जयपृथ्वीको सालिक तोडफोड- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

जयपृथ्वीको सालिक तोडफोड

गतवर्ष असोजमा बझाङ्गी भाषाको चलचित्र छायांकनका लागि चोकमा सालिक राखिएको थियो ।
वसन्तप्रताप सिंह

बझाङ — बझाङ सदरमुकाम चैनपुरको लोकतान्त्रिक चोकमा राखिएको जयपृथ्वीबहादुर सिंहको सालिक तोडफोड गरिएको छ । बझाङ्गी भाषाको चलचित्र छायांकनका लागि गतवर्ष असोजमा उक्त चोकमा सालिक राखिएको थियो । सालिक कहिले र कसले तोडफोड गर्‍यो भन्नेबारे भने प्रहरी, प्रशासनदेखि स्थानीय पनि अनभिज्ञ छन् ।

अर्ध कदको सालिक तोडफोड गरेर टाउकोको भाग शरीरबाट छुट्याएर फुटाइएको छ भने उनको नाम र जन्ममिति लेखिएको धातुको प्लेटमा पनि ढुंगाले हानेर तोडफोड गरिएको छ । फुटेको टाउकोको भाग सालिकसँगै राखिएको छ । ‘एक दुईहप्ता अगाडिसम्म ठिकै थियो,’ सालिक नजिक व्यापार सञ्चालन गरिरहेकी स्थानीय बसन्ती थापाले भनिन्, ‘कसले कतिबेला फुटायो केही थाहा भएन ।’ उनले जिल्लामा मात्रै नभएर देश विदेशमा सम्मानका साथ नाम लिइने व्यक्तिको सालिक तोडफोड हुनु गलत काम भएको बताइन् ।

बझाङी भाषाको एक चलचित्र निर्माणको क्रममा गत वर्ष असोज १९ गते लोकतान्त्रिक चोकमा उक्त सालिक स्थापना गरिएको थियो । करिब २ महिनाजति मुख्य चोकमा रहेको सालिकका कारण ट्राफिक व्यवस्थापनमा समस्या भएको भन्दै चोकभन्दा केही पर कुनामा सारिएको थियो । सालिक राखिएको ठाउँ छेकिने गरी त्यस ठाउँमा गाडीहरु पार्किङ गर्ने गरिएको थियो ।

जयपृथ्वीको सालिक तोडफोड भएपछि सालिकको सुरक्षा र व्यवस्थापन गर्न नसकेको भनेर स्थानीय आक्रोश व्यक्त गर्न थालेका छन् । ‘सदरमुकामको मुटुमा रहेको सालिकको समेत सुरक्षा गर्न नसक्नेले अपमान त नगर्नु नि,’ सालिक रहेको स्थान नजिकै घर भएकी जिल्ला अस्पतालकी सेवानिवृत वरिष्ठ नर्स उमा केसीले भनिन्, ‘जयपृथ्वी जस्तो व्यक्तिको सालिक यस्तो हालतमा रहेको कति दिन भइसक्यो । न कसैलाई कारबाही भएको छ । न त सालिकको कतै व्यवस्थापन गरिएको छ,’ उनले राज्यले राष्ट्रिय विभूतिको सम्मान दिएको व्यक्तिको सालिक तोडफोड भएको अवस्थामा मुख्यचोकमा राखिनु अपमान भएको बताउँदै त्यसको पुनर्निर्माण गरेर सुरक्षित तरिकाले व्यवस्थापन गर्नुपर्ने बताइन् ।

फिल्म छायांकन हुन्जेल सालिक सडकको माझमै राख्ने र त्यसपछि नगरपालिकासँग समन्वय गरेर अर्को उपयुक्त ठाउँमा सारिने बताइएको थियो । नगरपालिकाका प्रमुख प्रशासकीय अधिकृत अम्मरराज जोशीले सालिक तोडफोड गरेको विषयमा आफूलाई खबर आएको भएपनि नगरसभामा व्यस्त भएका कारण हेर्न जान नपाएको बताए । ‘तोडफोड भएको छ भन्ने खबर त आएको हो । नगरसभामा व्यस्त भएकाले जान पाइएको छैन । यो विषयमा मेयरसा'बसँग सल्लाह गर्छु,’ उनले भने ।

