औद्योगिक क्षेत्र निर्माणमा ढिलाइ- सुदूरपश्चिम - कान्तिपुर समाचार

औद्योगिक क्षेत्र निर्माणमा ढिलाइ

भवानी भट्ट, मोहन शाही

कञ्चनपुर/डोटी — कञ्चनपुरको बेदकोट नगरपालिका २ छेलामा औद्योगिक क्षेत्र स्थापनाका लागि शिलान्यास भएको एक वर्ष पुग्यो । शिलान्यासपछि औद्योगिक क्षेत्र स्थापनामा खासै प्रगति हुन सकेको छैन । एक वर्षको अवधिमा उक्त क्षेत्रका रूखहरूको गणनासमेत सकिएको छैन ।

गत वर्ष फागुनमा तत्कालीन प्रधानमन्त्री केपी ओलीले औद्योगिक क्षेत्रको शिलान्यास गरेका थिए । शिलान्यासका क्रममा तत्काल काम सुरु भएर ५ वर्षमा औद्योगिक क्षेत्र स्थापना भइसक्ने उनले दाबी गरेका थिए ।

‘अहिले औद्योगिक क्षेत्रमा पर्ने रूखहरू गणनाको काम भइरहेको छ,’ औद्योगिक क्षेत्र व्यवस्थापन कार्यालय नेपालगन्जका प्रमुख कृष्ण पुनले भने, ‘रूख गणनाको कटान प्रक्रिया अघि बढेपछि मात्रै संरचना निर्माण आदिको काम सुरु हुनेछ ।’

औद्योगिक क्षेत्र स्थापनाका लागि दुई वर्षअघि गरिएको विस्तृत परियोजना प्रतिवेदन र वातावरणीय प्रभाव मूल्यांकनमा २५ हजार ९ सय ६८ रूख काटनुपर्ने देखिएको छ । तर दुई वर्षपछि अहिले रूखहरूको संख्या बढी हुन सक्ने पुनले बताए । त्यतिबेला पोल साइजका बिरुवाहरू अहिले बढेर रूख भइसकेको हुन सक्ने पुनले बताए ।

यस क्षेत्रका उद्योगी व्यवसायीलगायत विभिन्न संघसंस्थाको दबाबपछि सरकारले २०७२ चैतमा औद्योगिक क्षेत्र घोषणा गरेको थियो । त्यसपछि विभिन्न चरणमा अध्ययन गरिएको हो । गतवर्ष तत्कालीन प्रधानमन्त्री ओलीले शिलान्यास गरेपछि निर्माण कार्यले गति पाउने अपेक्षा गरिएको थियो ।

‘शिलान्यास भए पनि अहिलेसम्म औद्योगिक क्षेत्रले भोगाधिकार पाएको छैन,’ स्थानीय रामचन्द्र रेग्मीले भने, ‘डिभिजन वन कार्यालयले कटान हुने रूखमा टाँचा लगाएर वन मन्त्रालयबाट कटान आदेश आएपछि मात्रै रूख काटिने छन् र त्यसपछि भौतिक पूर्वाधार निर्माणको काम अगाडि बढ्नेछ ।’

उनका अनुसार गतवर्षदेखि नै सुरु भएको रूख छपानको काम कोरोना संक्रमणलगायत विभिन्न कारणले प्रभावित हुँदै आएको छ । तर हालसम्म वन क्षेत्रका जमिन औद्योगिक क्षेत्रलाई हस्तान्तरण नै भएको छैन । औद्योगिक क्षेत्रले भोगाधिकार पाएपछि मात्रै भौतिक संरचना निर्माणको काम अगाडि बढ्नेछ ।

पहिलो चरणमा सडक, नाली र भौतिक संरचना निर्माण हुने क्षेत्रमा मात्रै रूख काटिने औद्योगिक क्षेत्र व्यवस्थापन लिमिटेडले जनाएको छ । बेदकोट नगरपालिका—२ को जनचेतना सामुदायिक वन र वडा नं. ३ को बेदकोट सामुदायिक वनको साढे ४ सय विघा जमिनमा औद्योगिक क्षेत्र स्थापना हुनेछ । उक्त क्षेत्रमा साना, मझौला र ठूला गरी १ सय २४ उद्योग स्थापना गर्न सकिनेछ ।

