कञ्चनपुरमा बढ्यो डेंगी- सुदूरपश्चिम - कान्तिपुर समाचार

कञ्चनपुरमा बढ्यो डेंगी

शुक्रबारसम्म जिल्लमा ११२ जनामा संक्रमण, किट अभावका कारण पर्याप्त परीक्षण हुन सकेन
भवानी भट्ट

कञ्चनपुर — चाडपर्व नजिकिँदै गर्दा देशका विभिन्न भागबाट र भारतबाट घर फर्किनेको चाप बढ्न थालेसँगै डेंगीको संक्रमण पनि बढ्दै गएको छ । कञ्चनपुरको शुक्लाफाँटा नगरपालिकाबाहेक जिल्लाका सबै स्थानीय तहमा डेंगीको संक्रमण देखिएको हो । संक्रमण तीव्र भए पनि किटको अभावका कारण पर्याप्त परीक्षण हुन सकिरहेको छैन । 


जिल्ला स्वास्थ्य कार्यालयका अनुसार शुक्रबारसम्म जिल्लामा ११२ जनामा संक्रमण देखिएको छ । जसमध्ये सबैभन्दा बढी महाकाली प्रादेशिक अस्पतालमा ४० र दोधारा चाँदनी नगरपालिकामा ३६ जनामा संक्रमण देखिएको छ । पुनर्वास नगरपालिकामा १२, बेलडाँडीमा ३, कृष्णपुरमा, बेलौरी र लालझाडीमा २/२ र विभिन्न निजी प्रयोगशाला र अस्पतालमा १५ जनामा संक्रमण देखिएको छ । ‘संक्रमित धेरैजसो काठमाडौं र भारतबाट फर्केका छन्,’ जिल्ला स्वास्थ्य कार्यालय कञ्चनपुरका औलो निरीक्षक सिद्धराज भट्टले भने, ‘चाडपर्वका लागि घर फर्किने चाप बढेसँगै डेंगु संक्रमणको दर पनि बढेको छ ।’ उनका अनुसार संक्रमितमध्ये १५ जनाभन्दा बढी काठमाडौंबाट फर्केका छन् ।

दोधारा चाँदनी नगरपालिकामा संक्रमित देखिएका ३६ जनामध्ये २२ जना भारतबाट र ८ जना काठमाडौंबाट फर्केका छन् । पछिल्लो समय यात्रा नगरेका संक्रमित ६ जना मात्रै छन् । नगरपालिका आफैंले किट खरिद गरेर परीक्षण बढाएको दोधारा चाँदनीका स्वास्थ्य शाखा प्रमुख जयबहादुर महराले बताए । उनका अनुसार डेढ लाख बढीमा ४ सय किट खरिद गरिएको हो ।

‘किटको अभाव भए पनि नगरपालिका आफैंले खरिद गरेर परीक्षण गरिरहेको छ,’ महराले भने, ‘केही दिनयता संक्रमितको संख्या घटना थालेको छ, अब नियन्त्रण हुन्छ भन्ने आशा छ ।’ उनका अनुसार अहिले स्वास्थ्य शाखाले डेंगी सार्ने लामखुट्टे फुल नष्ट पार्ने तथा बासस्थान सफा गर्ने अभियान सुरु गरिएको छ । स्वास्थ्य स्वयंसेविकादेखि कर्मचारी र जनप्रतिनिधिसम्म सबै यसमा जुटेको उनले बताए ।

पुनर्वास नगरपालिकामा किटको अभावले परीक्षण नै हुन नसकिरहेको स्वास्थ्य शाखा प्रमुख रामबहादुर धामीले बताए । ‘पालिकाबाट पनि खरिद गर्न सकिएको छैन, प्रदेशबाट पनि आएन,’ उनले भने, ‘आजसम्म दुई/चार किट थियो, अब त्यो पनि सकियो ।’ उनका अनुसार प्रदेश आपूर्ति केन्द्रबाट हालसम्म १ सय किट प्राप्त भएको छ ।

धामीका अनुसार अहिले पनि ज्वरो र डेंगीका लक्षण भएका बिरामी स्वास्थ्य संस्थामा आइरहेका छन् । तर किटको अभावका कारण सबैको परीक्षण हुन नसकेको उनले बताए । पुनर्वास नगरपालिकामा हालसम्म १२ जनामा डेंगी संक्रमण देखिएको छ ।

जिल्ला स्वास्थ्य कार्यालय कञ्चनपुरका औलो निरीक्षक भट्ट भने अहिले केही पालिकाले पनि खरिद गरेको र स्वास्थ्य कार्यालयले पनि खरिद गरेका कारण किटको अभाव नभएको बताउँछन् । ‘पर्याप्त मात्रामा नभए पनि किटको अभाव छैन,’ उनले भने, ‘स्वास्थ्य कार्यालयसँगै केही पालिकाले पनि खरिद गरेका छन् ।’ उनका अनुसार स्वास्थ्य कार्यालयले ४ सय किट खरिद गरेर पालिकाहरूमा पठाउने काम गरिरहेको छ ।

किटको अभावका कारण मलेरिया, टाइफाइडलगायत परीक्षणपछि मात्रै डेंगीको परीक्षण भइरहेको स्वास्थ्यकर्मीहरू बताउँछन् । लक्षण देखिएको सबैको परीक्षण गर्न सकिने अवस्था नरहेको उनीहरू बताउँछन् । कतिपय पालिकामा गम्भीर बिरामीको समेत परीक्षण हुन सकिरहेको छैन ।

