राँगो पछ्याउँदै जाँदा नदीमा बगेर बेपत्ता- सुदूरपश्चिम - कान्तिपुर समाचार

राँगो पछ्याउँदै जाँदा नदीमा बगेर बेपत्ता

मनोज बडू

दार्चुला — शैल्यशिखर नगरपालिका–२ देथला नजिकबाट चमेलिया नदीमा बगेर एक जना बेपत्ता भएका छन् । सोमबार दिउसो राँगोलाई पछ्याउँदै जाँदा शैल्यशिखर नगरपालिका–१ का अन्दाजी ४० वर्षीय बहादुरसिंह बोहरा नदीमा बगेर बेपत्ता भएको प्रहरीले जनाएको छ । 

जिल्ला प्रहरी कार्यालय दार्चुलाका अनुसार बोहरा शैल्यशिखर नगरपालिका-२ देथलास्थित भगवती मन्दिरमा लागेको अष्टमी जात्रामा राँगाको बली दिन गएका थिए । मन्दिरमा बलीका लागि तयार पारिएको राँगो अचानक भागेर चमेलिया नदीमा पसेको थियो । त्यसपछि उनी त्यही राँगोलाई पछ्याउँदै चमेलिया नदीमा पसेका थिए । नदीमा पसेका उनलाई नदीले बगाएर बेपत्ता भएको प्रहरीले जनाएको छ ।

बोहराले पछ्याइरहेको राँगोलाई चमेलियाले बगाए पनि राँगो भने फेला पारिएको जिल्ला प्रहरी कार्यालयका सूचना अधिकारी राजेश शाहीले बताए । बेपत्ता पुरुषको भने खोजी जारी रहेको प्रहरीले जनाएको छ ।

प्रकाशित : आश्विन १७, २०७९ २०:०५
प्रतिक्रिया
पठाउनुहोस्

सुमो दुर्घटनामा चार जना घाइते

कान्तिपुर संवाददाता

खोटाङ — इटहरीबाट दिक्तेल आउँदै गरेको सुमो दुर्घटना हुँदा चार जना घाइते भएका छन् । प्रदेश १–०२–००१ ज ४०२४ नम्बरको सुमो हलेसी तुवाचुङ नगरपालिका-४ च्यास्मिटारको मेखुखोलामा सोमबार दिउसो साडे दुई बजे दुर्घटना भएको हो ।


दुर्घटनामा मोरङ बेलबारी नगरपालिका-११ का ३८ वर्षीय राजकुमार गुरुङ, उनकी श्रीमती ३१ वर्षीया अन्जु गुरुङ, छोरी ७ वर्षीया निआशा गुरुङ र सुनसरी इटहरी नगरपालिका-२० का ४० वर्षीय विनोद गुरुङ घाइते भएका हुन् ।

घाइतेको जिल्ला अस्पताल दिक्तेलमा उपचार भइरहेको र उनीहरुको अवस्था सामान्य रहेको जिल्ला प्रहरी कार्यालय खोटाङका प्रवक्ता प्रहरी निरीक्षक रामबालक रायले बताए । गाडी सडकभन्दा करिब सय मिटर तल झरेको रायले बताए । गाडीमा आठ जना सवार थिए ।

प्रकाशित : आश्विन १७, २०७९ १९:४९
पूरा पढ्नुहोस्
प्रतिक्रिया
पठाउनुहोस्
×