अछाममा रोचक बन्दै चुनावी प्रतिस्पर्धा- सुदूरपश्चिम - कान्तिपुर समाचार

अछाममा रोचक बन्दै चुनावी प्रतिस्पर्धा

एमालेद्वारा आफ्नै पार्टीबाट विभाजन भएर बनेको एकीकृत समाजवादीसँग मेल्लेखमा गठबन्धन
३ पालिकामा प्रमुख दलहरुबीच एकल भिडन्त
मेनुका ढुंगाना

अछाम — वैशाख ३० गते हुने स्थानीय तहको निर्वाचनका लागि अछामका राजनीतिक दलहरू प्रचारप्रसार र घरदैलोमा व्यस्त छन् । एमाले विभाजन र सत्तारुढ ५ दलबीचको गठबन्धनका कारण यसपटकको निर्वाचन परिमाण रोचक बन्ने देखिएको छ ।

जिल्लाका १० स्थानीय तहमध्ये २०७४ सालमा तुर्माखाँद, ढकारी गाउँपालिका तथा पञ्चदेवल बिनायक र कमलबजार नगरपालिकाको प्रमुख उपप्रमुखमा कांग्रेस विजयी भएको थियो । बान्नीगढी जयगढ गाउँपालिकामा प्रमुख, चौरपाटी र मेल्लेख गाउँपालिकामा उपप्रमुख जितेर ७ स्थानीय तहमा बलियो प्रतिनिधित्व गरेको कांग्रेसलाई यो चुनावमा पनि विरासत जोगाइराख्नुपर्ने दबाब छ ।

एमालेले मंगलसेन नगरपालिका र साँफेबगर नगरपालिकामा प्रमुख उपप्रमुख तथा चौरपाटी गाउँपालिकामा प्रमुख पद हत्याएको थियो । दल विभाजनपछि उसले पहिलो निर्वाचनको सामना गर्दै छ । एमालेका लागि यो निर्वाचन आफ्नो शक्ति जोख्ने अवसर पनि हो । एमाले नेता एवं पूर्वउप्रधानमन्त्री भीम रावलको गृहनगर साँफेबगरमा यसअघि एमालेले जितेको थियो । तर, पार्टी विभाजनसँगै नगर प्रमुख र उपप्रमुख नेकपा (एकीकृत समाजवादी) तर्फ लागेका छन् । एमालेको तर्फबाटै गत निर्वाचनमा विजयी भएका चौरपाटी गाउँपालिकाका निवर्तमान अध्यक्ष हर्क साउद पनि एकीकृत समाजवादीमा लागेर फेरि अध्यक्षको प्रत्याशी बनेका छन् । एमाले अछामका तत्कालीन जिल्ला अध्यक्ष तथा राष्ट्रिय सभा सदस्य शेरबहादुर कुँवरले पनि विभाजनपछि एकीकृत समाजवादी रोजेकाले एमालेलाई थप दबाब परेको हो ।

नेता रावल एमाले र माओवादी केन्द्रको गठबन्धनलाई मत माग्न गाउँ–गाउँ पुगिरहेका छन् । रावलको वडा साँफेबगर–६ मा कांग्रेस–एकीकृत समाजवादी, एमाले–माओवादी र स्वतन्त्र उम्मेदवारबीच त्रिपक्षीय प्रतिस्पर्धामा छन् । एमालेले माओवादीसँग गठबन्धन गर्दै साँफेबगरमा अधिकारकर्मी एवं जिल्ला कमिटी सदस्य पशुपति कुँवरलाई प्रमुखको उम्मेदवार बनाएको छ । उपप्रमुखमा माओवादीका रंग ठकुल्ला उठेका छन् । उता गठबन्धनबाट प्रमुखमा कांग्रेसका राजेन्द्र कुँवर र उपप्रमुखमा एकीकृत समाजवादीका सिलोज कुवँर उम्मेदवार बनेका छन् ।

