बजेटका पक्षमा उभिन माओवादीको निर्देशन- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

बजेटका पक्षमा उभिन माओवादीको निर्देशन

सत्तारूढ दल कांग्रेस र एकीकृत समाजवादीका सांसदहरूको बजेटप्रति असन्तुष्टि
अर्जुन शाह

धनगढी — सरकारको नेतृत्व गरिरहेको दल माओवादी केन्द्रको संसदीय दलले शनिबार बजेटका पक्षमा उभिएर पारित गर्न आफ्ना सांसदहरुलाई निर्देशन दिएको छ । सुदूरपश्चिममा बजेटमाथिको छलफल सुरु गर्न प्रदेश सभा बैठकै बस्न नसकिरहेको अवस्थामा माओवादीले आफ्ना सांसदहरुलाई उक्त निर्देशन दिएको हो ।

आगामी आर्थिक वर्षका लागि प्रदेश सरकारले प्रस्तुत गरेको बजेट कार्यक्रम विवादको घेरामा छ ।

प्रदेश सभा सचिवालयले यसअघि तीन पटक बैठकको कार्यसूची तयार गरेको भए पनि सत्तारूढ दलहरू माओवादी केन्द्र, कांग्रेस र एकीकृत समाजवादीकै सांसदको विरोधका कारण बैठक सुरु नै हुन सकेको छैन । बिहीबारका लागि बोलाइएको बैठक पनि सूचना टाँस गरेर अर्को सूचना जारी नभएसम्मका लागि स्थगित गरिएको थियो । ‘संसदीय दलको बैठकले बजेटका पक्षमा उभिन र पारित गर्न निर्देशन गरेको छ,’ माओवादी केन्द्रकी सांसद कुन्ती जोशीले भनिन् ‘बजेट संशोधन हुने कुरा छैन ।’ माओवादी केन्द्रकै अर्का सांसद महेशदत्त जोशीले बजेटमा केही प्राविधिक त्रुटिहरु भएको स्वीकार गरेको बताए । उनका अनुसार पनि बजेटका पक्षमा एकमत भएर उभिने संसदीय दलको निर्णय छ ।

यता सत्तारूढ दल कांग्रेस र एकीकृत समाजवादीका सांसदहरुको भने बजेटप्रतिको असन्तुष्टि कायमै छ । मन्त्रीहरु स्वयं पनि बजेटप्रति असन्तुष्टि व्यक्त गर्दै सच्च्याएर अघि बढ्नुपर्ने बताइरहेका छन् । सत्तारूढ दल कांग्रेसका सांसद भरतबहादुर खड्काले यथास्थितिमा बजेट पारित नगर्ने बताए । ‘अहिलेका मान्छे त प्रदेशै बेचेर खानेजस्ता देखिए,’ सांसद खड्काले भने ‘अहिले रोक्न सकिएन भने बर्बाद हुन्छ ।’

सुदूरपश्चिम सरकारले आगामी आर्थिक वर्षका लागि ३६ अर्ब ७४ करोड ६४ लाखभन्दा बढीको बजेट ल्याएको छ । जसअन्तर्गत चालुतर्फ १२ अर्ब २९ करोड ५९ लाख र पुँजीगततर्फ २४ अर्ब १४ करोड ४७ लाख विनियोजन गरिएको छ ।

प्रकाशित : असार १८, २०७९ १९:५०
प्रतिक्रिया
पठाउनुहोस्

रोयल अन्तिम चारमा

कान्तिपुर संवाददाता

काठमाडौँ — रोयल राष्ट्रव्यापी खेलकुदअन्तर्गत यु–२३ पुरुष बास्केटबल प्रतियोगितामा शनिबार सेमिफाइनलमा प्रवेश गरेको छ । कीर्तिपुरको नयाँ बजारस्थित कभर्डहलमा रोयलले टाइम्सलाई ६६–५६ ले पराजित गर्दै समूह ‘ए’ को विजेताका रुपमा सेमिफाइनलमा पुगेको हो ।

लगातार तीन खेलमा जित आत्मासात गरेको रोयलका निकेश मगरले १६ अंक जोडे । पराजयका बावजुद उपविजेता बन्दै टाइम्स पनि सेमिफाइनलमा पुग्न सफल भयो ।

मदन भण्डारी स्पोर्ट्स एकेडेमीअन्तर्गत केन्द्रीय बास्केटबल विभागद्वारा आयोजित प्रतियोगितामा यसअघि नै सेमिफाइनलमा पुगेको कीर्तिपुरले विशाल मिलन केन्द्र (बीएमके) लाई ५९–४३ ले हराउदै समूह ‘बी’ को विजेता भयो ।

कीर्तिपुरले लगातार चौथो जित निकालेको हो । कीर्तिपुरका आशिष महर्जनले १८ स्कोर गरे । गोल्डेनगेटले बलर्स एकेडेमीलाई ७५–४२ ले पन्छायो । गोल्डेनगेटका प्रनित श्रेष्ठले १७ अंक बटुले । अब सेमिफाइनल पुग्ने एक टिमको मात्र टुंगो लाग्न बाँकी छ ।

प्रकाशित : असार १८, २०७९ १९:४९
पूरा पढ्नुहोस्
प्रतिक्रिया
पठाउनुहोस्
×