छेलामा औद्योगिक क्षेत्र स्थापनाको कुरा २०५१ देखि सुरु भएको हो । तत्कालीन सरकारले सम्भाव्यता अध्ययनका लागि २ लाख बजेटसमेत छुट्याएको थियो । त्यसयता औद्योगिक क्षेत्र व्यवस्थापन लिमिटेडले बेला बेलामा अध्ययन गर्दै आएको थियो । यस क्षेत्रका उद्योगी व्यवसायी र संघसंस्थाहरूले औद्योगिक क्षेत्र स्थापनाका लागि निरन्तर दबाबपछि सरकारले प्रक्रिया अघि बढाएको हो ।

प्रकाशित : माघ १३, २०७८ १०:५७
प्रतिक्रिया
पठाउनुहोस्

बजेट अभावले डोटीमा ग्राम अलपत्र

कान्तिपुर संवाददाता

डोटी — मन्त्रीस्तरीय निर्णयबाट दुई वर्षअघि डोटीमा औद्योगिक ग्राम निर्माण गर्ने निर्णय भए पनि अहिलेसम्म अलपत्र परेको छ ।

देशभर घोषणा भएका ४५ औद्योगिक ग्राममध्येको डोटीको जोरायल गाउँपालिका–२ बुडरस्थित धारापानीमा निर्माण हुन लागेको औद्योगिक ग्राम बजेट अभावले अलपत्र परेको हो ।

ग्राम निर्माणका लागि संघीय सरकारबाट आर्थिक वर्ष २०७६/७७ मा ९२ लाख निकासा आएकोमा ८३ लाख ६० हजार मात्र खर्च भएको गाउँपालिकाले जनाएको छ ।

उक्त रकमबाट औद्योगिक ग्राम क्षेत्रमा सडक, खानेपानी, शौचालय र प्रशासनिक भवन, घेरबारलगायतका संरचना निर्माण सुरु भए पनि बजेट अपुग भएपछि काम रोकिएको छ ।

‘बजेट अभावले काम अघि बढ्न सकेको छैन,’ जोरायल गाउँपालिका अध्यक्ष दुर्गादत्त ओझाले भने, ‘यसबारे विभागसँग नियमित छलफल भएको छ, विस्तृत अध्ययन गरेर चाँडै बजेट निकासा गरिने विश्वास छ ।’

उक्त क्षेत्रमा औद्योगिक ग्राम निर्माणका लागि भौतिक संरचना निर्माण सुरुमा निकै तीव्र रूपमा भए पनि अहिले सुस्ताएको छ । कुल ५० रोपनी जग्गामा औद्योगिक ग्राम निर्माण कार्य भइरहेको छ । यद्यपि कम्तीमा पनि ५ सय रोपनीसम्म जग्गा आवश्यक पर्ने स्थानीय बताउँछन् ।

सामुदायिक वन क्षेत्रमा औद्योगिक ग्राम निर्माण भएकाले थप जमिन प्राप्तिका लागि विभिन्न कानुनी अड्चन आउन सक्ने अनुमान गरिएको छ । औद्योगिक पूर्वाधार तथा वातावरण महाशाखाले आर्थिक वर्ष ०७७/०७८ मा १३० स्थानीय तहमा औद्योगिक ग्रामका लागि प्रस्ताव गर्न पत्राचार गरे पनि डोटीका कुनै पनि तहले घोषणा गरेका छैनन् ।

२०७६ माघ २० गते नेपाल सरकार मन्त्रिपरिषद्को निर्णयले बुडरस्थित धारापानीमा औद्योगिक ग्राम बनाउने निर्णय गरेको थियो ।

प्रकाशित : माघ १३, २०७८ १०:५५
पूरा पढ्नुहोस्
प्रतिक्रिया
पठाउनुहोस्
×