गठबन्धनमा अरु पाँच दल थपिए पनि एमालेलाई हराउन सक्दैनन् : उपाध्यक्ष ज्ञवाली- सुदूरपश्चिम - कान्तिपुर समाचार

गठबन्धनमा अरु पाँच दल थपिए पनि एमालेलाई हराउन सक्दैनन् : उपाध्यक्ष ज्ञवाली

चित्रांग थापा

धनगढी — नेकपा एमालेका उपाध्यक्ष युवराज ज्ञवालीले पाँचदलीय गठबन्धनमा अरू पाँच दल थपिए पनि आगामी निर्वाचनमा नेकपा एमालेलाई कसैले पराजित गर्न नसक्ने बताए । तैपनि चुनावमा एमालेले अन्य कुनै दलसँग गठबन्धन नगर्ने उनको भनाइ थियो ।


एमाले एक्लै चुनाव लड्नुपर्छ भन्ने मान्यतामा रहेको उनको भनाइ थियो । प्रतिनिधिसभा र प्रदेश सभाको आगामी निर्वाचनलाई लक्षित गर्दै देशव्यापी रुपमा पार्टीका अगुवा कार्यकर्ताहरूको प्रशिक्षण सञ्चालन गर्न सुदूरपश्चिम पुगेका उपाध्यक्ष ज्ञवालीले शुक्रबार धनगढीमा प्रेस चौतारीले आयोजना गरेको पत्रकार सम्मेलनमा यस्तो बताएका हुन् ।

‘पाँच दलीय गठबन्धन मात्र होइन अरु पाँच दल थपिए पनि एमालेलाई हराउन सक्ने अवस्था छैन,’ उपाध्यक्ष ज्ञवालीले भने । यस्तै उनले नागरिकता सम्बन्धी विधेयक संसदमा पास भएको प्रसंगमा नेपाल जस्तो भूराजनीतिक अवस्थामा रहेको देशमा नागरिकता जस्तो विषय खुकुलो बनाउन नहुने बताए ।

‘नागरिकता लिनबाट बञ्चित भएकाहरुले नागरिकता पाउनु पर्छ भन्ने कुरामा पार्टी दृढ रहेको छ । तर विदेशबाट बिहे गरेर सिन्दुर हाल्ने बित्तिकै नागरिकता पाउने कुराको पार्टीको गम्भीर विरोध रहेको छ,’ उनले भने ।

यस क्रममा उनले नागरिकता विधेयक राष्ट्रपतिले फिर्ता गरिदिनुपर्ने धारणा राखेका थिए । यद्यपि यसबारे पार्टीमा छलफल नभएको र आफ्नो व्यक्तिगत धारणा रहेको उनको भनाइ थियो ।

प्रकाशित : श्रावण १४, २०७९ १३:२३
प्रतिक्रिया
पठाउनुहोस्

समन्वय नहुँदा सडक अलपत्र

कान्तिपुर संवाददाता

परासी — स्थानीय, प्रदेश र केन्द्रको समन्वय नहुँदा पश्चिम नवलपरासीमा ११ किलोमिटर सडक अलपत्र परेको छ । जिल्लाको पाल्हीनन्दन गाउँपालिकाको साबिकको केन्द्रदेखि प्रतापपुर गाउँपालिकाको गोपीगन्ज बजारसम्मको सडक मर्मत र स्तरोन्नति कसले गर्ने भन्ने विषयमा अन्योल हुँदा सडक जीर्ण बन्दै गएको हो । 

स्थानीय तहले प्रदेशअन्तर्गतको सडक र प्रदेशले केन्द्रअन्तर्गतको सडक भन्दै मर्मत संभारमा चासो नदिंदा सडकमा खाल्टाखुल्टी र पानी जमेर हिंडडुल गर्न नसकिने अवस्थामा पुगेको छ । सडकमा साना सवारी र एम्बुलेन्स सञ्चालनमा समेत असहज हुने गरी खाल्टाखुल्टी भए पनि वर्षौंदेखि मर्मत संभार नहुँदा समस्या बढेको स्थानीयको गुनासो छ ।

‘संघीयताभन्दा अगाडि भौतिक योजना मन्त्रालयले यसको संरक्षण र मर्मत गर्दै आएको थियो । संघीयतापछि यो सडकको बेहाल भएको छ,’ गण्डक जल तथा उपभोक्ता समितिका अध्यक्ष हैदर अलीले भने, ‘नहरसँगै जोडिएको सडक भएकाले यसअघि हामीले पटक–पटक यसको मर्मतसंभार गर्न माग गरे पनि स्थानीय, प्रदेश वा केन्द्र कुन निकायले यसको स्वामित्व लिने भन्ने विषयमा अन्योल भएपछि अलपत्र परेको छ ।’

यो खण्डले पाल्हीनन्दन, सरावल र प्रतापपुर गाउँपालिकालाई जोड्छ । स्थानीय तहले भने दुईवटा स्थानीय तह जोड्ने सडक निर्माणको मर्मत प्रदेश सरकारको जिम्मा भएको बताउँछन् । पाल्हीनन्दन गाउँपालिका अध्यक्ष बैजुप्रसाद गुप्ताले प्रदेश सरकारमा सडक पक्की बनाउन योजना पेस गरिएको र तत्कालका लागि सामान्य मर्मत गरेर हिंडडुल गर्न सहज बनाउने बताए । वर्षा सुरु नहुँदै सडकको यो दुरावस्था छ भने वर्षा सुरु भएपछि पैदल आवातजावतमा पनि समस्या हुने भन्दै स्थानीयले तत्काल मर्मत गर्न माग गरेका छन् ।

‘सडकमा पानी जमेर खेत रोप्नेजस्तो भएको छ । तीनवटै सरकार एकअर्कालाई देखाउँदै पन्छिएका छन्,’ सरावलका नरबहादुर चौधरीले भने, ‘स्थानीय सरकारले कालोपत्र गर्न नसक्ने भए पनि आ–आफ्नो पालिकाअन्तर्गत पर्ने सडक सामान्य मर्मत त गर्न सक्छन् नि ! त्यति पनि नगर्दा स्थानीयले सास्ती पाएका छन् ।’

प्रकाशित : श्रावण १४, २०७९ १३:०२
पूरा पढ्नुहोस्
प्रतिक्रिया
पठाउनुहोस्
x
×