अछामको बिनायकमा युवक मृत भेटिए, हत्या आरोपमा आफन्तद्वारा सडक बन्द- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

अछामको बिनायकमा युवक मृत भेटिए, हत्या आरोपमा आफन्तद्वारा सडक बन्द

मेनुका ढुंगाना

अछाम — अछामको पञ्चदेवल बिनायक नगरपालिका –२ मा पर्ने मध्यपहाडी सडक खण्डमा एक जना युवक मंगलबार राति ११ बजे मृत फेला परेका छन् ।

बिनायक बजारबाट नजिकै रहेको मध्यपहाडी सडक खण्डको छेउमा पञ्चदेवल बिनायक नगरपालिका २ का २५ वर्षीया बम धामीको शव भेटिएको जिल्ला प्रहरी कार्यालय अछामका प्रमुख डीएसपी नारायण डाँगीले बताए ।

उनका अनुसार घटनास्थलमा रहेको शवको प्रकृति हेर्दा मृत्यु शंकास्पद देखिएको छ । मृतकका आफन्तले हत्या भएको भन्दै विरोधस्वरुप सडक बन्द गरेका छन् भने घटनास्थलको मुचुल्का समेत उठाउन दिएका छैनन् ।

‘स्थानीयले घटना स्थलको मुचुल्का उठाउन दिएका छैनन् । शव प्रहरीको निगरानीमा छ ’ प्रहरी प्रमुख डाँगीले भने ,‘ प्रारम्भिक अनुसन्धानले घटना शंकास्पद देखाउँछ । हिजो (मंगलबार) दिउँसो उनीसँगै बसेर मदिरा सेवन गरेका ४ जनालाई नियन्त्रणमा लिएका छौं । शव उठाउन नदिँदासम्म अनुसन्धान गर्न पनि गाह्रो हुन्छ ।’

यसअघि पञ्चदेवल बिनायक नगरपालिका ३ मा रहेको मध्यपहाडी लोकमार्गभन्दा करिब ३ सय मिटर तल १५ वर्षीय विनोद शाहीकोसमेत शव भेटिएको थियो । उनको हत्या भएको भन्दै अहिले पनि आन्दोलन भइरहेको छ । त्यसअघि पञ्चदेवल बिनायक नगरपालिका २ का तत्कालीन वडा अध्यक्ष पदम धामीको पनि सोही ठाउँमा हत्या भएको थियो ।

प्रकाशित : भाद्र १५, २०७९ १४:४२
प्रतिक्रिया
पठाउनुहोस्

जबराको प्रतिप्रश्न - 'असार २८ पछि के गरेँ र महाभियोग आयो ?'

निवेदकबाट अन्य न्यायाधीशहरूलाई आश्वासन दिइयो, प्रष्ट रूपमा भन्छु : जबरा
जयसिंह महरा

काठमाडौँ — निलम्बित प्रधानन्यायाधीश चोलेन्द्र शमशेर जबराले आफूलाई किन महाभियोग लगाइएको भनेर प्रतिप्रश्न गरेका छन् । उनले २०७८ असार २८ मा शेरबहादुर देउवाको नेतृत्वमा सरकार बनाउने र प्रतिनिधिसभाको दोस्रो विघटन रद्द गर्ने फैसलापछि के गरेको थिएँ र महाभियोग आएको हो भनेर प्रश्न गरेका छन् ।

महाभियोग सिफारिस समितिको बुधबारको बैठकमा बयानका लागि उपस्थित जबराले माओवादी केन्द्रकी सांसद यशोदा सुवेदी गुरुङको प्रश्नमा यस्तो जवाफ दिएका हुन् ।

जबराले सुरुमा बोलेका कुरालाई लिएर सुवेदीले प्रश्न गरेकी थिइन् । उनले भनेकी थिइन्, 'राजनीतिक प्रतिशोधका आधारमा महाभियोग लगाइयो भन्नुभयो । तपाईंका क्रियाकलापले महाभियोग लागेको हो । चेक एन्ड ब्यालेन्स गर्ने दायित्व संसद्को हो । यहाँ उठेका प्रश्नको जवाफ दिनुस् ।'

जवाफमा २०७८ मा बारले गरेको आन्दोलनका विरुद्धमा एमाले र कांग्रेस निकटका वकिलहरूका संगठन रहेको कुरा जबराले स्मरण गराएका थिए । 'बारले जसरी विषय उठान गर्‍यो । पीपीएलए र डीएलए आन्दोलन विरुद्ध थियो । मैले कसैको दबाब मान्दैन भनेको हो । जनताको सर्वोच्च संस्था संसद् फेस गर्छु त्यसबेला नै भनेको हो,' उनले महाभियोगका बारेमा सोधे, 'असार २८ अघि मैले के गरेँ, त्यसपछि के गरेँ र ममाथि महाभियोग आयो ?'

प्रधानन्यायधीश जबराले निवेदकबाट अन्य न्यायाधीशहरूलाई आश्वासन दिइएको पनि आरोप लगाएका छन् । प्रतिनिधिसभा विघटनविरुद्ध मुद्दा लिएर सर्वोच्च पुगेका निवेदकहरूले संवैधानिक इजलासमा रहेका अन्य न्यायाधीशलाई आश्वासन दिएको हो कि महाभियोग सिफारिसका निवेदकहरूले आश्वासन दिएको नखुलाइ भने, 'निवेदकबाट अन्य न्यायाधीशहरूलाई आश्वासन दिइयो, प्रष्ट रूपमा भन्छु ।'

सांसद र महाभियोग लागेका प्रधानन्यायाधीश जबराबीच सवाल जवाफ जारी रहेको छ । महाभियोग सिफारिस समितिले १२ बजेर ४० मिनेटदेखि जबराको बयान लिइरहेको छ ।

प्रकाशित : भाद्र १५, २०७९ १४:३५
पूरा पढ्नुहोस्
प्रतिक्रिया
पठाउनुहोस्
×