मेल्लेख गाउँपालिकामा एमालेबाटै छुट्टिएर बनेको एकीकृत समाजवादीबीच तालमेल भएको छ । एमालेको तर्फबाट गाउँपालिका अध्यक्षमा भिमबहादुर खड्का र उपाध्यक्षमा एकीकृत समाजवादीबाट समिता कुमारी महर (साउद) चुनावी मैदानमा छन् । त्यस्तै, माआवादी केन्द्रबाट ज्वाला सिंह साउद अध्यक्ष र कांग्रेसका नृपबहादुर खड्का उपाध्यक्षका उम्मेदवार भएका छन् ।

पञ्चदेवल बिनायक नगरपालिकामा प्रमुख पदमा सबैभन्दा धेरै व्यक्ति चुनावी प्रतिस्पर्धामा छन् । कांग्रेस, एकीकृत समाजवादी, एमाले, माओवादी केन्द्र, राप्रपा, र स्वतन्त्रबाट एक जना गरी ६ जना नगर प्रमुखको प्रत्याशी बनेका छन् । त्यस्तै, ५ जना उपप्रमुखका लागि चुनावी मैदानमा छन् । यो नगर गत निर्वाचनमा कांग्रेसले जितेको थियो ।

प्रकाशित : वैशाख २७, २०७९ ०८:३८
प्रतिक्रिया
पठाउनुहोस्

दुर्गममा न उम्मेदवार पुग्छन् न जनप्रतिनिधि

रहफवासीलाई आफ्नै गाउँपालिकाको केन्द्र तुर्माखाँद पुग्न करिब ३६ घण्टा हिँड्नुपर्छ 
मेनुका ढुंगाना

रहफ, अछाम — स्थानीय तहका लागि नयाँ जनप्रतिनिधि चुन्ने दिन नजिकिँदै जाँदा पनि अछामको दुर्गम गाउँ रहफमा चुनावको रौनक देखिँदैन । भौगोलिक विकटताका कारण उम्मेदवारहरू सहजै यहाँ पुग्न सक्दैनन् ।


मंसिरमा कर्णाली राजमार्गबाट गाउँलाई सडक सञ्जालले छोए पनि गाडी चल्दैनन् । तुर्माखाँद गाउँपालिका–१ मा रहेको रहफवासीले सहजै न उम्मेदवार देख्न पाउँछन् न जितेर गएका जनप्रतिनिधि नै ।

रहफवासीलाई आफ्नै गाउँपालिकाको केन्द्र तुर्माखाँद पुग्न करिब ३६ घण्टा हिँड्नुपर्छ । जिल्ला सदरमुकाम मंगलसेनबाट करिब दुई सय किलोमिटर टाढाको रहफबाट गाउँपालिका केन्द्र तुर्माखाँद नै एक सय किलोमिटर बढी छ । पैदल हिँडेर तुर्माखाँद पुग्न स्थानीयलाई निकै सकस हुने गरेको छ । दैलेख र सुर्खेतसँग नजिकको सम्बन्ध रहेका अछामका यी दुई वडाका बासिन्दालाई अछामबारे त्यति जानकारी पनि छैन ।

ठूला राजनैतिक दल कांग्रेस, एमाले र माओवादी केन्द्रलगायतका प्रतिनिधिले आफ्ना उम्मेदवारलाई भोट मागिरहेका छन् । तर, उम्मेदवार यी रहफका बासिन्दाको दैलोमा सहजै पुग्न सक्दैनन् । ‘पहिलेका चुनावमा उम्मेदवार हौं । भोट दिनुस् भनेर माग्न आएका थिए । अहिले कसैले मत मागेको छैन । वडाध्यक्षका उम्मेदवार पनि को हुन् । हामीलाई त केही पनि थाहा छैन,’ तुर्माखाँद–१ रहफ नेपालीबाडाकी ६५ वर्षीया अमृता नेपालीले भनिन्, ‘मत दिने दिन कहिले हो भन्ने पनि थाहा छैन । यो टोलमा खानेपानीको समस्या छ । खानेपानी दिन्छु भन्नेलाई नै मत दिने हुँ ।’