प्रकाशित : आश्विन ९, २०७९ ०८:५०
प्रतिक्रिया
पठाउनुहोस्

चाडका बेला बजार अनुगमन तीव्र

तृप्ति शाही

बैतडी — बैतडीमा अहिले जिल्ला प्रशासन कार्यालयले ग्रामीण क्षेत्रमा पनि बजार अनुगमनलाई तीव्रता दिएको छ । स्थानीय तहलाई बजार अनुगमन गर्ने अधिकार भए पनि अधिकांशले अनुगमन गर्दैनन् । बजार अनुगमनमा स्थानीय तह मौन बसेपछि जिल्ला प्रशासन कार्यालय आफैंले जिल्लाका पालिकाका विभिन्न स्थानीय बजारको अनुगमन गरिरहेको हो । 


जिल्लाको दशरथचन्द नगरपालिकाका गोठलापानी, शाहीलेक, देहिमाण्डौं बजारसँगै सुर्नया गाउँपालिकाको फाटीगडा, रौलेश्वर र मोतीनगर बजारमा प्रशासन कार्यालयले अनुगमन गरेको छ । सिगास गाउँपालिकाको बजपानी बजार, पुचौडी नगरपालिकाको ढोले बजार, हाट पुरचौडी बजारमा अनुगमन गरिएको छ । दोगडाकेदार गाउँपालिकाको सिल्लेगडा र खोचलेक बजारमा अनुगमन गरिएको छ । डिलासैनी गाउँपालिकाको स्थानीय बजारमा पनि प्रशासनले अनुगमन गरेको जनाएको छ ।

७७ वटा पसल अनुगमनको क्रममा ८ वटा पसललाई ८५ हजार बराबरको कारबाही स्वरूप जरिवाना गरिएको जिल्ला प्रशासन कार्यालय बैतडीले जनाएको छ । १ लाख १० हजार रुपैयाँ बराबरको म्याद नाघेका सामग्री बरामद गरी नष्ट गरिएको छ । पालिकाहरूले अनुगमन गर्ने अधिकार भए पनि उनीहरूले गरेको अनुगमनमा अखाद्य वस्तुहरू नभेटिने क्रम जारी रहेपछि प्रशासनले अनुगमन गर्न थालेको हो । स्थानीयको गुनासोका आधारमा ग्रामीण क्षेत्रमा पनि अनुगमन थालिएको प्रमुख जिल्ला अधिकारी सुरेश पन्थीले बताए । ‘पालिकाले गरेका अनुगमनमा खासै कैफियत भेटिँदैन,’ उनले भने, ‘हामीले गर्दा प्रशस्त अखाद्य वस्तुहरू भेटिने गरेका छन् । यसले गर्दा प्रभावकारी अनुगमन नभएको देखिएको छ ।’

पहाडी जिल्लाका उपभोक्ताहरू पनि धेरै सचेत नहुने र व्यवसायीले पनि ख्याल नगरेका कारण अखाद्य वस्तु धेरै भेटिने गरेका प्रजिअ पन्थीले बताए । अनुगमनका क्रममा ६ महिना अगाडि नै म्याद नाघेका सामग्रीहरूसम्म भेटिएका उनले बताए ।

अनुगमनका क्रममा मेडिकलहरूको पनि अनुगमन गर्ने गरिएको छ । अनुगमनकै क्रममा जिल्ला प्रशासन कार्यालय बैतडीले जिल्लाका ३ वटा मेडिकलमा सिल गरेको छ । मेडिकल अनुगमनका क्रममा नियमविपरीत सञ्चालनमा रहेका मेडिकलहरू भेटिएकाले सिल गरिएको हो । चार वटा मेडिकल अनुगमनका क्रममा ३ वटा मेडिकलले गैरकानुनी रूपमा सञ्चालन गरेका क्लिनिक सेन्टर बन्द गरिएको प्रमुख जिल्ला अधिकारी पन्थीले बताए । मुस्याचौरस्थित प्रकाश मेडिकल हल र जयदुर्गे मेडिकल हलको क्लिनिक बन्द गरिएको हो । देहिमाण्डौंस्थित निङ्लासैनी फार्मेसी एकको नाममा दर्ता भएर अर्कैले सञ्चालन गरेको भेटिएकाले सिल गरिएको प्रशासनले जनाएको छ ।

अनुगमनका क्रममा मेडिकलहरूले बेच्न नपाइने औषधिहरू पनि बेच्ने गरेको भेटिएको प्रमुख जिल्ला अधिकारी पन्थीले बताए । अहेव बस्ने मेडिकलहरूले क्लिनिक सञ्चालन गरेर बेडहरू राखेको भेटिएकाले बन्द गरिएको छ । ‘भिडियो एक्सरे पनि मेडिकलमा राखेको भेटिएको थियो । ल्याबका कर्मचारी नभएर ल्याब पनि सञ्चालन गरेका थिए,’ उनले भने, ‘मेडिकलमा औषधि पनि फार्मेसी नपढेकाले बेचेको भेटियो । नियमविपरीत खोलिएका क्लिनिक, ल्याब, एक्सरे, फार्मेसीहरू बन्द गरेका छौं ।’

प्रकाशित : आश्विन ९, २०७९ ०८:४९
पूरा पढ्नुहोस्
प्रतिक्रिया
पठाउनुहोस्
×