले बताए । पूर्वीचौकीका सयौं घरपरिवार भूकम्पबाट प्रभावित छन् । चिसो बढिसकेकाले तत्कालका लागि पालिकाले अस्थायी टहरा निर्माणको पहल गर्ने भएको छ ।

नेपाल रेडक्रस सोसाइटीले संकलन गरेको प्रारम्भिक तथ्यांकअनुसार पूर्वीचौकी गाउँपालिकाअन्तर्गत १ हजार ११ घर पूर्ण रूपमा क्षति, १ सय २० घर भत्केका तथा ३ हजार ३७ घरधुरीमा असर परेको अध्यक्ष उपाध्यायले बताए । पूर्ण रूपमा भत्केका घर पुनर्निर्माणका लागि प्राधिकरण, प्रदेश सरकार, संघीय सरकार, विभिन्न गैरसरकारी सघ संस्थाहरूसँग पनि समन्वय र सहकार्य भइरहेको समेत अध्यक्ष उपाध्यायले बताए । गाउँपालिकाले पहिलो चरणमा १ सय २० वटा अस्थायी टहरा पुस महिनाभित्र निमार्ण गर्ने लक्ष्य पूर्वीचौकी गाउँपालिकाको छ । पूर्वीचौकी गाउँपालिका ३ गैरा गाउँका भूकम्प पीडितहरूले आवास निर्माण लागि आग्रह गरेका छन् । भूकम्पमा परी तीन परिवार गुमाएका पदमसिंह बोहराले पनि आवास पहिलो आवश्यकता भएको बताए । उनले आवश्यकताहरू धेरै भए पनि घर क्षतिग्रस्त भएकाले जीवन बेवारिसे बनेको दुखेसो गरे ।

प्राविधिक टोली आउँदै

गृह मन्त्रालय र राष्ट्रिय विपद् जोखिम न्यूनीकरण तथा व्यवस्थापन प्राधिकरणको प्राविधिक टोली यसै साता डोटी आउने राष्ट्रिय विपद् प्राधिकरणका प्रवक्ता डिजन भट्टराईले बताएका छन् । उनले आमनिर्वाचनका कारण केही ढिलाइ भएको सुनाए । प्राविधिक टोलीले स्थलगत निरीक्षण मात्र गर्ने र कहिलेसम्म पुनर्निर्माण गर्न सकिन्छ भन्नेबारे त्यसपछि भन्न सकिने भट्टराई बताउँछन् । डोटीमा गएको भूकम्पले डोटीलगायत बझाङमा पनि क्षति भएकाले टोलीले सबै ठाउँमा गएर रिपोर्ट तयार गर्दा २ महिना समय लाग्ने बताएको छ । कात्तिक २२ गते राति २ बजेर १२ मिनेटमा खप्तड राष्ट्रिय निकुञ्ज क्षेत्रमा पर्ने खप्तडबाबा आश्रम नजिक केन्द्रबिन्दु बनाएर गएको भूकम्पले डोटीको पूर्वीचौकी गाउँपालिका ३ मा दर्जनौं घर भत्किएका थिए । भूकम्पको कारण ६ जनाको ज्यान गएको थियो । ७ जना घाइते भएका थिए ।

प्रकाशित : मंसिर १४, २०७९ ०८:१८
पूरा पढ्नुहोस्
प्रतिक्रिया
पठाउनुहोस्
×