यहाँका अन्य स्थानीय पनि स्थानीय निर्वाचन, उम्मेदवार र राजनैतिक दलबारे त्यति जानकार छैनन् । खानेपानी, स्वास्थ्य, शिक्षा, बिजुलीलगायतका पूर्वाधारबाट वञ्चित रहफवासीले नेता तथा जनप्रतिनिधिसँग गुनासोसमेत राख्ने मौका पाउँदैनन् । ‘यहाँसम्म हाम्रा कुरा सुन्न कोही आउँदैनन् । गाउँमा कोही नौलो मान्छे आयो भने बिन्द्रासैनको स्कुलमा जम्मा हुन्छौं । जान सक्नेहरू त्यतै गएर कुरा सुन्छौं । नसक्नेहरू जाँदैनौं,’ रहफकै ७५ वर्षीय उज्जले दमाईले भने, ‘गुनासो राख्ने नेता, जनप्रतिनिधि टाढा छ भनेर यता आउँदैनन् । हामी पनि नेता जनप्रतिनिधि खोज्दै गुनासो राख्न जान सक्दैनौं ।’

स्थानीय तह पुनः संरचनापछि गाउँमा सडक, बिजुली पुग्ने आस गरेका रहफका बासिन्दा गाउँपालिकाको समेत नजर नपुग्ने ठाउँमा छन् । गाडी चढेर आफ्नै गाउँपालिकाको केन्द्र तुर्माखाँद पुग्न दैलेखको दुल्लु नगरपालिका,चामुण्डा बिन्द्रासैनी नगरपालिका र आठबिस नगरपालिका गरी ३ स्थानीय तह र अछामको पञ्चदेवल विनायक नगरपालिका, कमलबजार नगरपालिका हुँदै जानुपर्छ ।

पैदल यात्रा गर्नलाई पनि गोरेटो बाटो छैन । कर्णालीको छालबाट एउटा बाटो छ भने जंगल नै जंगलको अर्को बाटो छ । जंगलको बाटो कठिन र असहज छ । कर्णाली किनारको बाटोमा वर्षातको समयमा हिँड्न सकिँदैन । ‘अछामको रहफ सजिलै पुग्न सकिने ठाउँ नै होइन । रहफलाई जहिले पनि अलग राज्यको नजरले हेरिन्छ । यहाँ न सडक छ न बिजुली न उच्च शिक्षाको लागि शैक्षिक संस्था छ,’ स्थानीय पिरक विकले भने, ‘भौगोलिक विकटताकै कारण हामी पछि परेका छौं । भोट माग्ने बेला उम्मेदवार नै सजिलै पुग्न नसक्ने गाउँमा जितेपछि जनप्रतिनिधिको मुहार हेर्न झन् कठिन हुन्छ ।’

साविकको रहफ गाविस हुँदा ५/६ घण्टा पैदल हिँडेर सेवा पाइने भए पनि हाल दुई दिन हिँड्नुपर्ने बाध्यता रहेको तुर्माखाँद गाउँपालिका–२ भुलुका धनबहादुर शाहीले बताए । योजना सम्झौतादेखि भुक्तानीका लागि गाउँपालिकाको केन्द्रमा आउँदा जाँदा मात्र ६ दिन लाग्ने गरेको उनको भनाइ छ । सेवा लिन दुई दिन पैदल हिँड्दा पनि कहिलेकाहीं सेवा पाउन नसकिएको नागरिकहरूको गुनासो छ । कागजात नमिल्दा फेरि तीन दिन लगाएर गाउँ फर्किनुपर्ने बाध्यताका कारण खर्च पनि बढी हुने गरेको भुलुका सर्जन शाहीले बताए ।

तुर्माखाँद–१ का अध्यक्ष थिरबहादुर रावलका अनुसार यहाँ ९ सय घरधुरी र २ हजार ५७ मतदाता छन् । मतदाता भेटघाटका लागि कतिपय ठाउँमा उम्मेदवार पुग्ने गरेका छन् भने धेरैजसो घरमा पार्टीका स्थानीय प्रतिनिधिलाई परिचालन गरिएको छ । ‘चुनावी माहोल खासै बनेको छैन । सहजै पुग्नै सक्दैनन् । हामी त निकै विकट गाउॅमा पो छौं,’ उनले भने, ‘भौगोलिक विकटता र थोरै आउने बजेटले जनताले अपेक्षा गरेअनुसारको काम गर्न सकिएन ।’

प्रकाशित : वैशाख २४, २०७९ १३:०९
पूरा पढ्नुहोस्
प्रतिक्रिया
पठाउनुहोस्
×