शैक्षिक सुधारमा विद्यालय छनोट- सुदूरपश्चिम - कान्तिपुर समाचार

शैक्षिक सुधारमा विद्यालय छनोट

कान्तिपुर संवाददाता

दार्चुला — चालु आर्थिक बर्षमा राष्ट्रपति शैक्षिक सुधार कार्यक्रमका लागि जिल्लाका ३९ विद्यालय छनोट भएका छन् । जिल्लाका ९ वटै स्थानीय तहका विद्यालयमा उक्त कार्यक्रममार्फत विद्यालय भवन निर्माण र आईसीटी ल्याव स्थापना गरिने छन् ।

राष्ट्रपति शैक्षिक सुधार कार्यक्रमका लागि सबैभन्दा बढी महाकाली नगरपालिकाका ७ विद्यालय र सबैभन्दा कम ब्यास गाउँपालिकाका २ विद्यालय छनोटमा परेको शिक्षा विकास तथा समन्वय इकाइ कार्यालय दार्चुलाले जनाएको छ । कमजोर भौतिक संरचना भएका विद्यालय भवन निर्माणका लागि २१ वटा विद्यालयमा ४ कोठे र २ कोठे भवन निर्माण गरिने छन् । जिल्लाभरिका १८ विद्यालयमा आईसीटि ल्याव स्थापना गरिने छन् । विगत केही बर्षदेखि बर्षेनी राष्ट्रपति शैक्षिक सुधार कार्यक्रममार्फत जिल्लाका विद्यालयका भवन निर्माण कार्य भईरहेका छन् । जिल्लाभरिका ८५ विद्यालयमध्ये चालु आवमा ३९ विद्यालय छनोटमा परेको शिक्षा विकास तथा समन्वय इकाई कार्यालयले जनाएको छ ।

९ वटै स्थानीय तहका १२ विद्यालयमा ४ कोठे विद्यालय भवन निर्माण हुने छन् । जसमा महाकाली नगरपालिकामा ४ वटा विद्यालय र अन्य स्थानीय तहहरूमा एक/एक विद्यालयमा ४ कोठे विद्यालय भवन निर्माण गरिने छन् । ४ कोठे विद्यालय भवन निर्माणका लागि ५० लाख बजेट विनियोजन गरिएको शिक्षा विकास तथा समन्वय इकाइ दार्चुलाका प्रमुख जयराज पन्तले जानकारी दिए । उनका अनुसार जिल्लाका सबै स्थानीय तहमा एक/एक वटा २ कोठे विद्यालय भवन निर्माणका लागि कार्यक्रममा छनौट भएका छन् । २ कोठे भवन निर्माणका लागि २७ लाख ५० हजार बजेट विनियोजन गरिएको छ ।

त्यस्तै राष्ट्रपति शैक्षिक सुधार कार्यक्रममा महाकाली नगरपालिकाका २ विद्यालय, मार्मा गाउँपालिकामा तीन विद्यालय, नौगाड गाउँपालिकामा तीन विद्यालय छनोट भएका छन् । अपी हिमाल गाउँपालिकामा २ वटा विद्यालय, लेकम गाउँपालिकामा २ विद्यालय, शैल्यशिखर नगरपालिकाका २ विद्यालय, मालिकार्जुन गाउँपालिकामा २ विद्यालय, दुहु गाउँपालिकामा आईसिटी ल्याव स्थापना गर्न २ विद्यालय छनोट भएका छन् । ब्यास गाउँपालिकामा भने आईसीटी ल्याबको कार्यक्रम नपरेको इकाइ प्रमुख पन्तले जानकारी दिए । उनका अनुसार विद्यालयमा आईसीटी ल्याब स्थापनाका लागि ६ लाख ५० हजार बजेट विनियोजन गरिएको छ ।

