बाटोबाट खसेर एक जनाको मृत्यु- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

बाटोबाट खसेर एक जनाको मृत्यु

मनोज बडू

दार्चुला — नौगाड गाउँपालिका- ४ सिप्टीमा बाटोबाट खसेर एक जनाको मृत्यु भएको छ । बैतडी जिल्ला डिलासैनी गाउँपालिका- २ गन्नाका अन्दाजी ५० वर्षीय मौरे बोहराको मृत्यु भएको प्रहरीले जनाएको छ ।

जिल्ला प्रहरी कार्यालय दार्चुलामा सूचना अधिकारी राजेशबहादुर शाहीका अनुसार सिप्टी हुँदै मार्मा जाने क्रममा हिँडिरहेको अवस्थामा बाटोबाट लडेर मृत्यु भएको हो । मार्मा गाउँपालिका- ६ पत्थरकाडा बुहारीको माइतीघर गइरहेका बोहराको सिप्टीको बाटोबाट अन्दाजी ६ मिटर तल खसेर मृत्यु भएको हो ।

घटनास्थलमा अहिले प्रहरी टोली खटिएको जिल्ला प्रहरी कार्यालय दार्चुलाले जनाएको छ ।

प्रकाशित : आश्विन १२, २०७९ १९:५६
प्रतिक्रिया
पठाउनुहोस्

भारत सरकारले ब्लक गर्‍यो ४५ युट्युब भिडियो

युट्युबर ध्रुव राठीको भिडियोसमेत ब्लक लिस्टमा
एजेन्सी

काठमाडौँ — भारत सरकारले फेरि पनि कतिपय युट्युब च्यालनका भिडियोहरू ब्लक गरिदिएको छ । राष्ट्रिय सुरक्षा, वैदेशिक सम्बन्ध, सार्वजनिक सुरक्षा लगायत विषयमा झुटा सूचना फैलाएको भन्दै भिडियोहरू ब्लक गरिदिएको हो । सूचना एवं प्रसारण मन्त्रालयले १० वटा युट्युब च्यानलका ४५ वटा भिडियोहरू ब्लक गरिदिएको छ ।

‘इन्फरमेसन टेक्नोलजी रुल्स २०२१ (इन्टरमेडियरी गाइडलाइन् एन्ड डिजिटल मिडिया एथिक्स कोड) को प्रावधानअनुसार सम्बन्धित भिडियोहरू ब्लक गरिएका हुन्,’ मन्त्रालयको विज्ञप्तीमा भनिएको छ, ‘ब्लक गरिएका भिडियोहरूको एकमुष्ट भ्युअर्ससिप १ करोड ३० लाखभन्दा बढी छ ।’ मन्त्रालयले २३ सेप्टेम्बरमा भिडियो ब्लक गर्ने निर्देशन युट्युबलाई दिएको थियो ।

ब्लक गरिएका भिडियोहरूमा झुटा र स्वरूप बंग्याइएका विवरण समावेश भएको मन्त्रालयको भनाइ छ । धार्मिक समुदायबीच घृणा फैलाउने उदेश्यले ती भिडियो बनाइएको मन्त्रालयको दाबी छ । ‘सरकारले केही समुदायको धार्मिक अधिकार खोसेको, धार्मिक समुदायमाथि हिंसात्मक धम्की दिएको र भारतमा गृह युद्धको घोषणा गरेकोजस्ता गलत दाबीहरू ती भिडियोमा समावेश थिए,’ विज्ञप्तीमा भनिएको छ, ‘तिनले समाजमा असंगति पैदा गर्ने र शान्ति सुरक्षा बिथोल्न सक्ने सम्भावना थियो ।’

अग्नीपथ योजना, भारतीय सशस्त्र बल, भारतको राष्ट्रिय सुरक्षा प्रबन्ध, काश्मिरलगायत विषयमा मिथ्या सूचना फैलाउने भिडियोहरू ब्लक गरिएको मन्त्रालयको दाबी छ । ब्लक गरिएका भिडियोमध्ये चर्चित युट्युबर ध्रुव राठीले हालै मात्र पाकिस्तानको राजनीतिक संकटका विषयमा बनाएको भिडियो पनि परेको छ । त्यसमा काश्मीरतिरको भारतीय भूभाग पाकिस्तानमा परेको नक्सा देखाइएकाले ब्लक गरिएको मन्त्रालयको भनाइ छ ।

ध्रुवले भने गल्ती स्वीकारेर नक्सावाला हिस्सा हटाइदिए पनि भिडियो ब्लक गरिएकोमा चित्त दुखाएका छन् । आफूहरूले निकै होस पुर्‍याएर नक्सा राखे पनि ४० सेकेन्डको एक दृश्यमा त्रुटिपूर्वक भारतीय भूभाग पाकिस्तानतिर परेको नक्सा देखिन गएको उनले द लल्लानटपसँगको अन्तरवार्तामा बताएका छन् । ‘जे कुरामा समस्या छ, त्यही कुरा हटाइदिए पनि भिडियो ब्लक गरिदिएका छन्,’ उनले भनेका छन्, ‘मन्त्रालयले भिडियो नै नहेरी ब्लक गरिदिएको हो कि ?’ भारत सरकारले अघिल्लो महिना मात्रै सातवटा भारतीय र एक पाकिस्तानी युट्युब च्यानल ब्लक गरिदिएको थियो ।

प्रकाशित : आश्विन १२, २०७९ १९:४६
पूरा पढ्नुहोस्
प्रतिक्रिया
पठाउनुहोस्
×