भन्सारमै थन्किए गाडी
कञ्चनपुर — आँगनभरि सवारी साधन । नयाँ र पुराना सबै एकै ठाउँमा छन् । वर्षौदेखि राखिएका ती सवारी साधन कतिपय जीर्ण पनि भइसकेका छन् । कतिपयका सामानहरू समेत निकालिसकिएका छन् । कञ्चनपुरको गड्डाचौकीस्थित भन्सार कार्यालयमा सवारी साधनहरू वर्षौंदेखि लिलाम हुन नसकेका कारण जीर्ण बन्दै गएका हुन् ।
प्रहरीले जिल्लाका विभिन्न स्थानबाट बरामद गरेका अवैध सवारी साधनहरू लामो समयदेखि भन्सारमै थन्किएका छन् । कतिपय त कामै नलाग्ने समेत भइसकेका छन् । गड्डाचौकी भन्सार कार्यालयमा अहिले चार पांग्रे र दुई पांग्रे गरी ४ सय बढी सवारी साधन छन् । जसमा अधिकांश मोटरसाइकल छन् । चार पांग्रे सवारी साधन १५ मात्रै छन् ।
भन्सार कार्यालयले सवारी साधन लिलाम नगरेको ४ वर्ष भन्दा बढी भयो । उत्पादन भएको १० वर्षपछि यातायात कार्यालयमा दर्ता हुँदैन । १० वर्ष नाघेका सवारी साधन काटेर लिलाम गर्नुपर्ने हुन्छ । यसले एकातिर राजस्व घट्छ भने अर्कोतिर सवारी साधन उपयोगमा नआएरै काटनुपर्ने हुन्छ ।
गड्डाचौकी भन्सार कार्यालयका प्रमुख ध्रुवराज विश्वकर्माले सवारी साधनको लिलामका लागि प्रक्रिया सुरु भएको बताए । १७७ मोटरसाइकलको उत्पादन र मोडेल खुलेर आएकाले अब तिनको मूल्यांकन गरेर प्रक्रिया अगाडि बढाइने बताए । उनले मूल्यांकनकर्तालाई पनि बोलाई सकिएको बताए ।
सवारी साधन लिलामबाट मात्रै ५० लाख बढी राजश्व संकलन हुने अनुमान गरिएको छ । चार पांग्रे सवारी साधनको लिलामका लागि पनि छिट्टै प्रक्रिया अघि बढाइने विश्वकर्माले बताए । लामो समयदेखि सवारी साधन लिलाम नहुँदा मुख्य मुख्य सामानहरू चोरी भएर कामै नलाग्ने हुन्छन् ।
प्रकाशित : जेष्ठ २५, २०७९ ०८:१६
