तीन महिनाको तलबले असहाय बालबालिकालाई कपडा बाँड्दै धनगढीका मेयर- सुदूरपश्चिम - कान्तिपुर समाचार

तीन महिनाको तलबले असहाय बालबालिकालाई कपडा बाँड्दै धनगढीका मेयर

अर्जुन शाह

धनगढी — धनगढी उपमहानगरपालिकाका मेयर गोपाल हमालले आफूले पाउँदै आएको पारिश्रमिक सुविधावापतको रकम नगर क्षेत्रका विभिन्न असहाय संरक्षण सस्थाहरूलाई वितरण गर्दै आएका छन् ।

यसै क्रममा उनले दसैंमा आफूले पाउने तीन महिनाको पारिश्रमिक रकम २ लाख ६७ हजार ८ सय रुपैयाँसमेत विभिन्न संस्थाहरूको संरक्षणमा रहेका २६९ जना बालबालिका तथा असहायहरूलाई पोसाक किन्नका लागि उपलब्ध गराउने भएका छन् ।

मेयर हमालले दक्षिणकाली अधारभूत बहिरा विद्यालय बेलाका १ सय ५ जना विद्यार्थी, दृष्टि फाउन्डेसनका ५५ जना आश्रितहरू, मानव सेवा आश्रममा रहेका ५६ जना, आमाको माया छात्रावासमा रहेका ३० जना, गेटा अपांग समाजका ५ जना र पञ्चोदय माविमा अध्ययनरत १८ जना दृष्टिविहीन विद्यार्थीलाई पोसाक किन्न खर्च गरिने बताएका हुन् ।

चुनावका बेला आफू निर्वाचित भए उपमहानगरबाट कुनै पनि सेवासुविधा नलिने घोषणा गरेका मेयर हमालले भने‚ ‘दसैंमा मिठो-मसिनो र एकसरो नयाँ लुुगा लगाउन पाए हुुन्थ्यो भन्ने रहर नेपालीहरू सबैमा हुुन्छ । बालबालिकाहरूमा त अझ धेरै रहर हुन्छ । त्यही भएर यो पटक तीन महिनाको पारिश्रमिक रकमबाट बालबालिकालगायत असहायहरूलाई कपडा किनिदिने विचार गरेको हुुँ ।’

आफ्नो नाममा उपमहानगरबाट ७९ हजार ६ सयका दरले साउन, भदौ र असोजको पारिश्रमिक र दसैंको चाडपर्वबापतको २९ हजार रुपैयाँ प्राप्त भएको उनको भनाइ छ ।

यस्तै उनले नगर विकास समितिको अध्यक्षबापतको सुविधा रकम कटौती गर्ने निर्णय पनि गरेका छन् । हमालले नगर विकासबाट ४० लाख बजेट वृक्षरोपणमा खर्च गर्न लागेको बताए ।


प्रकाशित : आश्विन १६, २०७९ ११:२८
प्रतिक्रिया
पठाउनुहोस्

पाँचथरका दसैंघरमा भित्र्याइयो फूलपाती

लक्ष्मी गौतम

पाँचथर — पाँचथरका विभिन्न दसैंघरहरूमा आइतबार बिहान बढाइँका साथ फूलपाती भित्र्याइएको छ । सदरमुकामस्थित जिल्ला प्रशासन कार्यालय, नेपाली सेनाको रणसेर गण, सशस्त्र प्रहरीको हिमशिखर गुल्म र जिल्ला प्रहरी कार्यालयसहितका दसैंघरहरूमा फिदिम- ४ सुम्हात्लुङ शक्तिपीठबाट आइतबार फूलपाती भित्र्याइएको हो ।

फुलपाती लिन सेना प्रहरी र सशस्त्र प्रहरी र स्थानीय  बाजागाजा र दलबलसहित सुम्हात्लुङ मन्दिर पुग्दा स्थानीयको पनि बाक्लो उपस्थिति थियो ।

त्यहाँ पुगेको टोलीले पूजा-आराधनापश्चात फूलपाती लगेर आ-आफ्ना दसैंघरमा भित्र्याइएको हो । फूलपाती भित्र्याउने कार्यक्रममा जिल्लास्थित सुरक्षा निकायका प्रमुखहरू, राजनीतिक दलका नेता/कार्यकर्ता, संघसंस्था र कार्यालय प्रमुखसँगै नागरिक समाजका प्रतिनिधि र सञ्चारकर्मी पनि उपस्थित थिए ।

सुम्हात्लुङ गडीलाई पूर्वको महत्त्वपूर्ण शक्तिपीठका रुपमा लिइन्छ ।  जिल्लाका दसैंघरहरूमा यहि मन्दिरबाट फूलपाती लैजाने चलन छ ।


प्रकाशित : आश्विन १६, २०७९ ११:१४
पूरा पढ्नुहोस्
प्रतिक्रिया
पठाउनुहोस्
×