विनोद शाही मृत्यु प्रकरण : हत्या आरोपमा ४ जना पक्राउ- सुदूरपश्चिम - कान्तिपुर समाचार

विनोद शाही मृत्यु प्रकरण : हत्या आरोपमा ४ जना पक्राउ

सत्यतथ्य पत्ता लगाउन सरकारलाई सभामुखको निर्देशन
मेनुका ढुंगाना

अछाम — अछामको पञ्चदेवल विनायक नगरपालिका–४ मा १५ वर्षीय किशोर विनोद शाही मृत फेला परेको ५ दिनसम्म पनि शव उठाउन सकिएको छैन । विनोद शाहीको हत्या अभियोगमा ४ जना प्रकाउ परेका छन् ।

मंगलबार साँझ केन्द्रीय अनुसन्धान ब्युरो(सीआईबी)को टोलीले उनीहरूलाई प्रकाउ गरेको जिल्ला प्रहरी कार्यलय अछामका सूचना अधिकारी प्रहरी निरीक्षक कैलाश बिष्टले बताए ।

प्रकाउ परेकामाथि थप अनुसन्धान भइरहेको उनले बताए । घटनाको थप अनुसन्धान गर्न सुदूरपश्चिम प्रदेश प्रहरी कार्यालयले संघीय प्रहरी इकाई महेन्द्रनगरका प्रमुख प्रहरी वरिष्ठ उपरीक्षक (एसएसपी) जनकराज पाण्डे नेतृत्वको टोली समेत खटिएको छ । ‘शवको पोस्टमार्टम गराउनु नै पहिलो पाटो हो । यो घटनामा राजनिति जोडिएकाले दोषी उम्किने सम्भावना पनि हुन्छ । अनुसन्धानलाई मासबाट प्रभावित पार्नु हुँदैन,’ पाण्डेले भने ।

‘छोराको हत्या भयो, मैले न्याय पाउँछु कि पाउँदिनँ ?’

जिल्लास्थित प्रमुख राजनीतिक दल नेपाली कांग्रेस र नेकपा एमालेले मंगलबार छुट्टाछुट्टै विज्ञप्ति जारी गरी घटनाको सत्यतथ्य छानबिन गरी दोषीमाथि कारबाही र पीडितलाई न्याय दिन माग गरेका हुन् । नेकपा एमालेले शाहीको हत्या प्रहरी प्रशासनको बलमा नेपाली कांग्रेसका कार्यकर्ताहरूबाट भएको आरोप लगाएको छ भने नेपाली कांग्रेसले उक्त आरोपको खण्डन गरेको छ । पाँच दिनदेखि हराइरहेका शाहीको शव गाउँकै भिरमा जेठ २१ गते भेटिएको थियो । न्याय माग्दै मृतकका आफन्तले लगातार विनायकमा आन्दोलन गरिरहेका छन् ।

यसैबीच सभामुख अग्निप्रसाद सापकोटाले बुधबार प्रतिनिधिसभा बैठकमा शाहीको मृत्युबारे छानबिन गरी सत्यतथ्य पत्ता लगाउन सरकारलाई निर्देशन दिएका छन् । अछाम क्षेत्र नम्बर २ का सांसद यज्ञबहादुर बोगटीले शाहीको मृत्युबारे तत्काल सरकारका नाममा रुलिङ गर्न सभामुखसमक्ष आग्रह गरेका थिए ।

प्रकाशित : जेष्ठ २५, २०७९ १२:११
प्रतिक्रिया
पठाउनुहोस्

विनोद शाहीको मृत्युबारे सत्यतथ्य पत्ता लगाउन सरकारलाई सभामुखको निर्देशन

कान्तिपुर संवाददाता

काठमाडौँ — अछाम पञ्चदेवल विनायक नगरपालिका वडा नम्बर ४ का विनोद शाही मृत्युबारे छानबिन गरी सत्यतथ्य पत्ता लगाउन सभामुख अग्निप्रसाद सापकोटाले सरकारलाई निर्देशन दिएका छन् । प्रतिनिधिसभाको बुधबारको बैठकमा अछाम निर्वाचन क्षेत्र २ का सांसद यज्ञ बोगटीले शाहीको मृत्युबारे प्रश्न उठाएपछि सभामुख सापकोटाले छानबिन गरी सत्यतथ्य पत्ता लगाउन निर्देशन दिएका हुन् । 

सांसद बोगटीले ९ दिन पहिले १५ वर्षीय शाहीको हत्या भएको तर प्रशासनले जाहेरी दर्ता नलिएको भन्दै सभामुखमार्फत सरकारको नाममा रुलिङ माग गरेका थिए । 'विनोद शाहीको हत्या भएको ९ दिन पूरा भइसकेको छ । विनोद शाहीको हत्या भइसकेपछि विशेष समय लिएर सदनको ध्यानाकर्षण गराएको थिए । त्यो ध्यानाकर्षण गराउँदा हत्यारालाई कारबाही गरियोस्,' उनले भने, 'पीडित पक्षले जाहेरी दर्ता गरियोस् भनेर माग गरिएको छ । लासको पोस्टमार्टम गरेर अगाडि बढाइयोस् । जिल्लामा शान्ति सुरक्षा कामय गरियोस् भनेको थिएँ । गृहमन्त्रीले न्यायीक रूपमा छानबिन हुने, हत्यारालाई कारबाही गरिनेछ भन्नुभएको थियो ।’

जाहेरी दर्ता गरिने भने पनि आजसम्म जाहेरी दर्ता नभएको भन्दै उनले अहिले उनको लास कुहिएको अवस्था रहेको बताए । ‘दर्ता गर्नुस् भनेर भन्नुभएको थियो किन दर्ता भएन ?' उनले भने ।

घटनालाई राजनीतिक रङ दिन खोजिएको सांसद बोगटीको आरोप थियो । उनले भने, 'जाहेरी दर्ता नगर्नुको कारण राजनीतिको रङ देखिएको छ । विद्यार्थी मारिँदा राजनीतिक रङ दिनु हुँदैन ।'

त्यसपछि सभामुख सापकोटाले सरकारलाई सत्यतथ्य छानबिन गर्न निर्देशन दिएका हुन् । 'माननीय सदस्यले उठाउनुभएको विषयमा मेरो गम्भीर ध्यानाकर्षण भएको छ । सो सम्बन्धमा नेपाल सरकाको ध्यानाकर्षण गराउन चाहन्छु । घटनाको सत्यतथ्य पत्ता लगाइ दोषिमाथि कारबाही प्रक्रिया अगाडि बढाउन नेपाल सरकारलाई निर्देश गर्दछु,' उनले भने ।

प्रकाशित : जेष्ठ २५, २०७९ १२:०२
पूरा पढ्नुहोस्
प्रतिक्रिया
पठाउनुहोस्
×