सालिक तोडफोड भएको विषयमा प्रहरीलाई पनि जानकारी नभएको जिल्ला प्रहरी कार्यालयका निमित्त प्रहरी प्रमुख जनक ढुंगानाले बताए । ‘यो बारेमा हामीलाई त कुनै सूचना आएको छैन । के भएको रहेछ बुझ्न पठाउँछु,’ उनले भने ।

सदरमुकाम चैनपुरको लोकतान्त्रिक चोक चौबिसै घन्टा प्रहरीको निगरानीमा हुने ठाउँ हो । बझाङमा जन्मिएका मानवतावादी राजा जयपृथ्वीलाई असार ६ गते मात्रै नेपाल सरकारले राष्ट्रिय विभूति घोषणा गर्ने निर्णय गरेको थियो ।

प्रकाशित : असार १२, २०७९ ११:३५
प्रतिक्रिया
पठाउनुहोस्

युवा पुस्तालाई दुर्व्यसनबाट बचाउने हामी सबैको दायित्व : गृहमन्त्री खाँण

कान्तिपुर संवाददाता

काठमाडौँ — गृहमन्त्री बालकृष्ण खाँणले नेपालमा लागूपदार्थ दुर्व्यसनी चुनौतीको रुपमा अघि बढिरहेको बताएका छन् ।

आइतबार काठमाडौंमा आयोजित लागूऔषध दुरुपयोग तथा अवैध ओसारपसरारविरुद्धको दिवसका अवसरमा आयोजित कार्यक्रमलाई सम्बोधन गर्दै गृहमन्त्री खाँणले यस्तो बताएका हुन् । उनले लागूपदार्थको दुर्व्यसनको कारणले समाजलाई गम्भीर असर पारेको पनि बताए ।

मन्त्री खाँणले लागूऔषधको गम्भीर असर सबैभन्दा बढी युवा पुस्तामा परिरहेको बताए । उनले युवा पुस्तालाई दुर्व्यसनबाट कसरी बचाउने भन्ने कुरा सरकार र समाज सबैको दायित्व भएको बताए । गृहमन्त्री खाँणले लागूऔषध दुर्व्यसनीलाई कम गर्न सरकार संवेदनशील रहेको बताए । उनले युवा पुस्ताको भविष्य सुन्दर बनाउन सरकारले आगामी दिनमा जन जागरुकताका कार्यक्रम ल्याउनुपर्ने, पाठ्यपस्तकमा पनि यसलाई समावेश गरेर विद्यार्थीलाई बेलैमा जानकारी गराउनुपर्ने र दुर्व्यसनीमा फसेका युवाहरुलाई सुधार्न अभियान थाल्नुपर्ने आवश्यकता रहेको पनि बताए ।

उनले भजे, ‘लागूपदार्थ चुनौतीको रुपमा अघि बढेको छ । लागूपदार्थको दुर्व्यसनको कारणले समाजलाई गम्भीर असर पारेको छ । आज सबैभन्दा बढी प्रभाव युवा पुस्तामा परिरहेको छ । हाम्रो युवा पुस्तालाई दुर्व्यसनबाट कसरी बचाउने भन्ने हामी सबैको दायित्व हो । सरकार यो संवेदनशील विषयमा आफ्ना नागरिकको रक्षा र युवा पुस्ताको सुन्दर भविष्य बचाउन प्रतिवद्ध छ । आउने दिनमा सरकारले अझै बढी ध्यान दिन, जनजागरुकताका कार्यक्रम ल्याउनुपर्ने, पाठ्यपस्तकमा पनि यसलाई समावेश गरेर विद्यार्थीलाई बेलैमा जानकारी दिने, दुर्व्यसनीमा फसेका युवाहरुलाई सुधार्न अभियान थाल्नुपर्नेछ । आज बाट नै लागूपदार्थबाट मुक्त हुनुहोस् ।’

गृहमन्त्री खाँणले विभिन्न अपराधिक गतिविधिहरु मध्येमा लागूपदार्थसँग सम्बन्धित अपराध झन्डै ८ प्रतिशतभन्दा बढी पुगिसकेको र लागुपदार्थ अपराधमा दोषी ६ हजारभन्दा बढी बन्दी कारागारमा रहेको उल्लेख गरे ।

प्रकाशित : असार १२, २०७९ ११:०६
पूरा पढ्नुहोस्
प्रतिक्रिया
पठाउनुहोस्
×