प्रकाशित : आश्विन ७, २०७९ १०:२४
प्रतिक्रिया
पठाउनुहोस्

भैरहवाबाट कार्गो बढाउन जोड

कान्तिपुर संवाददाता

भैरहवा — गौतम बुद्ध अन्तर्राष्ट्रिय विमानस्थलबाट कार्गो आयात–निर्यात बढाउन सरोकारवालाहरूले जोड दिएका छन् । अन्तर्राष्ट्रिय स्तरमा कार्गोको आयात–निर्यातका लागि त्रिभुवन अन्तर्राष्ट्रिय विमानस्थलमा हवाई यात्रु र मालसामानको चाप बढेकाले असहज भएको कार्गो ढुवानी व्यवसायीले बताए । 

कार्गो आयात–निर्यात बढाउन गौतम बुद्ध विमानस्थलमा सबै पूर्वाधार उपलब्ध रहेको र कार्गो सञ्चालनका लागि धेरै सम्भावना रहेको कार्गो व्यवसायीको साझा संस्था नेपाल फ्रेट फरवार्डर्स एसोसिएसनका अध्यक्ष मनोज अधिकारीले बताए । ‘त्रिभुवन विमानस्थलबाट मात्र कार्गो सञ्चालन गरिँदा मुलुकको पश्चिमी र दूरदराज क्षेत्रका मालसामानको ढुवानीमा लागत बढी लाग्ने गरेको छ,’ अधिकारीले भने, ‘पश्चिमी क्षेत्रको जडीबुटी, औद्योगिक उत्पादनदेखि कृषि उपजको समुद्रपारका मुलुकमा यस विमानस्थलबाट कार्गो सञ्चालन गर्न धेरै सम्भावना र प्रभावकारी छ ।’

एसोसिएसनले नेपालबाट विभिन्न मुलुकका लागि हुने कार्गो व्यवसाय सञ्चालनका लागि आवश्यक नीतिनियम बनाउन राय सुझाव दिने र सहजीकरण गर्ने गरेको छ । गौतम बुद्ध विमानस्थलबाट कार्गो आयात–निर्यात बढाउन सरोकारवाला निकायसँग छलफल गर्दै पहलकदमी थालेको एसोसिएसनका सचिव ईश्वर गुरुङले जनाए । उद्यमी, व्यवसायी, ढुवानी व्यवसायी, भन्सार एजेन्ट महासंघ, विमानस्थलका कर्मचारी, सुरक्षा निकाय, भन्सार कर्मचारी, उद्योग वाणिज्य महासंघलगायतसँग संवाद भइरहेको उनले बताए ।

गौतम बुद्ध विमानस्थलको कार्गो गोदाममा अन्तर्राष्ट्रिय मापदण्डअनुरूपको पूर्वाधार र प्रयोगशाला सेवा उपलब्ध गराइनुपर्ने बुटवल उद्योग वाणिज्य संघका अध्यक्ष उज्ज्वल कसजूले बताए । ‘कृषिजन्य उपज र मासुजन्य वस्तुको निर्यात गर्न सकिने धेरै सम्भावना र अवसर छन् । तर, यसका लागि ती वस्तुको स्वास्थ्य परीक्षण गर्न प्रयोगशाला अनिवार्य हुन्छ,’ कसजूले भने, ‘ताकि यहाँबाट कार्गो गरी निर्यात गरिएका वस्तु विदेशबाट गुणस्तरहीन भनेर नफर्कियोस् ।’

निर्यात गर्न बढी सम्भावना भएका वस्तुको पहिचान गरी कार्गो सञ्चालन गर्दा लाग्ने कर तथा महसुलमा विशेष सहुलियत दिन महिला उद्यमी ज्ञानु पौडेलको माग छ । विमानस्थलको कार्गो भवनको निर्माण ९५ प्रतिशत सकिएको र कार्गो गरिने सामानलाई उपयुक्त तापक्रममा राख्ने व्यवस्था भइरहेको विमानस्थलका महाप्रबन्धक गोविन्द दाहालले जनाए ।

प्रकाशित : आश्विन ७, २०७९ ०९:०३
पूरा पढ्नुहोस्
प्रतिक्रिया
पठाउनुहोस्
x
×