बैतडीमा जिप दुर्घटना : मृतक ४ जनाकै सनाखत- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

बैतडीमा जिप दुर्घटना : मृतक ४ जनाकै सनाखत

तृप्ति शाही

बैतडी — बैतडीको पाटनमा भएको जिप दुर्घटनामा परी मृत्यु हुनेको संख्या ४ पुगेको छ । दुर्घटनामा परी घाइते ९ जना भएका छन् । घाइतेमध्ये ३ जनाको अवस्था गम्भीर रहेको प्रहरीले जनाएको छ ।

मृत्यु हुनेमा प्रहरी तालिम केन्द्र दीपायलमा कार्यरत प्रहरी सहायक हवल्दार अर्जुन कठायत, सोही स्थानमा कार्यरत प्रहरी जवान लोकबहादुर बाठामगर, बिर्खबहादुर विष्ट रहेका छन् । यस्तै जिल्ला प्रहरी कार्यालयमा कार्यरत अर्का प्रहरी जवान रमेश साउदको पनि दुर्घटनामा पर‍ी मृत्यु भएको प्रमुख जिल्ला अधिकारी सुरेश पन्थीले बताए ।

सबै नेपाली प्रहरीका कर्मचारीहरू रहेको इलाका प्रहरी कार्यालय पाटन बैतडीले जनाएको छ । घाइते पनि जिप चालक बाहेक सबै नेपाल प्रहरी हुन् ।

३ जना प्रहरीको घटनास्थलमै मृत्यु भएको र एक जनाको उपचारका लागि अस्पताल लैजाँदै गर्दा मृत्यु भएको इलाका प्रहरी कार्यालय पाटनका प्रहरी प्रमुख कमलप्रसाद चौधरीले बताए ।

घाइते २ जनाललाई नेपाली सेनाको हेलिकप्टर मार्फत उपचारको लागि कोहलपुर लगिएको प्रमुख जिल्ला अधिकारी सुरेश पन्थीले बताए । अन्य गम्भीर घाइते लैजानका लागि पनि हेलिकप्टर फेरि आउने उनले बताए ।

दशरथचन्द राजमार्ग अन्तर्गत पाटन नगरपालिका- ४ को थूममा जिप दुर्घटनामा परेको हो । जिल्ला सदरमुकाममा मतपेटिका पुर्‍याएर फर्किँदै गरेको प्रहरी टोली चढेको जिप सडकबाट करिब ३ सय मिटर तल खसेको छ ।

प्रकाशित : मंसिर ५, २०७९ १०:४४
प्रतिक्रिया
पठाउनुहोस्

सिन्धुलीमा मतगणना दिउँसो एक बजेदेखि

राजकुमार कार्की

सिन्धुली — ढिलो गरी मतपेटिका संकलन भएकाले सिन्धुलीमा दिउँसो एक बजेदेखि मतगणना हुने भएको छ । मुख्य निर्वाचन अधिकृतको कार्यालयका अनुसार बिहान ६ बजे मात्रै सबै स्थानबाट आएका मतपेटिका रुजु गरेर शिलबन्दी गरिएको छ ।

सर्वदलीय बैठक ११ बजेलाई बोलाइएकाले एक बजेबाट गणना सुुरु हुने मुख्य निर्वाचन अधिकृत उपेन्द्रप्रसाद गौतमले जानकारी दिए ।

सदरमुकामस्थित तरकारी तथा कन्दमुल विकास केन्द्रमा दुई स्थानमा चारवटा टोली बनाएर मतगणना हुने भएको छ । सुरक्षा व्यवस्था कडा बनाइएको र मतगणनामा तारजाली र सीसी क्यामेराको व्यवस्था गरिएको छ । मतपरिणाम बाहिर सार्वजनिक गर्न ठाउँठाउँमा माइक लगाइएको छ ।

समानुपातिकको समेत मत सँगसँगै गनिने भएकाले चारदेखि पाँच दिनभित्रमा गणना सकिने प्रारम्भिक आकलन गरिएको छ । मतपेटिका लिएर आएका प्रतिनिधि तथा अन्य समेतले नतिजाको व्यग्र प्रतीक्षा गरिरहेकाले यतिखेर सदरमुकामको लोकतान्त्रिक चोक भरिभराउ छ । प्रतिनिधिसभा र प्रदेशसभा निर्वाचनमा सिन्धुलीमा ५६ प्रतिशत मत खसेको निर्वाचन कार्यालयले जनाएको छ ।

दुई वटा निर्वाचन क्षेत्रका दुई लाख ८ हजार ३६९ मतदाता रहेकोमा १ लाख १८ हजार ९६० मत खसेको प्रारम्भिक तथ्यांक रहेको निर्वाचन कार्यालयले जनाएको छ । क्षेत्र नम्बर १ मा ६३११७ र क्षेत्र नम्बर २ मा ५५८३३ मत खसेको हो ।

क्षेत्र नम्बर १ मा १ लाख ७ हजार १३६ मतदाता रहेका थिए भने क्षेत्र नम्बर २ मा १ लाख १ हजार २३३ मतदाता रहेका थिए । २०७४ मा भएको आमनिर्वाचनमा सिन्धुलीमा ६५ प्रतिशत मत खसेको थियो । २०७९ वैशाखमा सम्पन्न स्थानीय तह निर्वाचनमा भने ७० प्रतिशतमत खसेको थियो ।

प्रकाशित : मंसिर ५, २०७९ १०:४१
पूरा पढ्नुहोस्
प्रतिक्रिया
पठाउनुहोस्
x
×